So‘nggi o‘n yilliklar ichida Neymar, Ronaldinyo va Rivaldo singari afsonalar Yevropada yuksak saviyaga erishishlaridan avval Braziliyaning oliy divizionida nom qozongan edilar.
Xorijlik kasbdoshlarimiz «Transfermarkt» ma’lumotlari orasidan hozirda «pentekampeonlar»ning ichki chempionatida to‘p suradigan 10 nafar eng sara iqtidor sohiblarini tanlab olishdi. Ularni e’tiboringizga havola etishni lozim topdik.
10. Jerson - 13 mln. yevro
Bu futbolchi «Roma» va «Marsel»dagi faoliyatidan keyin o‘tgan yilning dekabrida Yevropadan vataniga qaytib, «Flamengo» tarkibidan joy oldi. 26 yoshli yarim himoyachi asosan maydon markazida to‘p surishiga qaramasdan, 17ta gol urdi.
7-9. Rafael Veyga - 13,7 mln. yevro
«Palmeyras»nining chempionlikni o‘ziniki qilishida Veyga hal qiluvchi rol o‘ynadi. Hujumkor yarim himoyachi ichki chempionat doirasida 5ta gol va 8ta samarali uzatmani rasmiylashtirdi. Umuman, 2017 yilda «Palmeyras» safidan o‘rin olgan Rafael ayni pallada 113ta golning muallifi sifatida Abel Ferreyra jamoasining muhim ijrochilaridan biriga aylangan. Tabiiyki, ligada ham Rafael eng sara futbolchilar qatorida.
7-9. Yuriy Alberto - 13,7 mln. yevro
Ma’lumotlarga binoan, yozda «Vest Xem» Albertoning xaridi borasida «Korintians» bilan muzokara olib borgan, biroq yakunda tomonlar bir to‘xtamga kela olishmagan. Vaholanki, uning Braziliyadagi sermahsul o‘yinlari kuchli taassurot qoldirgan va «bolg‘achilar» qiziqishlari bejiz emasdi. 22 yoshli hujumchi joriy mavsumda ham o‘z jamoasiga 15ta gol tuhfa etdi, uzoq muddatli kelajagi esa hanuzgacha mavhum bo‘lib qolmoqda.
7-9. Jorjian de Arrasketa - 13,7 mln. yevro
Urugvaylik hujumkor yarim himoyachi esa «Flamengo»dagi sermahsul faoliyatini davom ettirmoqda. U 2019 yildan beri 230ta o‘yinda maydonga tushib, 139ta gol urdi. Markaz o‘yinchisi uchun risoladagidek ko‘rsatkich.
6. Gabriel Barboza - 14,6 mln. yevro
Barboza Braziliya «A» seriyasi tarixidagi eng sermahsul o‘yinchilardan biri hisoblanadi. «Santos» va «Flamengo» jamoalari tarkibidagi 319ta uchrashuvda Gabriel 188ta gol urgandi. Uning Yevropaga avvalgi tashrifida Milanning «Inter»idagi omadsizlik bilan yakunlangan bo‘lsada, 27 yoshli snayperdan umidvor bo‘lgan top-klublar yo‘q emas. Jumladan, amaldagi shartnomasi 2024 yilda nihoyasiga yetadigan hujumchi «MYU»ning nishonida.
5. Pedro - 18,9 mln. yevro
Joriy mavsumda 35ta gol urib, faoliyatidagi rekord natijani qayd etgan Pedro shu kunlarda amaldagi shartnoma muddatini 2027 yilgacha uzaytirgani «Flamengo» muxlislari uchun qo‘shaloq yangi yil sovg‘asi bo‘ldi. Muxlislar yana kamida 3 yil 26 yoshli hujumchining sermahsul va sermazmun o‘yinlaridan zavq olish imkoniyatiga ega bo‘lishdi.
4. Markos Leonardo - 21,5 mln. yevro
Bu futbolchining «Santos» tarkibidagi shiddatli taraqqiyotiga qoyil qolmaslikning iloji yo‘q. Endi 20 yoshga chiqqan hujumchi hozirga qadar 50ta golni o‘z hisobiga yozib qo‘ydi va albatta Yevropaning nomdor jamoalari e’tiborini o‘ziga jalb etdi. Lekin u o‘ziga biroz kamtarroq jamoa - «Benfika»ni tanladi. Vaholanki, unga «Arsenal», «MYU», «Vest Xem» va «Nyukasl» kabi APL grandlari ham qiziqish bildirishgandi.
3. Andre - 21,7 mln. yevro
Braziliyalik iqtidorli yarim himoyachi anchadan beri Yevropa grandlarining nishonida turibdi. «Fluminense» safida 164 marta maydonga tushgan 22 yoshli futbolchi milliy terma jamoaning doimiy a’zolaridan biri. Uni shu paytgacha «Liverpul» xarid qilish niyatida. Endi «MYU», «Arsenal» va «Tottenxem» ham «Flu» yulduziga qiziqib qolishdi. Andrening transfer bahosi nisbatan qimmat emas. Lekin Braziliyadan olib kelish birmuncha ko‘proq mablag‘ni talab etishi mumkin. Chunki uning shartnomasi 2026 yilgacha mo‘ljallangan.
2. Vitor Roke - 34,4 mln. yevro
«Atletiko Paranaense»ning o‘smir sensasiyasi barcha musobaqalarda 28ta gol urib, hammani lol qoldirdi. Aftidan, bu faqat boshlanishi, xolos. «Barselona» yozda imzolagan kelishuvga ko‘ra, 18 yoshli futbolchi yaqinda Kataloniya grandi tarkibidan joy oldi. Endi El-Klasikoni tomosha qilish yanada qiziqarli ko‘rinish oladi - Rokening «Barsa»si Endrikning «Real»iga qarshi!
1. Endrik - 38,7 mln. yevro
17 yoshli noyob iqtidor sohibi shu yil «Real» tarkibidan joy oladi. 2022 yilda «Palmeyras»da debyutini nishonlagan hujumchining yuksak salohiyati o‘ta qisqa vaqt ichida uni butun futbol olamiga tanitdi. Endi navbat - «Santyago Bernabeu» muxlislari ko‘nglini rom etishga!
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
