Dortmund «Borussiya»sining norvegiyalik hujumchisi Erling Xolandning yangi mavsumni «Manchester Siti» tarkibida boshlashi futboldagi oilaviy sulolalar soni yana bittaga ko‘payganligidan dalolat beradi.
Ana shu yangilik munosabati bilan ota-bobolari an’analarini davom ettirayotgan futbolchilarni eslatib o‘tishni lozim topdik.
Chezare, Paolo va Daniel Maldinilar («Milan»)
Maldinilar avlodining uchinchi vakili «Milan» tarkibida skudetto sohibiga aylandi. Daniel ancha muddat asosiy tarkibda ko‘rinmadi, lekin «A» seriyadagi dastlabki golini nishonlashga ulgurgan. Uning bobosi Chezare va otasi Paolo - «Milan» afsonalari. Qizig‘i, o‘g‘ilning otadan o‘zib ketganiga aynan shu sulola misol bo‘la oladi. O‘rtancha Maldini - futbol tarixidagi afsona. Uni jamoadoshlari ham, raqiblari ham juda hurmat qilishgan. To‘g‘ri, don Chezare ham anoyi emas - YECHK va 4ta skudetto sohibi. Aytgancha, «Milan»da mashhur sulolaning to‘rtinchi vakili - Kristian ham to‘p surishga yaqin edi, ammo Paoloning to‘ng‘ich farzandiga buyuk jamoada debyutini nishonlash nasib etmadi. Uning 20 yoshli ukasi Daniel uchun esa, nurli cho‘qqilar hali oldinda.
Jan va Yuriy Jorkayefflar («PSJ»)
Boris Pasternakning mashhur romani qahramoni - Yuriy Jivago sharafiga uning nomi bilan atalgan xavbek futbol muxlislariga yaxshi tanish. Biroq uning otasi Jan ham fransuz futbolida o‘chmas iz qoldirgan. Himoya chizig‘ida to‘p surgan katta Jorkayeff «PSJ» va Fransiya termasi sardori bo‘lgan. Uning otasi qalmiq yigiti, onasi polshalik bo‘lishgan. Yuriy esa fransiyalik arman sifatida ulg‘aydi. Chunki onasi Mariya Oganyan edi. Ota-bola Jorkayefflar asosan «PSJ» sharafini himoya qilishgan. Lekin Jan o‘z vaqtida «Lion» va «Marsel» jamoalarida ham o‘ynagan, Yuriy esa Italiya, Germaniya, Angliya va hatto AQSHda ham to‘p surishga ulgurgandi. Jorkayefflar sulolasida uchinchi avlod vakili ham yo‘q emas, lekin Yuriyning 25 yoshli o‘g‘li Oan Shveysariyada o‘ynamoqda, «PSJ»ga kelgan emas.
Migel, Mikel va Xabi Alonsolar («Real Sosyedad»)
«Liverpul» va «Real»da talab darajasida to‘p surgan Xabidan farqli ravishda, akasi Mikel mashhurlikka erisholmadi. O‘z vaqtida Karpinning sobiq jamoasida to‘p surgan aka-ukalar keyinchalik Angliyaga ko‘chib o‘tishgandi. Faqat Migel «Bolton» va «Charlton»dan nariga o‘tolmagan va ukasidek maydon markazidan gol urolmagandi. Futbolga muhabbat ularga 80-yillarda «Real Sosyedad» va Ispaniya termasida to‘p surgan otalari Migeldan o‘tgandi. Keyinroq Migel «Barselona»ga o‘tib, San-Sebastyan klubidagi 2ta chempionlikni 3taga yetkazgandi. Biroq Xabi kabi Yevropada zafar qucholmadi.
Frenk va Frenk Lempardlar («Vest Xem»)
Nomdosh ota-o‘g‘ilning kichigi yangi asr muxlislariga «Chelsi» futbolchisi sifatida tanish bo‘lsada, u «Vest Xem» libosida ham 20 martaga yaqin o‘yin o‘tkazgan. Katta Frenk esa chinakamiga «bolg‘achilar» afsonasi. Londonliklar sharafini 670 uchrashuvda himoya qilgan. Bu klub tarixidagi ikkinchi ko‘rsatkich. U hatto Bobbi Murdan ham ko‘proq maydonga tushgan. Frenki esa afsonalar yonida ulg‘aydi. Oilasida faqat u APL chempionligiga, otasi esa Angliya kubogiga erishgan bo‘lsalarda, tug‘ma iqtidor o‘z so‘zini aytdi - afsonaning onasi bilan Xarri Rednappning rafiqasi egizak edilar. Darvoqe, Frenk va Jeymi Rednapp - xolavachchalar. Haqiqiy futbolchilar oilasi!
Mazinyo va Rafinya («Selta»)
Rio Olimpiadasi chempioni Braziliya termasini tanladi, ukasi Tyago Alkantara du Nasimentu esa Ispaniyani. Ularning otasi Iomar du Nasimentu 1994 yili AQSH mundialida g‘olib chiqqan, bungacha Yevropada Italiya va Ispaniya klublarida to‘p surgandi. Farzandlari «Barselona»da tahsil olgan bo‘lsalarda, o‘zi bu jamoada o‘ynagan emas. Oxir-oqibat, «Selta» aka-ukani birlashtirdi. Keyinchalik, Rafinya «PSJ»dan taklif oldi. Futbolchilar uchligini oila boshlig‘i - Valeriya Alkantara tarbiyalagan. U Braziliya voleybol termasi a’zosi, aka-uka futbolchilarning onasi. O‘ta cho‘rtkesar tabiatli xonim bolalik paytlaridayoq farzandlari professional sportchilar bo‘lishlarini e’lon qilgandi.
Danni va Deyli Blindlar («Ayaks»)
Deyli yaqinda YECHLdagi o‘yinlar soni bo‘yicha «Ayaks» rekordini o‘rnatdi. Yuragidagi muammolar tufayli faoliyatidan voz kechish xavfini boshdan kechirgan yigitcha uchun ajoyib ko‘rsatkich. Negadir amsterdamlik futbolchilarning salomatlik bobida omadi kelmayapti. Lekin «MYU»ga bevaqt o‘tganligi bois o‘z o‘rnini topolmagan kichik Blind qadrdon jamoasida faoliyatini davom ettirmoqda. Hozirgacha uning «Ayaks»dagi o‘yinlari yuzdan oshib ketdi, terma jamoadan ham tez-tez chorlov olmoqda. Bu borada u otasi Dannidan ikki baravar yaxshiroq natijaga ega. Katta Blind esa o‘z vaqtida KEK, UYEFA kubogi va YECHK turnirlarida g‘olib chiqib, o‘ziga xos «xet-trik» sohibi bo‘lgandi.
Karles va Serxio Busketslar («Barselona»)
Katta Busketsning saviyasi Serxionikidek yuksak emasdi. Shu sababli, u terma jamoa e’tiboridan ham chetda bo‘ldi. Lekin jonajon klubi uchun doimo sadoqatli o‘g‘lon sifatida xizmat qildi va ajoyib yarim himoyachini tarbiyalab berdi. Serxiodagi simulyasiyaga o‘chlik nufuziga salbiy ta’sir etishi aniq. Biroq raqib himoya qo‘rg‘onini vayron qilish bobida u sanoqli afsonalardan biri. Buskets - La Liganing 8 karra, YECHLning 3 karra g‘olibi, jahon va Yevropa chempioni. Qisqasi, buyuk yarim himoyachi!
Alf-Inge va Erling Xolandlar («Manchester Siti»)
Mino Rayola yorug‘ olamni tark etgach, Erling qanday shart-sharoitlar evaziga o‘tganligini tushunish qiyin bo‘lib qoldi. Aytishlaricha, 5 yilga mo‘ljallangan shartnomaga ko‘ra, hujumchi haftasiga 375 ming funt oladi. Ya’ni, Kevin de Bryuyne bilan bir xil miqdorda. Shuningdek, norvegiyalik hujumchi uchun «shaharliklar» 60-75 mln. yevro atrofida sarflaganliklari ma’lum qilindi. Katta Xoland «Lids»dagi faoliyatidan keyin ikki yil «Manchester Siti» safida to‘p surgandi. Roy Kin qasddan uning oyog‘ini sindirgani sababli, Alf-Inge faoliyatini to‘xtatishga majbur bo‘lgandi. Gvardiola kichik Xolandning «shaharliklar» tarkibidagi ishtiroki davomli va samarali bo‘lishiga shubha qilmayapti. Qolaversa, Erling anchayin baquvvat va dadil yigit, yangi muhitga moslashish mashaqqatini bemalol bartaraf eta oladi. Biz ham iqtidorli to‘purardan APLda ham Bundesligadagi sermahsullikni kutib qolamiz.
Manba: soccer.ru,
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
