Roberto De Zerbi boshqaruvidagi «Brayton» o‘z tarixida ilk bora YEL yo‘llanmasini qo‘lga kiritdi.
Italiyalik murabbiy doimo xayolparast inson bo‘lgan. «Sassuolo»ga ustozlik qilgan davrida to‘shagi yaqinidan bloknot va ruchka arimasdi. Hatto uyqusida ham futbolni o‘ylar, qiziqarli g‘oya paydo bo‘lsa, darrov yozib qo‘yardi. Albatta, vaqt o‘tishi va to‘plangan tajriba ta’sirida munosabat o‘zgaradi, uslub takomillashib boradi. Biroq Roberto hanuzgacha xayolparastlik xislatidan mosuvo bo‘lgan emas.
«Jamoam doimo ishtiyoq va izzattalablik bilan to‘p surishini, o‘yinning bosh qahramoni sifatida orzu sari intilishini istayman», - degandi murabbiy o‘z intervyularidan birida. De Zerbi «Brayton»ining shiddatli parvozi 2022G‘23 yillar mavsumidagi bosh mavzularning biri bo‘ldi. Statistik ma’lumotlarda «Siti»ning chempionligiyu APLni tark etadigan 3 klub sovuqqonlik bilan qayd etilgan. Biroq chempionatni diqqat bilan kuzatgan ashaddiy muxlislarga «Brayton» olam,olam zavq ulashdi. 8 oylik faoliyatida De Zerbi jamoani tarixiy cho‘qqiga olib chiqdi - «chaykalar» YEL ishtirokchisiga aylanishdi.
Natija sari yo‘l
Ildam harakatlarga odatlangan De Zerbi startni o‘ta vazminlik bilan o‘tkazdi. Uning «Brayton»dagi faoliyati 2 durang va 3 mag‘lubiyat bilan boshlandi. Keyin jamoa «Chelsi»ni 4:1 hisobida mahv etdi, Robertoning uslubi bo‘y ko‘rsata boshladi. «MYU», «Liverpul» kabi grandlar mag‘lubiyatlarini tan oldilar, yirik hisobda (0:3) imkoniyatni boy bergan «Arsenal» chempionlikdan umidini uzdi. Keyin «Brayton» g‘oliblikni rasmiylashtirgan «Siti» bilan durangga imzo chekdi, hatto YECHL yo‘llanmasiga da’vogarlik qildi.
De Zerbi yetakchiligidagi janubliklar mavsum davomida raqib jamoalar murabbiylarining eksak e’tirofiga sazovor bo‘ldi. Mart oyida Gvardiola Robertoni ingliz futbolining islohotchisi va ajoyib uslub sohibi ekanligini tan olgandi. Aprelning oxirida Lopetegi «Brayton» jahon futbolida eng saviyali o‘yinni namoyish etayotganligini e’tirof etgan, 2 kundan keyin «chaykalar» «Vulverxempton»ni 6 marta o‘z darvozasidan to‘p olib chiqishga majbur etishgandi. Hayratini yashira olmagan Yurgen Klopp mazkur bahsni o‘z faoliyatidagi eng mazmunli o‘yinlardan biri ekanligini ta’kidladi, «Brentford» ustozi Tomas Frank esa Roberto ijodiga a’lo baho bergandi. Eng qizig‘i, Mikel Arteta ham aynan 0:3 hisobidagi mag‘lubiyatni qabul qilish arafasida «Brayton»ning shaydosi bo‘lib qolganligini tan olgandi. Italiyalik mutaxassis barcha maqtovlarni o‘ta kamtarinlik bilan qabul qiladi: «Uslubimizni muhokama qilish chog‘ida mutaxassislar meni nazarda tutmaydilar. Men maydonda to‘p surmayman. Ular ajoyib shogirdlarimni maqtaydilar. O‘zim futbolchi bo‘lganim bois, maqtovlarni shogirdlarim xizmatlariga berilgan munosib baho, deb bilaman».
Murabbiylik yo‘li
De Zerbining futbolchilik davri kamtarona o‘tdi. 15 yillik faoliyatida u Italiyaning 10ta jamoasida ishladi, Ruminiyada omadini sinab ko‘rdi. 2013 yilda «D» seriyasi vakili «Darfo Boario»ni qabul qildi. Keyin «S» seriyasida «Fodja»ni boshqarib, 2016 yil sentyabrida «A» seriyasidagi «Palermo»dan taklif oldi. Biroq 13ta o‘yindan keyin jamoani tark etdi. Keyinchalik Roberto elitadan joy olish uchun yagona imkoniyat, deb o‘ylagani va juda barvaqt uringanligini tan oldi. «Benevento»da bosiqlik bilan ishlagan bo‘lsada, jamoani «V» seriyaga tushib ketishdan qutqara olmadi. Lekin hujumkor uslub murabbiyi maqomiga ega bo‘ldi. 2018 yilda u «Sassuolo»dan chorlov oldi. Kevin-Prins Boateng bunga quyidagicha munosabat bildirdi: «Men u bilan hamkorlik qilishni istagandim. Menimcha, De Zerbi o‘yinni his etish bobida tengsiz mutaxassis. Hamma uni maqtaydi, bu yaxshi emas. Meni 50 kishi maqtasa, boshqa 50 nafari salbiy baho beradi».
«Sassuolo»dagi 3 mavsum davomida Roberto 4x2x3x1 va 4x3x3 sxemalaridan foydalangan holda hujumkorlikka zo‘r berdi, 2- va 3-mavsumlarni jamoa 8-o‘rinda yakunladi. 2021 yilda murabbiy Doneskning «Shaxtyor» klubiga keldi va o‘tgan yilning yoziga qadar ishladi. Qizig‘i, iyul oyida u Sinisha Mixaylovichga bo‘lgan hurmati tufayli «Bolonya» taklifini rad etdi. Leykemiya xastaligi bilan kurashayotgan Sinisha sentyabrda «Bolonya»ni, dekabrda yorug‘ dunyoni tark etdi. De Zerbi esa muayyan rejalarsiz «Brayton» taklifiga rozilik bildirdi.
Har jabhada ehtiros muhim
Ehtiros? Agar siz futbolda ehtirossiz ishlasangiz, hech narsaga erisha olmaysiz. Muxlislar hammasini yaxshi tushunishadi, qanchalik ehtirosli ekanligingizni 1-2 o‘yinda bilib oladilar. De Zerbining hissiyotlari ba’zan chegaradan chiqib ketadi. So‘nggi mavsumda u 2ta qizil va 4ta sariq kartochkalar bilan jazolandi. Buni murabbiy risoladagidek ko‘rsatkich, deb hisoblaydi: «O‘tgan mavsumda bundan ham yomonroq bo‘lgandi. Hozir ancha bosiq bo‘lib qoldim. Huda-behudaga kuyunavermaslik kerakligini tushunib turgan holda, ba’zan asablarimni jilovlay olmay qolaman».
Murabbiyning o‘yinlardan keyin yoki tanaffuslar paytida kiyinish xonasidagi ehtirosli nutqlari tez-tez OAV mulkiga aylanib turadi. Ularni alohida sitatalar yoki jo‘shqin motivasiya roliklari shaklida uzatish mumkin. Roberto jamoasi Angliya Kubogi turniri chorak finalida «Grimsbi»dan 1:0 hisobidagi ustunlik bilan tanaffusga yo‘l olgandi. Quyi liga vakili ustidan qayd etilayotgan minimal ustunlik murabbiyni qoniqtirmagan, u o‘z shogirdlaridan 5 yoki 6ta gol kutgandi. O‘sha o‘yin 5:0 hisobida yakunlandi. Robertoning jo‘shqin nutqi ta’sirida, albatta. Endi Denni Uelbekning e’tirofi bilan tanishing: «Birinchi kundayoq u futbolga bo‘lgan ishtiyoqi va malakasi bilan lol qoldirgandi. Biron-bir harakat, hatto ikir,chikirlar ham murabbiy e’tiboridan chetda qolmaydi. U juda ko‘p o‘yinchilarning mahoratini oshirdi. Barcha shogirdlariga o‘yin amaliyotini berib, iqtidorini namoyish etishni talab qiladi».
Yuksak baho
Darhaqiqat, De Zerbini hamma maqtaydi, hurmat qiladi - o‘yinchilar, murabbiylar, ekspertlar va muxlislar ham, albatta. Italiyalik mutaxassis bunday hurmatga faqat bitta yo‘l - halollik orqali erishish mumkin, deb hisoblaydi: «Men har doim o‘zligingni saqlab qolish kerakligiga ishonaman, doimo halol va tushunarli bo‘lishga intilaman. Har qanday vaziyatda, g‘alabada ham, mag‘lubiyatda ham shu qoidaga amal qilishga intilaman».
259ta o‘yinda 103ta gol urgan «Brayton» afsonasi Glenn Myurrey shunday degandi: «Undagi o‘zini ayamaslik xislati, kuch,quvvat va jamoa o‘z murabbiyida ko‘rishni orzu qilgan barcha fazilatlarni ko‘rgach, menda uning jamoasida to‘p surish istagi paydo bo‘ldi. Jamoaning uslubi o‘ta ta’sirchan, hujumchi uchun keng imkoniyatlarni yaratadi. Bunday jamoada to‘p surish juda yoqimli».
Uelbekning qo‘shimchasi: «Unga qadar biz malakali murabbiy rahbarligida o‘ynagan bo‘lsakda, Roberto ulkan o‘zgarishlarni amalga oshirdi. Maydonda siz uning ishlaridan 20 foiziga guvoh bo‘lishingiz mumkin. Murabbiyning barcha jabhalarda hissasi bor. Maydonda u bilan sinxron ravishda harakat qilishimiz shart. U xatoga yo‘l qo‘yishimizni istamaydi, lekin xato qilsak, kechiradi. Xatoliklardan hech kim kafolatlangan emas. Bizda har bir o‘yinchi o‘z vazifasini biladi, murabbiy ajoyib uslubni yaratgan, ammo mukammallik hali oldinda. Mashg‘ulotlarda uslubni me’yoriga yetkazish ustida ishlayapmiz».
De Zerbi maksimalizm tarafdori va imkoniyatlarga xolisona baho beradi. Jamoa yevrokuboklar hududiga chiqa olishiga ishonch hosil qildi va YEL qo‘llanmasini qo‘lga kiritdi. Oldinda Roberto De Zerbi va «Brayton»ni yangi cho‘qqilar kutmoqda. Murabbiy bu borada o‘ziga xos kamtarlik bilan shunday dedi: «Mukammallik yo‘q emas, qayerdadir mavjud. Biz unga yaqinlashmog‘imiz lozim. Maqsadim shuki, jamoam men ketganimdan keyin yanada yuqoriroq saviyada to‘p surganini ko‘rish».
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
