«Andijon»ga yangi taklif qilingan futbolchilar orasida iqtidorli hujumchi Asilbek Aliyev ham bor.
O‘tgan yili U-17 terma jamoamiz safida Osiyo chempioni va to‘purari bo‘lgan futbolchi endilikda bor e’tiborini «Andijon»dagi faoliyatiga qaratgan.
Iqtidorli o‘yinchi klub matbuot xizmatiga intervyu berdi.
Tanishuv va hissiyot
— Asilbek, «Andijon» klubiga xush kelibsiz! Ilk his-tuyg‘ularingiz qanday?
— Katta rahmat! «Andijon» kabi katta klubga qo‘shilganimdan juda xursandman. Bu men uchun yangi bosqich, yangi imkoniyat. Shu yerda o‘zimni ko‘rsatishni va jamoaga yordam berishni xohlayman.
— «Andijon»ga o‘tish qarori qanday qabul qilindi? Bu qaror ortida nima turibdi?
— Bu qarorni oilam va murabbiylarim bilan maslahatlashib qabul qildim. «Andijon» menga ishonch bildirdi. Xudo xohlasa, men bu ishonchni oqlash uchun bor kuchimni sarflayman.
— Jamoa va muhit haqida ilk taassurotlaringiz?
— Rostini aytsam, jamoaga kelganimda hamma meni juda iliq qarshi oldi. Ham o‘yinchilar, ham murabbiylar. Barchasi ochiq va do‘stona. Ilk kunlardanoq o‘zimni yangi muhitda emas, balki tanish joydagidek his qildim. Mashg‘ulotlar yaxshi kayfiyatda o‘tyapti. Barchasi bir maqsad yo‘lida mehnat qilishyapti. Shuning uchun moslashish ham men o‘ylagandek qiyin bo‘lmadi.
Terma jamoa va katta tajriba
— U-17 Osiyo chempionatida g‘olib bo‘lish va to‘purar bo‘lish — bu siz uchun nimani anglatadi?
— Bu mening hayotimdagi eng yorqin lahzalardan biri. Bu natija faqat mening emas, butun jamoaning mehnati samarasi. Osiyo chempioni bo‘lish — bu ko‘p narsani anglatadi. Asosiysi, to‘xtab qolish yo‘q. Yana kelayotgan Osiyo chempionatida biz yanada kuchliroq bo‘lib borishimizni va chempionlikni yana O‘zbekistonga olib kelishni anglatadi, deb o‘ylayman.
— Jahon chempionatida ishtirok etish yosh futbolchi sifatida sizni qanday o‘zgartirdi?
— Menga katta tajriba berdi. Dunyodagi kuchli jamoalarga qarshi o‘ynash orqali qaysi jihatlarda o‘zim ustida ishlashim kerakligini angladim.
— Terma jamoada o‘ynagan o‘yinlardan qaysi biri xotirangizda eng ko‘p qolgan?
— Terma jamoada eng esda qoladigan o‘yinim bu Saudiya Arabistoniga qarshi bo‘lgan uchrashuv. Ikki futbolchi kam bo‘lib yutgan o‘yinimiz. Mana shunisi, menimcha, eng esda qolarlisi.
«Andijon»dagi maqsadlar
— «Andijon» klubi oldida qo‘ygan shaxsiy maqsadlaringiz qanday?
— Asosiy maqsadim — jamoaga foyda keltirish va ishonchni oqlash. Albatta, ko‘proq gollar urishni ham xohlayman.
— Bu jamoada o‘zingizni qaysi pozisiyada eng yaxshi ocha olasiz?
— Hujumchi sifatida, agarda zarur bo‘lsa, qanotlarda ham o‘ynay olaman.
— Muxlislar sizdan qanday Asilbek Aliyevni ko‘rishadi?
— Jangovar, maydonda fidoyi va oxirigacha kurashadigan Asilbekni.
Rivojlanish va xarakter
— O‘zingizni qaysi jihatingiz bilan boshqa hujumchilardan farq qilaman, deb o‘ylaysiz?
— Ko‘proq korpusda o‘ynashim, himoyaga qaytib yordam berishim va o‘yin davomida gapirib o‘ynashim bilan farq qilaman.
— Qiyin paytlarda sizni ruhlantiradigan inson yoki so‘z bormi?
— Oila va ota-onamning so‘zlari. Ular doim ishonadi va har narsa mehnatga bog‘liqligini aytishadi.
— Futbolda o‘zingizga namuna deb bilgan hujumchi kim?
— Obameyang. Uning tezligi, golni sezishi va harakatlanishi menga juda yoqadi.
— Muxlislar sizdan maydonda nimani kutishlari mumkin?
— Muxlislar mendan har bir o‘yinda bor kuchim bilan kurashishimni kutishlari mumkin. Har doim jamoa uchun maydonda ham, maydon tashqarisida ham borimni berishga harakat qilaman. Ularga nafaqat gollar, balki, Xudo xohlasa, mehnat va jonkuyarligimni ko‘rsatmoqchiman.
Qisqa blits savollar
— Gol urishmi yoki jamoaga foyda keltirish?
— Jamoaga foyda keltirish.
— Chap oyoqmi yoki o‘ng?
— Ikkalasi ham farqi yo‘q. Lekin ko‘pincha o‘ng oyoq.
— So‘nggi golingiz — qaysi o‘yinda?
— So‘nggi golim «Andijon» darvozasiga bo‘ldi.
— Orzu: Yevropada o‘ynash yoki terma jamoada yetakchi bo‘lish?
— Xudo xohlasa, ikkalasi ham mening orzuyim.
— Eng kuchli jihatingiz?
— Eng kuchli jihatim — kuchli zarbam bo‘lsa kerak.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
