«Al-Ayn» OCHL-2023/2024da misli ko‘rilmagan muvaffaqiyatga erishdi: BAA klubi yakuniy g‘alaba yo‘lida har bir o‘yinda qattiq kurashdi, borini berdi.
OCHL kubogi esa jamoaga kelasi yili AQSHda tashkillashtiriladigan Mundial de Clubes FIFA 25 (Klublar o‘rtasidagi JCH-2025)da OFK nomidan to‘rtinchi ishtirokchi sifatida qatnashish huquqini berdi. 11 may kuni finalning birinchi seriyasida Yaponiyaning «Yokogama-F. Marinos» klubiga 1:2 hisobida yutqazgan «Al-Ayn» javob o‘yinida xuddi oldingi raundlardagidek maydonda shunchaki, «yondi». Hisob ham shunga yarasha - 5:1! BAA klubi vingeri Sofiyan Rahimiy esa 13ta gol bilan OCHLning bosh to‘purari va turnirning eng yaxshi futbolchisiga atalgan mukofotlarni qabul qilib oldi. Marokashlik yigit o‘z gollaridan naq 6tasini ikki gigant - «Al-Hilol» va «Al-Nasr» darvozalariga urganiga e’tibor qaratsak, uning saviyasi ancha baland ekanligi shundoq oydinlashadi. E’tiborli nuqta: 27 yoshli hujumkor futbolchi yakuniy final o‘yinidan oldin FIFA rasmiy saytiga bergan intervyusida ham katta ishonch bilan gapirgan edi. Garchi kechroq bo‘lsa-da, OCHL-2023/2024 bosh qahramonining fikr-mulohazalarini havola etishni lozim topdik.
- Mana, «Al-Ayn»ni Klublar o‘rtasidagi JCH-2025dan atigi 1ta o‘yin ajratib turibdi. Shunday istiqbol ham sizlarga qo‘shimcha motivasiya berayotgandir...
- Albatta, axir hozir chempionlik rutbasidan bir qadam narida turibmiz. Klublar mundiali yo‘llanmasi esa, chindan ham, katta rag‘bat hisoblanadi. OCHLdagi yakuniy g‘alaba jamoamizga kelasi yil jahon arenasiga chiqish imkonini berar ekan, ikki hissa ishtiyoq bilan o‘ynashimiz tayin. Har holda, Klublar o‘rtasidagi jahon chempionati - katta doira! Har bir jamoa bunday yirik forum sarguzashtini boshdan kechirishni xohlaydi. Umidimiz faqat Allohdan: O‘zi bizga madad beradi va yakunda katta turnirga borish huquqini qo‘lga kiritamiz.
- Klublar o‘rtasidagi mundialning yangilangan formati haqida qanday fikrdasiz? Uning muvaffaqiyatli chiqishiga ishonsak bo‘ladimi?
- Ha, har holda, avvalgisidan butkul farqlanadigan format qabul qilindi. Bunga qadar turnirda atigi 7ta klub ishtirok etgan bo‘lsa, endi jahonning 32ta jamoasi bir joyga to‘planadi. Ha, endi finalga chiqish juda qiyin bo‘ladi, lekin oxir-oqibat, futbol mohiyatan mashaqqatli mehnatni talab qiladi. Qolaversa, muxlislar ham turli o‘zgarishlarni yoqtirishadi.
- «Al-Ayn» bundan 21 yil oldin OCHL g‘olibiga aylangan edi. Hozir esa qit’a klub futbolidagi eng katta mukofotni yana bir marta qo‘lga kiritish imkoniyatiga ega. Bu masalada qandaydir bosim yo‘qmi?
- Menimcha, qayta g‘alaba kuyini chalish istagi qo‘shimcha bosim hisoblanmaydi. Binobarin, bu safar turnir finaligacha bosib o‘tgan yo‘limizning o‘zi klub tarixiga zarhal harflar bilan bitilishi tayin. Chunonchi, hal qiluvchi o‘yinga qadar bir qator favoritlarni chetga surib yubordik. Hozir barcha klubdoshlarimdan minnatdorman, chunki birdamlikni ushlagan holda, katta jamoalar bilan chinakamiga jang qildik va oddiy ifoda etganda, ularni shunchaki, nokautga uchratdik. Umuman, «Al-Ayn» finalda o‘ynashga loyiq edi. Umid qilamanki, kubokni boshimiz uzra baland ko‘tarishga ham munosibmiz.
- «Yokogama»ga qarshi birinchi o‘yinni qanday baholaysiz va javob bahsida nimalarnidir o‘zgartirishni rejalashtiryapsizlarmi?
- Ikki seriyali finalning o‘ziga xos nyuanslari bo‘ladi. Yaponiyadagi birinchi uchrashuvda «Yokogama» juda katta kuch sarfladi, xususan, doimiy pressing raqibdan katta energiya talab qildi. Chunki yaponlar o‘z maydonlarida ijobiy natijaga muhtoj edilar. Biz ham ilk to‘qnashuv tahlilida ijobiy va salbiy tomonlarini ajratib oldik. Menimcha, «Hazza bin Zayd» stadionida bo‘ladigan javob o‘yini mutlaqo boshqacha kechadi. Ya’ni «Al-Ayn» o‘z muxlislari qarshisida butunlay boshqa jamoaga aylanadi. Zero, bizga nafaqat BAA va Marokash, balki boshqa arab mamlakatlarida millionlab muxlislar qo‘shimcha kuch bag‘ishlashadi.
- «Al-Ayn» final yo‘lida chindan ham, bir nechta haqiqiy og‘ir vazn toifasiga mansub klublar to‘sig‘idan o‘tdi. Jumladan, oldingi raundda Krishtianu Ronaldusi bor «Al-Nasr» mag‘lub etildi. Bunday muvaffaqiyat siri nima?
- Sir - butun jamoaning yaxlitligi va birdamligi. Agar o‘yinda ijobiy natijani ko‘zlasangiz, raqib qanday jamoa ekanligidan qat’iy nazar, unga kuchli ruhiyat, qat’iyat va shijoat bilan qarashingiz kerak. Turnirning ortda qolgan setkasiga qarasak, darhaqiqat, ehtimol, ko‘pchilik ba’zi bosqichlarda «Al-Ayn»ning kurashdan chiqib ketishini kutgandir. Muhimi, biz qat’iyat va iroda tufayli ko‘pchilik imkonsiz hisoblagan natijaga erishdik. Qaytaraman, OCHLning ushbu kampaniyasi «Al-Ayn» uchun tarixiy bo‘ldi. Shaxsiy fikrimcha, biz yakuniy g‘alabaga ko‘proq munosibmiz. Mana, finalgacha bosib o‘tgan yo‘limizga nazar tashlang, muvaffaqiyatimiz tasodif yoki omad emas, balki mashaqqatli mehnat natijasi ekanligini ko‘rasiz. Krishtianu Ronaldu kabi katta shaxs bilan uchrashish va g‘alaba qozonish - qo‘shimcha rag‘bat! Axir gap dunyo futbolidagi eng buyuk ijrochilardan biri haqida ketmoqda. Lekin haqiqat shuki, o‘yin boshlangan pallada har ikki jamoa 11 nafardan futbolchiga tayanadi. Takrorlayman, maydonda Ronaldu bilan duch kelish va uning jamoasini yengish istagi har qanday futbolchiga kuchli turtki beradi. Umuman, muvaffaqiyatimizning asosiy omili - bu yagona guruh sifatida birlashganimiz, baribir.
- Argentinalik murabbiy Ernan Krespo ishini qanday baholaysiz?
- Bilamizki, u vaqtida dunyoning eng yaxshi hujumchilaridan biri sifatida gavdalangan. Murabbiy - Krespo ishida ham hujumkorlikka moyillikni payqash qiyin emas. U kiyinish xonasida ham, maydonda ham doimo hujumchilarga alohida tavsiyalar beradi. Bu esa bizning yaqqol ajralib turishimizga qo‘shimcha motivasiyadir. Albatta, Ernandan juda ko‘p narsalarni o‘rgandik. Murabbiyimiz ayniqsa, kiyinish xonasida yigitlarga jangovar ruh bag‘ishlashga usta. Ha, u odatda maydon chetida juda xotirjam ko‘rinadi, lekin mashg‘ulotlar jarayoni va kiyinish xonasida katta ishtiyoq va qat’iyatini namoyish etadi.
- Bunga qadar «Raja Kasablanka» bilan qit’a turnirlarida qatnashgansiz. Aytingchi, o‘sha tajriba bugun «Al-Ayn»da nechog‘li qo‘l kelmoqda?
- Ha, «Raja» safida Afrika miqyosidagi 5ta finalda qatnashdim va shukrki, barchasida g‘alaba qozonganman. Tabiiyki, «Al-Ayn» safiga qo‘shilgach, Afrika turnirlarida orttirilgan tajriba o‘z so‘zini ayta boshladi. Deylik, yangi muhitga moslashishda uncha qiynalmadim. O‘zi «Al-Ayn»ga kelganimdayoq OCHLda o‘ynashga umid bog‘lagandim, chunki Osiyo musobaqalari Afrikanikidan farqlanadi, baribir.
- Marokash termasida ham, «Al-Ayn»da ham kelajak uchun ambisiyalaringiz kattaligi tayin. Hoynaxoh, JCH-2026da ishtirok etish eng asosiy orzularingizdan biri bo‘lsa kerak...
- Har qanday futbolchi kabi mahoratimni oshirish va eng nufuzli turnirlarda qatnashishga intilaman. Umid qilamanki, menga Afrika Millatlari kubogi va JCHda ishtirok etish baxti nasib etadi. Shuningdek, «Al-Ayn» bilan bo‘lajak yirik turnirlarda o‘z so‘zimni baralla aytishdan umidvorman.
OCHLning barcha g‘oliblari
2003 - «Al-Ayn» (BAA)
2004 - «Al-Ittihod» (S.Arabistoni)
2005 - «Al-Ittihod» (S.Arabistoni)
2006 - «Chonbuk Motors» (J.Koreya)
2007 - «Urava Reds Daymonds» (Yaponiya)
2008 - «Gamba Osaka» (Yaponiya)
2009 - «Poxang Stilers» (J.Koreya)
2010 - «Seongnam Ilva Chunma» (J.Koreya)
2011 - «As-Sadd» (Qatar)
2012 - «Ulsan Xyunday» (J.Koreya)
2013 - «Guanjou Evergrand» (Xitoy)
2014 - «Vestern Sidney U.» (Avstraliya)
2015 - «Guanjou Evergrand» (Xitoy)
2016 - «Chonbuk Motors» (J.Koreya)
2017 - «Urava Reds Daymonds» (Yaponiya)
2018 - «Kashima Antlers» (Yaponiya)
2019 - «Al-Hilol» (S.Arabistoni)
2020 - «Ulsan Xyunday» (J.Koreya)
2021 - «Al-Hilol» (S.Arabistoni)
2022 - «Urava Reds Daymonds» (Yaponiya)
2023 - «Al-Ayn» (BAA)
M.PO‘LATOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
