0:3, «kambek», besh «qizil», polisiya aralashuvi, 4:4...
Yevropaning yetakchi klublari CHL, YEL va KLda navbatdagi hisob-kitobga kirishgan pallada uzoq Boliviyada kamtaringina milliy chempionat futbol olamiga oxirgi kunlarning eng dahshatli syujetini tortiq etdi.
U yerda «Pacheno klasiko» nomini olgan mamlakat miqyosidagi asosiy jang bo‘lib o‘tdi - «Strongest» va «Bolivar» o‘rtasidagi «La-Pas derbisi». O‘yin kutilganidan-da yorqin chiqdi, uzluksiz voqealar bir-biriga ulandi - 0:3dan keyin «kambek», mushtlashuv, polisiya aralashuvi, chiroyli gollar, 90-daqiqadan keyin 5ta «qizil» va yakuniy 4:4 hisobi... Keling, endi ma’lumotlar asosida boliviyacha futbol xronikasi bilan tanishib chiqamiz.
** Birinchidan, barchasi Lotin Amerikasiga xos an’anaviy tomosha bilan boshlandi - muxlislar tribunalarda bearmon fayer va feyerverklar yoqishdiki, butunlay sariq va qora tusga kirgan «Strongest» tribunalari qalin tutun ichida qoldi. Tabiiyki, mehmon jamoa - «Bolivar» muxlislari ham bo‘sh kelishgani yo‘q, to‘g‘ri, ular namoyish borasida kamtarroq bo‘ldilar.
** Birinchi bo‘lim oxiriga kelib «Strongest» 2:0 hisobida oldinga chiqib oldi. Mezbonlar avvaliga jarima zarbasi, keyin penaltidan unumli foydalanishdi. Jamoa tanaffusdan chiqishi bilan uchinchi golni ham urdi - Saul Torres chamasi 30 metr masofadan darvoza «to‘qqiz»ligini nishonga oldi.
** «Strongest» 3-golni nishonlashga berilgan pallada «Bolivar» darhol oldinga borib, birinchi javobni berdi - argentinalik 32 yoshli Pato Rodriges hisobni qisqartirdi. Xullas, 60-daqiqada hisob «Strongest» foydasiga 3:1 edi.
** Keyingi muhim voqea 87-daqiqaga to‘g‘ri keldi - «Bolivar» vakili Gabriel Vilyamil jamoasining ikkinchi golini urib, quvnoq va shiddatli yakunni ta’minladi.
** Oradan 3 daqiqa o‘tib, «Bolivar» sardori Sezar Martinsh muvozanatni tikladi - 3:3. Markaziy himoyachi bunda o‘zi ham to‘p bilan birga raqib darvozasiga kirib ketdi. Shu tariqa mehmonlar 3ta gol farqini yo‘qotdilar - chiroyli «kambek».
** E’tiborli tomoni, «Bolivar» shu bilan to‘xtagani yo‘q. 90}8-daqiqa: yana o‘sha Pato Rodriges jamoasining 4-goli muallifiga aylandi. Bu vaqtda «Strongest» muxlislariga qarab bo‘lmasdi. Ayrim ehtirosli fanatlar ko‘zga yosh olgancha stadiondan chiqib ketishga chog‘lanishdi. Mezbon jamoaning ba’zi futbolchilari esa shunchaki, maydonga bemajol yotib olishdi.
** Bu hali hammasi emas! «Bolivar»ning 4-golidan keyin futbolchilar o‘rtasida mushtlashuv yuzaga keldi. Natijada vaziyatga polisiya ham aralashdi va barchasi keskinlashib ketishi oldi olindi. Bosh hakam ham jim qarab turmadi - janjalga nisbatan hukm o‘laroq, 4 nafar futbolchiga qizil kartochka ko‘rsatdi. Aniqrog‘i, mezbonlardan ikki, mehmonlardan bir o‘yinchini maydondan chetlatdi va «Bolivar»ning zaxira darvozaboni ham o‘z «nasiba»sini oldi.
** Tabiiyki, hakam janjalga sarflangan vaqtni hisobga olib, o‘yinni davom ettirdi. Yakunda, 90}20 (!!!)-daqiqada «Strongest» penalti evaziga urilgan gol bilan o‘yinni qutqarib qoldi - 4:4.
** Final hushtagi yangrashidan oldin «Bolivar»dan yana bir futbolchi ikkinchi sariq kartochka tufayli maydondan chetlatildi. Gollar bo‘yicha - 4:4, qizil kartochkalar bo‘yicha - 2:3!
Eng qizig‘i, 4:4 hisobi har ikki jamoa zarariga ishladi. Chunonchi, yetakchilarning murosasiz «murosa»sidan foydalangan «Olveys Redi» turnir jadvalida gollar nisbatiga ko‘ra, 1-o‘ringa ko‘tarildi. 2-pog‘onada - «Strongest». Xullas, Boliviya chempionatida qo‘shhokimlik yuzaga keldi - «Olveys Redi» (ma’nosi - «Har doim tayyorman») va «Strongest» (ma’nosi - «Eng kuchli»).
«La-Pas derbisi» 95 yillik tarixga ega. 2014 yili «Strongest» va «Bolivar» o‘rtasidagi qarama-qarshilik dunyo futbolidagi eng prinsipial 25ta derbi ro‘yxatiga kiritilgandi. Qolaversa, bu safar ikki jamoa «olishuv»ga chempionat yetakchilari sifatida kirishdi va bu ham derbi ahamiyatini yanada oshirib yubordi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
