«Liverpul» afsonasi Stiven Jerrard o‘tgan yilning noyabr oyida «Aston Villa» chorlovini qabul qilib, «Reynjers» bilan xayrlashdi. Undan Birmingem jamoasini APLda olib qolish talab etildi - Angliyadagi ish starti uchun yengilgina vazifa. Kutilganidek, Stivi Ji bu missiyani ortiqcha muammosiz bajardi.
Mana, Jerrard endi «Aston Villa»ni yangi mavsumga jiddiy hozirlamoqda. Deylik, klub rahbariyati yozgi transferlar bozorida 50 million yevrodan ko‘p sarflashga ulgurdi. «Liverpul» fanatlarining abadiy yoqimtoyi sanalgan murabbiy esa klub ichida bir qator jiddiy o‘zgarishlarga qo‘l urdi. Jumladan, jarima to‘lovlari tizimini yangiladi. Zero, «Aston Villa» o‘tgan mavsum APLda eng ko‘p sariq va qizil kartochka olgan jamoalardan biri bo‘ldi. Natijada Stiven tartib-intizom va jamoaviy ruhiyatni yaxshilash uchun kattagina jarima varaqasi shakllantirdi.
Jerrard amalga tatbiq etgan qoidalar majmuasida naq 20ta band bor. Ya’ni qanday qoidabuzarlik uchun qancha jarima to‘lanishi aniq ko‘rsatib qo‘yilgan. Ha, «Aston Villa» futbolchilari endi har bir qadamni tashlashdan oldin oqibatini o‘ylab ko‘rishlari kerak.
Stiven Jerrardning jarima tizimi
Mashg‘ulotga kechikish - 500 funt
Mashg‘ulotga GPS-trekersiz kelish - 100 funt
Mashg‘ulot payti maydonga kechikish - 1 daqiqa uchun 200 funt
Jamoaning o‘yinoldi uchrashuviga kechikish - 1000 funt
Murabbiy bilan uchrashuvga kechikish - 1 daqiqa uchun 200 funt
Jamoaviy yig‘ilishga kechikish - daqiqasiga 200 funt
O‘yin kuni noto‘g‘ri kiyinish (futbolchi sport formasi yoki polo kiyishi shart, shortisiz) - har bir libos uchun 100 funt
Oshxonada stol ustida idish qoldirish - har bir idish uchun 100 funt
Mashg‘ulotdan keyin maydonda forma qoldirish - har bir element uchun 100 funt
Avtomobilni noto‘g‘ri joyda qoldirish - 100 funt
Homiylar tadbirlariga kechikish - 250 funt
Tug‘ilgan kun bahona tort olib kelmaslik - kechikilgan 1 kun uchun 50 funt
Dushga oyoq kiyimisiz kirish - 100 funt
Jarohat yoki xastalik haqida klub shifokoriga ertalab soat 10:00gacha xabar bermaslik - 200 funt
Tiklanish muolajasiga kechikish - 200 funt
Snyus (tutunsiz tamaki) qoldig‘ini qoldirish - 200 funt
Tiklanish muolajasiga formasiz kelish - 50 funt
Keraksiz tortishuv - 200 funt
Bundan tashqari, 2ta band qalin harflarda yozilgan:
1. Rasmiy o‘yinda qizil kartochka olgan futbolchi naq 4 hafta davomida butun jamoaning ovqatlanish xarajatini o‘z zimmasiga oladi.
2. Odatiy ikki tomonlama mashg‘ulot o‘yinida g‘alaba qozonganlar raqib safida eng sust harakatlangan futbolchini aniqlab berishadi va u bir hafta davomida klub ichida alohida yozuv ilingan libosda yuradi: «Mashg‘ulot o‘yinida eng passivi bo‘lgandim».
«Arsenal»ga o‘tgan Aleksandr Zinchenkoning aytishicha, «Manchester Siti»da jarimalar tizimi sal boshqacha. Ya’ni ichki qoidani buzgan futbolchi jarima to‘lamaydi, aksincha, qandaydir yoqimsiz yumushni bajaradi. Qanday yumush? Barcha futbolchilar butsalarini tozalash, formalarni yuvishga ko‘maklashish, oshxonada ishlash, bolalar jamoasini shug‘ullantirish... Aybdor chekiga qanday yumush tushishi esa maxsus «ruletka» yordamida aniqlanadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
