Bir oydan ko‘proq vaqt oldin Qatarda jahon chempionati yakunlandi. Ushbu turnir kelajakda top-klublarga borishi kerak bo‘lgan ko‘plab futbolchilarni ko‘rsatib berdi. Hozircha bu ishni atigi yetti nafar futbolchi amalga oshirdi, ularning ba’zilari faoliyatida yangi davrni boshladi. Keling, ularni yana bir bor eslab o‘tamiz.
Kodi Gakpo, PSVdan “Liverpul”ga 42 million yevroga
23 yoshli hujumchi JCH-2022 guruh bosqichida uchta gol urdi. Gakpo Senegal, Ekvador va Qatar darvozabonlarini ranjitdi. AQSH va Argentina bilan pley-off o‘yinlariga kelsak, hujumchi e’tibordan chetda qoldi. Kodi "Liverpul" bilan besh yarim yillik shartnoma imzoladi, u allaqachon klub uchun to‘rtta o‘yin o‘tkazdi, ammo hali gol urmadi.
Joau Feliks, “Atletiko” “Chelsi”ga 11 million yevro evaziga ijaraga berildi
Portugaliyalikni JCH-2022 qahramoni deyish qiyin, lekin u Gana darvozasiga gol urdi, Shveysariya bilan o‘yinda esa ikkita assistentni amalga oshirdi. "Chelsi" hujumchini o‘z safiga chorladi va oylik to‘lovlar bo‘yicha tarixdagi eng qimmat ijara shartnomasini tuzdi. Londonliklar har oy Feliks uchun 1,9 million yevro sarflaydi. Joau “Chelsi” safida “Fulxem”ga qarshi o‘yinda debyut qildi va 58-daqiqada to‘g‘ridan-to‘g‘ri qizil kartochka oldi. Qoidabuzarlik tufayli yangi kelgan futbolchi Premyer-ligadagi uchta o‘yinni o‘tkazib yuboradi.
Metyu Rayan, “Kopengagen”dan “AZ Alkmaar”ga 500 ming yevroga
2022 yilgi jahon chempionatida avstraliyalik darvozabon to‘rtta o‘yinda oltita gol o‘tkazib yubordi, ammo Tunis va Daniya bilan bahslarda o‘z darvozasi daxlsizligini saqlab qoldi. 2022/2023-yilgi mavsumning birinchi qismida Metyu Rayan “Kopengagen” safida 11 o‘yin o‘tkazdi va besh marta darvozani daxlsiz qoldirdi. 30 yoshli futbolchi allaqachon “AZ Alkmar” safida debyut qilgan.
Gilermo Ochoa, “Amerika”dan “Salernitana”ga erkin agent sifatida
37 yoshli meksikalik darvozabon Polsha termasi bilan o‘yinda o‘z darvozasi daxlsizligini saqlab qoldi, Robert Levandovski penaltisini qaytyardi va jamoasiga Saudiya Arabistonini mag‘lub etishga yordam berdi. Gilermo Ochoa “Salernitana” bilan joriy mavsum oxirigacha shartnoma imzoladi. U klub safida to‘rtta o‘yin o‘tkazib, 13ta gol o‘tkazib yuborgan, shundan sakkiztasi "Atalanta"dan. Shu bilan birga, “Salernitana” uchun debyut o‘yinida meksikalik to‘qqizta seyv amalga oshirdi, ammo "Milan" baribir g‘alaba qozondi (2:1).
Vinsent Abubakar, “An-Nasr”dan “Beshiktosh”ga erkin agent sifatida
Kamerunlik hujumchi Serbiyaga qarshi o‘yinda zaxiradan maydonga tushganidan so‘ng 1+1 natijani qayd etdi va Braziliya darvozasiga g‘alaba to‘pini kiritdi. Ammo bu Kamerunning 1/8 finalga chiqishi uchun yetarli bo‘lmadi. Krishtianu Ronaldu kelganidan keyin Vinsent Abubakar "An-Nasr"dan chetlatildi. “Men har doim Messini Ronaldudan yaxshiroq deb o‘ylardim va Krishtianu bilan mashg‘ulot o‘tkazganimdan so‘ng men haq ekanligimni angladim”, - degan edi Abubakar. 31 yoshli hujumchi “Beshiktosh” bilan 2025 yilning yoziga qadar shartnoma imzoladi.
Mislav Orsich, “Dinamo Zagreb”dan “Sautgempton”ga 5,75 million yevroga
30 yoshli chap qanot himoyachisi hozirda faoliyatining cho‘qqisida. Mislav Orsich JCH-2022da Kanada terma jamoasi bilan bahsda to‘rt daqiqa o‘ynadi va golli uzatmani amalga oshirdi. Yarim himoyachi Braziliya bilan o‘yinda ham 6 daqiqa maydonga tushib golli uzatmani amalga oshirdi. Uchinchi o‘rin uchun kechgan bahsda Mislav Orshich Marokashga (2:1) g‘alaba to‘pini kiritdi. Joriy mavsumda u Zagrebning “Dinamo” jamoasi safida 29 ta o‘yin o‘tkazib, 13 ta gol urdi va 8 ta golli uzatmani amalga oshirdi. Xorvatiyalik futbolchi “Sautgempton” bilan ikki yarim yillik shartnoma imzoladi va klub uchun dastlabki ikki o‘yinda gol ura olmadi.
Vout Vegxorst, “Byornli”dan “Manchester Yunayted”ga ijaraga berildi
30 yoshli forvard JCH-2022'da dastlabki to‘rtta o‘yinda 20 daqiqa maydonga tushdi, biroq Argentina termasi bilan 78-daqiqada maydonga tushib, o‘yin oxirida ikkita gol urdi. Vegxorst 2022/2023 yilgi mavsumning birinchi qismini "Beshiktosh"da o‘tkazdi va u yerda barcha musobaqalarda 18 ta uchrashuvda 9 ta gol urdi. Uning “Manchester Yunayted”dagi ijarasi mavsum oxirigacha amal qiladi. Hujumchi "Nottingem Forest"ga qarshi Liga kubogida debyut golini urishga ham ulgurdi.