Xabaringiz bor, tajribali darvozabon Xurshid Xo‘jayev Turkiyadagi o‘quv-mashg‘ulot yig‘ini oldidan “Navbahor” bilan shartnoma imzoladi. Shundan so‘ng, futbolchi klub matbuot xizmati uchun qisqacha intervyu berdi. Quyida mazkur suhbatni e’tiboringizga havola etamiz.
— Xurshid, avvalo “Navbahor”ga xush kelibsiz? Jamoamiz safiga qo‘shilishingiz qay tarzda yuz berdi?
— Assalomu alaykum. Tabrik uchun rahmat. Meni “Navbahor”ga jamoa bosh murabbiyi Samvel Vyacheslavovich Babayan va darvozabonlar murabbiyi Anton Mayeranov taklif qilishdi. “Navbahor”da oldin ham o‘ynaganim, jamoa menga begona bo‘lmaganligi bois, ushbu taklifni ikkilanmay qabul qildim. Bundan tashqari, yangi mavsumda “Navbahor”ning ambisiyalari yuqori. Jamoa o‘tgan yili chempionlik, shuningdek, O‘zbekiston kubogini qo‘lga kiritish uchun kurashdi va Osiyo Chempionlar Ligasi yo‘llanmasini qo‘lga kiritdi.
Bo‘lajak mavsumda ham “Navbahor”ning o‘z oldiga yuksak maqsadlar qo‘yganligi jamoaga o‘tishimga sabab bo‘ldi.
— “Navbahor”da O‘tkir Yusupov asosiy darvozabon hisoblanadi. Shuningdek, u O‘zbekiston terma jamoasi posboni ham sanaladi. Yusupov bilan raqobatlashishdan cho‘chimaysizmi?
— Albatta, O‘tkir Yusupovning tajribali darvozabon ekanligiga shubham yo‘q. U yurtimizning eng kuchli posbonlaridan biri ekanligini o‘tgan mavsumda milliy terma jamoamiz va “Navbahor”dagi o‘yinlari orqali isbotladi.
Albatta, har bir futbolchi maydonga tushishni xohlaydi. Lekin men uchun asosiysi, jamoa g‘alabasi. Vaqti kelib, holat shuni talab qilsa, zarurat tug‘ilsa, jamoaga yordam berishga tayyorman.
Raqobat borasida to‘xtaladigan bo‘lsam, Allohga tavakkal qilish kerak. Oldin faoliyat yuritgan klublarimda ham mendan kuchli darvozabonlar bo‘lgan. Biroq futbolda har xil holatlar yuz berib turadi. O‘tkir ayni paytda O‘zbekistonning eng kuchli golkiperi hisoblanadi.
— Jamoamiz muxlislariga qanday tilaklaringiz bor?
— “Navbahor”da 2014— 2015 yillar faoliyat yuritganligim bois, jamoa muxlislarini juda yaxshi bilaman.
Bo‘lajak mavsumda “Navbahor” ishqibozlarini xursand qilish, ularga yorqin g‘alabalar tortiq etish niyatidamiz.
Bizning ma’lumot
Xurshid Xo‘jayev – 1988 yil, 14 fevralda Qo‘qon shahrida tug‘ilgan.
Futbol bilan 10 yoshidan shug‘ullanishni boshlagan.
Birinchi murabbiylari: Narimon Asanov va Rifat Hasanov.
Ampluasi: darvozabon.
Qo‘qondagi futbol maktab— internatini tamomlagan.
Futbolchilik faoliyati: “Neftchi” (Farg‘ona, 2012— 2013 yillar), “Navbahor” (Namangan, 2014— 2015 yillar), “Andijon” (Andijon, 2016, 2022 yillar), AGMK (Olmaliq, 2017— 2018 yillar), “Buxoro” (Buxoro, 2019 yil), “Istiqlol” (Farg‘ona, 2020 yil), “Qo‘qon— 1912” (Qo‘qon, 2021 yil).
2023 yildan “Navbahor”da.
Oilali. Uch farzandning otasi.
“Navbahor” PFK matbuot xizmati.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
