«MYU» rahbariyati Erik ten Xag bilan kelishuvga erishishigacha sira tinchigani yo‘q. Mutaxassis endi iyun oyidan e’tiboran «qizil iblislar» bilan ish boshlaydi.
«MYU» rahbariyati Erik ten Xag bilan kelishuvga erishishigacha sira tinchigani yo‘q. Mutaxassis endi iyun oyidan e’tiboran «qizil iblislar» bilan ish boshlaydi. Albatta, uning APLdagi faoliyati qanday chiqishi barchani birdek qiziqtiradi. Trouw nashri esa vaqtdan ozgina ilgaralab, niderlandiyalik murabbiyni suhbatga chorladi.
- «Ayaks» bilan amalda shartnomangiz bor edi. Jamoadan nega aynan hozir ketishga qaror qildingiz?
- Bu mavsum allaqachon bonuslar davriga aylandi. «Ayaks» bilan yana muvaffaqiyat qozonish va qishni CHLda o‘tkazishni xohlagandim. Chunonchi, jamoa boshqaruvini qo‘lga olganimda, «Ayaks» «evroklub»ga aylanishi kerakligini aytgandim. Mana, xuddi shunday bo‘ldi ham.
- Faoliyatingiz davomida qachondir hafsalasizlikka ham tushganmisiz?
- Ha, bunday holatlar yuzaga keladi ba’zan. Muhimi, tabiatan kechirimliman, kimgadir kek saqlamayman, garchi hammasini yodda tutsamda.
- Odamlarni shaxsiy moyilligingiz tufayli himoya qilasiz, lekin ba’zida bu zararingizga ishlashi mumkin.
- Odatda shogirdlarimni oshkora qo‘llab-quvvatlayman. Lekin jamoada kimdir chegaradan o‘tib ketsa, boshqacha yondashaman, albatta. Har holda, futbol - sportning elit turi. Umuman, jamoada hamma bir-biriga ishonishi kerak, aks holda, natija chiqmaydi. Mayli, himoyaviy pozisiyam o‘zimga qarshi qaratilsa ham, jamoaga naf keltirsa, bas. Zero, menejerman, demakki, yetakchi roli zimmamda.
- Deylik, suiqasdda ayblanayotgan Promesni ham himoya qildingiz...
- Ha, shunday. Odam xato qiladi. Ammo bu uni butunlay hisobdan chiqarib tashlashni anglatmaydi.
- Ayollar bilan mojarodan keyin «Ayaks» sport direktori lavozimidan ketgan Mark Overmars ham do‘stingiz bo‘lib qolaveradimi?
- Hamon aloqadamiz. Do‘stlik biznes hamkorlikdan kattaroq. Hayotda barchasini muvozanatda saqlash muhim. Yana odamlarga nisbatan kechirimli bo‘lish ham. Axir insonlar bir-birlarini otishlari emas, aksincha, yordam qo‘lini cho‘zishlari kerak.
- Jamoaga yondashuvingiz va «total shaxs» tamoyili bilan Lui van Galga o‘xshaysiz...
- Lui men uchun xuddi Rinus Mixels va Yoxan Kroyff kabi - katta namuna. Bular «Ayaks»ga eng katta ta’sir o‘tkazgan shaxslardir. Qolaversa, ularning buyukligi faqat klub bilan chegaranmaydi. Zero, butun dunyo futboliga katta naf keltirishgan.
- Mana, shu murabbiylarga tegishli ko‘plab rekordlarni yangiladingiz. Shunday ekan, yaqin kelajakda ular qatoriga chiqa olasizmi?
- Qiyin, chunki buning uchun yevromaydonda sovrinlar yutish kerak. Qolaversa, Kroyff butunlay boshqa daraja edi. Uning amalga oshirgan ishlari bebaho.
- Britaniya tabloidlari bir necha haftadan beri hayotingizni chuqur o‘rganmoqda. Bu qo‘rqinchli emasmi?
- Yashiradigan hech narsa yo‘q, demak, bunga ahamiyat berishim shart emas. Hammasini o‘qish zararingizga ishlaydi. Zero, ba’zida to‘g‘risini yozishadi, gohida aksini.
- «Ayaks»da orttirgan eng muhim tajribangiz...
- Jarayonni to‘liq boshqarish. Bunday tajribani «Gou Exed Iglz» yoki «Utrext»da to‘play olmaysiz, chunki ularda hammasi ancha tor doirada. «Ayaks» esa katta ma’lumotlar oqimiga ega. Faqat ularni to‘g‘ri qabul qilish va taqsimlash kerak. Amsterdam klubida vaqtni boshqarish ham juda muhim.
- Krishtianu Ronaldu kabi yulduzlar bilan qanday ishlashni bilasizmi?
- O‘ylaymanki, ha. Lekin o‘zligimni yo‘qotmasligim kerak. Demoqchimanki, murabbiylik qarashlarimni o‘zgartirmayman. Ha, har doim mavjud futbolchilar qanday o‘yin qurishingizni belgilab berishadi. Lekin talablarni aniqlash va qoidalar o‘rnatish mening ixtiyorimda. Qisqasi, aniq vazifalar topshiraman, agar kimdir talabga mos kelmasa, maqomidan qat’iy nazar, unga bor gap aytiladi. Bu borada hech kimga yon bermayman.
- «Ayaks» transferlarida sezilarli ovozga ega edingiz. «MYU»da ham shunday bo‘ladimi?
- Shubhasiz. Qanday ishlashimni aytib, oldindan talablar qo‘yaman. Agar ular bajarilmasa, taklifni qabul qilmayman. Yo‘q, jamoada yagona hukmdor bo‘lishni xohlamayman, faqat hamkorlik tarafdoriman. Asosiy shartlarimdan biri - transferlar bo‘yicha ovoz berish huquqi.
- Sovrinlar o‘z yo‘liga, sizdan «Ayaks»ga nima meros qoldi?
- Shubhasiz, ajoyib yillarni birga o‘tkazdik. O‘ylaymanki, «Ayaks» qo‘l ostimda har doim chiroyli futbolga intildi, shu go‘zallik ichida yashadi. Klubda g‘alaba qozonish mentaliteti bor. Murabbiy uchun taktika muhim, ammo mentalitet ham zarur, albatta. Ehtimol, ayni shu masalada katta ta’sirim qolayotgandir...
MUHAMMADXON tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
