AQSHning Nyu-York shahrida bo‘lib o‘tayotgan shaxmat bo‘yicha jahon chempionatining rapid yo‘nalishi yakuniga yetdi. Sportchilar 3 kun davomida 13 tur bahslarida ishtirok etishdi.
Ayollar o‘rtasidagi JCHda ilk marta ishtirok etgan 15 yoshli Afruza Hamdamova musobaqa kashfiyotiga aylandi. Dastlabki ikki kun natijalaridan so‘ng (8 tur) 5,5 ochko to‘plab turgan hamyurtimiz uchinchi kunda ham sensasion natija qayd etdi. Afruza dastlab FIDEning ayollar o‘rtasidagi rapid reytingi yetakchisi Ju Venjun (Xitoy)ni mag‘lub etgan bo‘lsa, so‘ngra germaniyalik Elizabet Petsni taslim etdi.
Hamdamova so‘nggi turda rossiyalik Katerina Lagnoga qarshi qora donalarda o‘ynadi. 15 yoshli sportchimiz unda g‘alaba qozonsa, hattoki jahon chempionligini ham qo‘lga kiritishi mumkin edi. Ammo tomonlar 28-yurishdan keyin durangga imzo chekishdi.
Natijada Afruza 8 ochko bilan turnirni yakunladi. U chempionlikni qo‘lga kiritgan Xampi Koneru (Hindiston)dan atigi 0,5 ochko ortda qoldi. Qo‘shimcha ko‘rsatkichlarga ko‘ra yurtdoshimiz 7-o‘rinni band etdi.
Hamdamova rapid yo‘nalishida FIDE reytingida o‘z hisobiga naq 218 ball qo‘shdi va 130 pog‘onaga sakragan holda top-20ga kirib oldi! Afruza endi blis bahslarida ishtirok etadi.
Erkaklar o‘rtasidagi turnirda Javohir Sindarov 7-o‘rinni egalladi. Yurtdoshimiz bugun Yan Nepomnyashiyga yutqazib, Andrey Volokitin va Yan-Kshishtof Dudani mag‘lub etdi. Gresiyalik Nikolas Teodorou bilan esa durang qayd etdi. Natijada Sindarov 9 ochko bilan turnirni yakunladi.
Nodirbek Abdusattorov bugungi janglarda omadsizlikka yuz tutdi. Vatandoshimiz bugun ikki mag‘lubiyat, bir durang va bir g‘alaba qayd etdi. Nodirbek 8,0 ochko bilan JCHni 28-pog‘onada tugatdi.
Jahongir Vohidov 7,5 ochko bilan 48-pog‘onani egallagan bo‘lsa, Muhiddin Madaminov 7,0 ochko 86-qatorni band etdi. Shamsiddin Vohidov uchun esa musobaqa muvaffaqiyatsiz yakunlandi — 131-o‘rin (5,5 ochko).
Erkaklar o‘rtasidagi musobaqaning barcha medallari rossiyaliklarga nasib etdi — Volodar Murzin (10 ochko), Aleksandr Grishchuk (9,5) va Yan Nepomnyashchiy (9,5).
Shaxmatchilar 30 va 31 dekabr kunlari blis bo‘yicha JCHda ishtirok etishadi.
OKMK
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
