O‘zbekiston futzal federasiyasi Prezidenti Bekzod Mamatqulov O‘FF mas’ullari hamda terma jamoalar murabbiylari bilan navbatdagi hisobot yig‘ilishini o‘tkazdi. Tadbirda Federasiyaning sentyabr oyida amalga oshirgan ishlari va oktyabr oyidagi ustuvor vazifalari yuzasidan hisobot va rejalari tinglandi. Shuningdek, terma jamoalar oldida turgan dolzarb masalalar muhokama qilindi.
Yig‘ilishda Federasiya faoliyati va Oliy liga musobaqalarining dastlabki uchta tur yakunlari tahlil qilindi.
Jumladan, o‘tgan davr mobaynida O‘zbekiston 29-milliy chempionatining bahslari Toshkent, Andijon va Jizzax shaharlarida uyushqoqlik bilan o‘tkazilgani, joylarda futzal ommalashishiga ijobiy ta’sir ko‘rsatganligi, iqtidorli yosh futzalchilarning kashf etilayotgani alohida ta’kidlandi. Shuningdek, yangi mavsumdan e’tiboran, oliy liga jamoalariga 30 dan ziyod legionerlar jalb etilishi musobaqalarga qiziqishni yanada oshirishga hamda mahalliy futzalchilarning kasbiy mahorati o‘sishiga ijobiy ta’sir ko‘rsatmoqda.
Shu bilan birgalikda, O‘FF rahbari tomonidan jamoalar faoliyatida hali mavjud bo‘lib turgan kamchiliklarga ham tanqidiy baho berildi.
Xususan, ayrim jamoalar tomonidan musobaqa Reglamenti talablarini to‘liq bajarilmayotgani, klublarda tibbiyot va matbuot xizmatlarining yetarli darajada faoliyat ko‘rsatmayotgani, tarkiblardagi muammolar, kurashsiz boy berilayotgan o‘yinlar, ba’zi jamoalarning musobaqalarga to‘liq murabbiylar shtabisiz ishtirok etishi, tarkiblarga 2009 yil va undan keyin tug‘ilgan futzalchilarning jalb qilinmayotganligi masalalari jiddiy tanqid ostiga olindi.
Bu kabi kamchiliklar nafaqat ichki musobaqalar darajasiga, balki o‘smirlar va yoshlar terma jamoalarimizning xalqaro maydonlardagi ishtiroki natijalariga ham salbiy ta’sir ko‘rsatishi qayd etildi. Mazkur holatlar kelgusida takrorlangan taqdirda, federasiya tomonidan tegishli klublarga nisbatan qat’iy choralar ko‘rilishi alohida ta’kidlandi.
Yig‘ilishda, O‘FF rahbari tomonidan O‘zbekiston milliy terma jamoasining Qirg‘iz Respublikasida o‘tkazilgan Osiyo kubogi-2026 saralash musobaqalarida ishtiroki yakunlari alohida tahlil qilindi va terma jamoa murabbiylarining tegishli hisobotlari tinglandi.
Shu o‘rinda O‘zbekiston milliy terma jamoasi Saudiya Arabistonida tashkil qilinadigan VI Islom birdamlik o‘yinlariga va o‘smirlar terma jamoasi Bahraynda bo‘lib o‘tadigan III Osiyo yoshlar o‘yinlariga jiddiy tayyorgarlik ko‘rishlariga e’tibor qaratildi.
Bu borada Bekzod Mamatqulov ayni kunlarda boshlangan milliy jamoa yig‘ini doirasida futbolchilarning jismoniy va ruhiy holati, jarohatlari bilan bog‘liq masalalarga to‘xtaldi. Jamoa shifokorlariga jarohat olgan futbolchilar bilan davolash jarayonini to‘g‘ri tashkil etish, klublar bilan muvofiqlashtirilgan holda nazoratni kuchaytirish ta’kidlandi.
Shuningdek, murabbiylar shtabiga terma jamoaga nomzod bo‘lgan futbolchilarni klub murabbiylari bilan hamkorlikda kuzatish, ularning muntazam o‘yin amaliyotiga ega bo‘lishiga e’tibor qaratish yuzasidan tegishli ko‘rsatmalar berildi.
O‘z navbatida, O‘zbekiston milliy terma jamoasining 16 oktyabr kuni Qozog‘istonga qarshi o‘tkazadigan xalqaro o‘rtoqlik uchrashuvini munosib darajada tashkil etish, uni OAV va ijtimoiy tarmoqlarda keng yoritish vazifalari belgilandi. Bundan tashqari, milliy chempionatning 4-tur bahslariga tayyorgarlik, birinchi liga va havaskorlar o‘rtasidagi “O‘FF Prezidenti kubogi” musobaqasini yuqori saviyada tashkillashtirishga qaratilgan chora-tadbirlar ishlab chiqish zarurligi uqtirildi.
Bir so‘z bilan aytganda, yig‘ilishda belgilangan ustuvor vazifa va topshiriqlar - milliy futzalni yanada rivojlantirishga, klub va terma jamoalar faoliyatini samarali tashkil etishga xizmat qiladi.
Neftchi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
