Uch yil avval «Atletiko» o‘zi uchun rekord bo‘lgan 127 mln. yevro evaziga «Benfika»dan Joau Felishni xarid qilgandi.
Uch yil avval «Atletiko» o‘zi uchun rekord bo‘lgan 127 mln. yevro evaziga «Benfika»dan Joau Felishni xarid qilgandi. Bu Neymar (222 mln.), Mbappe (180 mln.) va Koutinyo (135 mln.)lardan keyingi 4-qimmatbaho kelishuv. Endi Joau o‘ta nochor vaziyatga tushib qoldi.
Joriy mavsumda Felish qanday o‘ynamoqda?
Hozir hujumchi 4-mavsumni «matraschilar» libosida o‘tkazmoqda. Shu davr ichida Joau YECHL va ichki chempionatda muhim rol o‘ynagan uchrashuvlar ham bo‘ldi. Biroq hozir u boshlang‘ich tarkibdan chetda, o‘yin amaliyoti juda pasayib ketdi. Joriy mavsumda 12 marta maydonga tushgan bo‘lsada, birorta gol ura olmadi. Vaholanki, «Xetafe»ga qarshi start bellashuvida 3ta assistni amalga oshirib, muxlislarda sermahsul mavsumga umid uyg‘otgandi. Oradan ikki oy o‘tgan bo‘lsada, natija o‘zgarmadi.
Avvaliga Simeone portugaliyalik shogirdiga yetarli imkoniyat berayotgandi, ammo u ishonchni oqlay olmadi.
Oktyabrda Felish atigi 37 daqiqa to‘p surdi. Bosh murabbiy uni zaxirada qoldirib, «Sevilya»ga qarshi 3, «Bryugge»ga qarshi 10, «Jirona»ga qarshi 16, va «Atletik»ka qarshi 8 daqiqaga maydonga tushirdi. Ikki uchrashuvda Joau maydonga tushirilmadi. Birorta o‘yinda u ko‘proq o‘ynashga loyiq ekanligini isbotlay olmadi, oldingi chiziqdagi raqobatchilaridan ortda qolib ketdi. Xullas, murabbiyning qarorlari o‘rinli edi.
Qayd etilgan natijalar ham Felish foydasiga emas. Joriy mavsumda Morata 5ta, Grizmann 4ta, Korrea 3ta gol urdi, Joau esa hamon «quruq». Simeonedek «suvni ko‘rib etik yechadigan» mutaxassis uchun uni zaxirada qoldirishga ishonchli dalil. Murabbiy portugaliyalik shogirdidan sportchilarga xos badjahllikni, maydonga tushishga haqli ekanligini isbotlash uchun mashg‘ulotlarga zo‘r berishini kutgandi. Biroq Felish biron-bir intilishni namoyish etmadi. «Bryugge» bilan kechgan YECHLning 4-tur bellashuvida (0:0) murabbiy so‘nggi o‘yinchini almashtirgach, yana maydonga tushirilmagan Joau jahl bilan ichki libosini maydonga uloqtirdi. Portugaliyalik futbolchining bu bema’ni qilig‘i xususidagi kasbdoshimiz savoliga Simeone xotirjamlik bilan javob qaytardi: «Men hech narsani ko‘rganim yo‘q. Bu borada umuman gaplashishni istamayman».
Zaxiradan maydonga tushgan futbolchi qanday o‘ynashi lozimligiga Korrea ideal misol bo‘la oladi. U Felishga nisbatan ancha oz (596ga qarshi 420 daqiqa) vaqtni maydonda o‘tkazgan bo‘lsada, 3ta gol urishga ulgurdi. «Jirona» bilan bo‘lgan bellashuvda (2:1) Simeone Anxelni boshlang‘ich tarkibda o‘yinga tushirdi, shogirdi esa dubl bilan javob qaytardi.
«Anxel ko‘pincha zaxiradan maydonga tushadi, ammo doimo talab darajasida to‘p suradi. Maydon tashqarisidagi darg‘azablik alamini u o‘yindan oladi. Mana shu munosabati bilan jamoamizdagi yuksak talabga javob berishga intiladi», - degandi Simeone mamnunlik bilan.
Ko‘pchilik bu e’tirofni Felishga yo‘llangan da’vat sifatida qabul qilishdi. Portugaliyalik hujumchi zaxira o‘rindig‘ida Korrea bilan yonma-yon o‘tirsada, fe’l-atvori tamoman o‘zgacha. Maydonga u qandaydir g‘amgin kayfiyat bilan tushadi, hafsalasizlik bilan harakat qiladi va kutilgan o‘yinni ko‘rsata olmaydi. «Jirona»ga qarshi uchrashuvning so‘nggi daqiqalarida Korrea o‘rniga maydonga tushganida, «Atletiko» muxlislari uni hushtakbozlik bilan kutib olishgandi. Boisi, Joau jamoa o‘yinini kuchaytira olmayapti.
Ispaniyadagilar Felish haqida qanday fikrdalar?
«Felishning o‘yin vaqtiga nazar tashlasangiz, «Yo tavba, bu qanaqasi?» deya xitob qilgingiz keladi. Afsuski, Joauning hozirgi saviyasi klub talablariga mos kelmaydi. Agar sen maydonga kam tushayotgan bo‘lsang, es-hushingni yig‘ib olginda, kamchiliklaringni tuzatishga intil, murabbiy senga imkoniyat bermay, xato qilayotganiga ishontir. Felishda shunaqa intilish yo‘q. Agar uni sotib yuborish varianti ko‘rib chiqiladigan bo‘lsa, bu hujumchiga qaysi nodon katta mablag‘ ajratishi asosiy bosh og‘rig‘i bo‘ladi», - degandi ispaniyalik jurnalist Aris Gabilondo.
«Ehtimol, u hozirgi «Atletiko» tarkibidagi eng iqtidorli o‘yinchidir. Uni o‘z nomini klub tarixiga zarhal harflar bilan bita oladigan o‘yinchi sifatida xarid qilgan edilar. U esa zaxira o‘rindig‘ini isitishdan boshqasiga yaramayapti. Felish mavsumni o‘ta muvaffaqiyatli boshlagandi. Biroq keyin batamom aynidi. Hujumchi jiddiy muammolar changalida. Bu nafaqat sport jihatlari, balki ruhiyatiga ham taalluqli. «Atletiko» Felishni xarid qilganida, Simeone «Grizmanning yangi nusxasi»ni ko‘rishdan umidvor bo‘lgandi. Har bir futbolchi - o‘zgacha olam. Joauga nimadir bo‘ldi. O‘ta iqtidorli va nostandart o‘yinchi Madriddagi salkam 4 yil davomida o‘z salohiyatini yuzaga chiqara olmayapti. Ayrim yorqin harakatlari tufayli, unga porloq kelajakni bashorat qilishgandi. Ammo u Grizmann emasligi aniq. Fe’l-atvori ham, o‘ynash qobiliyati ham o‘zgacha. Felishning Simeonedan doimiy noroziligi futbolchi bilan murabbiy o‘rtasidagi qizg‘in bahslarga sabab bo‘lmoqda», - deb yozdi Mundo Deportivo nashri.
«Atletiko»ni Diyego Simeonesiz tasavvur qilishning iloji yo‘q. Ha, o‘yin jihatidan olganda, «matraschilar» o‘ta jozibador jamoa emas. Ammo natijaga erisha oladi. Uni nafaqat Ispaniya, balki dunyoning boshqa mamlakatlarida ham hurmat qilishadi. Felishning muammosi shundaki, raqobatchilar o‘ta kuchli o‘yinchilar. Bundan tashqari, Joau faqat o‘zini o‘ylaydi», - dedi ispaniyalik yana bir kasbdoshimiz Migel Martin Talavera.
Endi nufuzli AS ning yuzaga kelgan vaziyatga bergan bahosi bilan tanishing: «7 sentyabrda YECHL doirasidagi «Portu»ga qarshi bellashuvda Simeone Felishni alishtirganda, muxlislar bu voqeani hushtakbozlik bilan kutib oldilar. Oradan bir oydan ko‘proq vaqt o‘tgach, hujumchi maydonda ko‘rinmay qoldi, bunda murabbiyning aybi yo‘q. Ochig‘i, Joau jamoaning 5-hujumchisiga aylandi. Vaholanki, mavsum startida buni tasavvur qilib bo‘lmasdi. Hujumchi hamon talab darajasida o‘ynay olmayapti.
Klub ham ikki o‘t orasida. Simeone ulkan vakolatlarga ega bo‘lgan taniqli mutaxassis. Haqiqat shuki, Felishning nufuzi tobora pasayib bormoqda. Murabbiy bilan yetakchi o‘yinchilardan biri o‘rtasidagi kelishmovchilik hech kimni qiziqtirmaydi. Aftidan, hozir va JCH tufayli yuzaga keladigan tanaffusgacha muammoga oydinlik kiritish lozim. Felish vaziyatni ijobiy tomonga o‘zgartiradi yoki jamoani tark etadi».
Ravshan IBROHIM tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
