Tarix sahifalariga yashirin MDH kubogi musobaqasini qayta tiklash vaqti kelgan ko‘rinadi.
Ma’lumotlarga qaraganda, Ozarbayjon tomoni necha yildan buyon ushbu turnirni «o‘zlashtirish» harakatida. Har holda, oldinroq mamlakat futboli rahbariyati aniq taklifni o‘rtaga tashlagani aytilgandi: «Tashkilotchilik ishlarini bizga qo‘yib beringlar, turnirni yuqori saviyaga olib chiqamiz, sovrin jamg‘armasini ham. Agar sobiq ittifoq hududidagi mamlakatlar chempionlari har safar eng kuchli tarkib bilan qatnashishga va’da bersa, hammani o‘ziga qaratadigan qudratli turnirni yo‘lga qo‘yamiz».
Ozarbayjonliklar bejiz bunday taklifni o‘rtaga tashlashmagan. Binobarin, MDH kubogi o‘zining oxirgi yillarida ikkinchi tarkib yoki yoshlar jamoalari uchun o‘tadigan o‘tkinchi turnirga aylanib qolgandi. Lekin bilishimizcha, Rossiya futboli mas’ullari negadir bu taklifga javob berishmagan o‘sha vaqt. Endi esa vaziyat tubdan o‘zgardi: rus futboli ma’lum sanksiyalar ortidan xalqaro maydondan chetga chiqdi. Qancha muddatga, buni hech kim aytolmasa kerak. Bas, hozir FIFA va UYEFA taqiqiga jimgina qo‘l qovushtirib o‘tiradigan payt emas. Axir shu ketishda Rossiya futbolining ertasi nima bo‘ladi?
Tushunarliki, avvalo, Rossiya futbol ittifoqining o‘zi tashabbus ko‘rsatishi, muqobil variantlar izlashi kerak. Binobarin, Rossiya klub futbolining o‘z yog‘iga qovurilishi mamlakat milliy jamoasiga ham ta’sir qilmasdan qolmaydi, albatta. Ha, xabarlar oqimiga qarasak, ruslar allaqachon turli yechimlar ustida ish boshlashgan. Xususan, MDH kubogiga o‘xshash yangi turnir tashkil etish va unga Xitoy jamoalarini ham qo‘shish g‘oyasi haqida gap bor. O‘ylaymanki, aynan MDH kubogini qayta tiklash va uning obro‘sini avvalgi darajasidan ham yuqoriga ko‘tarish uchun puxta format ishlab chiqilsa, ayni muddao bo‘lardi. Fikrimcha, bu nafaqat Rossiya, balki O‘zbekiston va boshqa mamlakatlar futboli uchun ham foyda berardi. Bizda bir gap qayta-qayta aytiladi: «Janubiy-sharqiy Osiyoda alohida turnirlar bor, arab mamlakatlarida ham, biz nega OCHL va OFK kubogi bilan cheklanib qolishimiz kerak?» Chindan ham, juda o‘rinli savol bu. Mana, vaziyat taqozosi bilan o‘zimiz istagan sifatli turnirni loyihalashtirish imkoniyati yuzaga keldi. O‘ylashimcha, O‘FA hozir qo‘shma musobaqa tashkil etish g‘oyasini ilgari sursa, uni birinchi navbatda, aynan RFI qo‘llab-quvvatlasa kerak. Avvaliga klublar miqyosida, keyinchalik terma jamoalar darajasida yaxlit musobaqa yo‘lga qo‘yilsa, muxlislarda ham qiziqish talab darajasida bo‘ladi, menimcha. Faqat turtki zarur, tashabbus zarur. Rossiya kompaniyalarining moliyaviy qudrati hammaga ma’lum. Ularga hozir reklama maydoni kerak. Chunki FIFA va UYEFA Rossiya kompaniyalari bilan hamkorlik rishlarini uzdi. Demoqchimanki, yangi turnirni moliyalashtirish, uni munosib mukofot jamg‘armasi bilan ta’minlash imkoniyati har qachongidan kattaroq hozir. Boz ustiga, agar Xitoy klublari ham qo‘shilsa, jiddiy homiylar topish masalasi yanada yengillashadi.
Ha, turnir sobiq ittifoq hududidagi ayrim mamlakatlar tomonidan qabul qilinmasligi tayin. Deylik, Ukraina, Latviya, Litva va Estoniya futboli qo‘shilmasa kerak. Lekin zarari yo‘q. 16ta jamoadan 4ta guruh shakllantirish uchun okean ortidan qaysidir ko‘ngilli mamlakatlar jamoalarini chaqirish mumkin. Qolaversa, Osiyoda Xitoy bor, yana Eronni jalb etish imkoni yo‘q emas. Turnir formati, tashkiliy masalalar, muddati - bular mutaxassislar ishi. Yana bir masala - translyasiya. Bunisi juda oddiy: «Match TV» bugun o‘sha sanksiyalar tufayli deyarli «bekorchi»ga aylanib qoldi. Shunday ekan, MDH kubogini 1-2ta mehmon jamoa bilan bemalol yuqori saviyada tashkil etish imkoniyati bor. Siz qanday fikrdasiz?
Asilbek ABDURAHIMOV
Surxon
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
