Joriy mavsum boshida «Inter» tarkibiga qo‘shilgan Eden Jeko hamon o‘yinlarda «Roma» ramzi tushirilgan himoya qalqonidan foydalanmoqda.
Bu qanaqasi? Gap shundaki, bosniyalik goleador Rim jamoasiga 6 mavsum xizmat qilgan va bu vaqtda «bo‘rilar»ni chinakamiga sevib qolgan!
«Inter» Italiya kubogi finalida «Yuventus»ni 4:2 hisobida yengib, mavsum hisobidan ilk sovrinni rasmiylashtirdi. Milan jamoasi hujumchisi Edin Jeko hal qiluvchi bahsda gol urgani yo‘q, lekin hammadan ko‘proq quvondi, go‘yo. Har holda, final hushtagi chalinishi bilan maydonga yotib olgan bosniyalik ko‘pchilik e’tiborini o‘ziga qaratdi. Shuningdek, kameralar futbolchi ekipirovkasidagi bir qiziqarli belgini ham «ushladi» - qora getra oldida «Roma» ramzi tushirilgan himoya qalqoni. To‘g‘ri, qalqonda nima tasvirlangani aniq ko‘rinmaydi. Lekin 2021 yilning dekabr oyida «A» seriya doirasida o‘tkazilgan «Inter» - «Roma» o‘yini oldidan kiyinish xonasidan olingan kadrga qarasak, hammasi ravshan. Edinning himoya qalqonida aynan Rim klubi emblemasi bor! Darvoqe, o‘sha uchrashuvda bosniyalik hujumchi sobiq jamoasi darvozasiga gol urgan va «Inter» 3:0 hisobida g‘alaba qozongandi. Tushunarliki, Jeko o‘z golini nishonlagan emasdi.
Xo‘sh, Jekoning «Roma»ga muhabbati qayerdan? Hammasi oddiy: u Rim jamoasida 6 mavsum o‘ynadi. 6 yil - zamonaviy futbol uchun katta vaqt, albatta. Bu muddat davomida Jekoni muntazam ravishda boshqa klublarga «jo‘natishdi». Deylik, 2019 yiliyoq «Inter» safiga qo‘shilishiga ozgina qolgandi. O‘tgan mavsum esa bosniyalik hujumchi «Roma»ning sobiq bosh murabbiyi Paulo Fonseka bilan kelisholmay qoldi va yakunda xayrlashuv yuzaga keldi. Shunga qaramay, Eden jamoatchilik oldida har doim bir gapni qayta-qayta takrorlagan: «Rimda to‘la baxtiyorman». Mana, 2018 yilgi so‘zlaridan iqtibos: «Bu yerda o‘zimni qushdek yengil his qilyapman. Qolishga qaror qilganimning asosiy sababi shu - klubga muhabbatim. Qolaversa, turmush o‘rtog‘im va farzandlarim ham Rimda g‘oyat baxtlilar». 2020 yilda esa futbolchi «Roma»ga sevgisini yanada chiroyli tarzda bayon etdi. «Har bir o‘yin ta’sirida bu futbolka badanimga qattiqroq yopishmoqda. Hammasi «Roma» libosi terim bilan birlashmagunicha davom etadi!»
Edin Jeko - «Roma» tarixida yorqin iz qoldirgan futbolchi. U Rim jamoasi safida 260 marta maydonga tushib, 119ta gol urdi. Oddiy aytganda, bosniyalik hujumchi «bo‘rilar» tarixidagi eng yaxshi to‘purarlar ro‘yxatida 3-o‘rinni egallab turibdi. Yana bir fakt: yevrokuboklarda «Roma» uchun Jekochalik ko‘p gol urgan futbolchi yo‘q - u 2021 yilning mart oyida YELdan o‘rin olgan «Braga»ga qarshi bahsda afsonaviy Franchesko Totti ko‘rsatkichini yangilangan edi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
