Kiprda o‘tayotgan Nomzodlar turnirida muddatidan avval g‘oliblikni naqd qilgan o‘zbekistonlik grossmeyster Javohir Sindarov g‘alabadan keyingi fikrlari bilan o‘rtoqlashdi. Yosh shaxmatchi o‘tkazilgan matbuot anjumanida bosim, jamoasining yordami va tarixiy natijaga nimalar evaziga erishganini ochiqladi.
Javohir turnir hali rasman yakunlanmagan bo‘lsa-da, asosiy vazifa bajarilganidan mamnunligini yashirmadi:
“Juda xursandman. Turnir hali tugamadi, lekin g‘alabani oldindan ta’minlaganimdan xursandman. Agar bugun mag‘lub bo‘lganimda, kun juda og‘ir o‘tgan bo‘lardi. Turnir davomida yaxshi o‘yin ko‘rsata oldim deb o‘ylayman”.
Grossmeyster turnir davomida O‘zbekistondagi muxlislarning mehri va e’tiborini doim sezib turganini ta’kidladi:
“Kecha oilaviy chatimizga Toshkent ko‘chalaridagi monitorlarda aks etgan rasmimni yuborishganida hayron qoldim. Butun O‘zbekiston turnirni kuzatayotganini o‘shanda yanada chuqurroq his qildim. Har bir turda bu qo‘llab-quvvatlashni sezib turdim. Buning uchun barchaga rahmat aytaman”.
Sindarov o‘z muvaffaqiyati ortida turgan jamoasi haqida ham to‘xtalib o‘tdi. Ma’lum bo‘lishicha, unga uch nafar sekundant (yordamchi grossmeyster) ko‘maklashgan:
“Bittasi shu yerda (Kiprda) edi, qolganlari onlayn tarzda yordam berishdi. Murabbiyim Roman Vidonyak bilan ko‘proq ko‘nikmalar va psixologiya ustida ishlaymiz. Jamoamiz juda zo‘r, lekin hozircha hammasini ochiqlay olmayman, chunki oldinda jahon chempionligi uchun bahs kutib turibdi”.
Javohir Nomzodlar turnirini yutish uchun faqat bilim emas, balki omad ham kerakligini tan oldi:
“Bunday turnirlarda g‘alaba qozonish uchun bir oz omad ham kerak. Birinchi turdagi omadli yurish butun musobaqani o‘zgartirib yubordi. Fabiano Karuanaga qarshi va birinchi turdagi partiyalar juda og‘ir kechdi. Hindistonlik Pragg (Pragnanandha) va Fabiano Karuana bilan bo‘lgan o‘yinlarim menga alohida yoqdi”.
Shaxmatchi o‘z quvonchini birinchi bo‘lib yaqinlari bilan bo‘lishishini va oldinda uni yanada mas’uliyatli bahs kutayotganini aytdi:
“Hozir eng avvalo oilamga qo‘ng‘iroq qilaman. Bu lahzalarni ular bilan bo‘lishishni xohlayman. Endigi maqsadim — jahon chempionligi uchun bahsda maksimal darajada yaxshi o‘yin ko‘rsatib, g‘alaba qozonish”.
Eslatib o‘tamiz, Javohir Sindarov Nomzodlar turniri yakunlanishiga 1 tur qolganda g‘oliblikni rasmiylashtirdi. U 13-turdan keyin 9,5 ochko bilan eng yaqin ta’qibchisi Anish Girini 2 ochkoga ortda qoldirdi. Ushbu muvaffaqiyat yakunida o‘zbekistonlik grossmeyster nafaqat turnir g‘olibligini, balki amaldagi jahon chempioni Gukesh Dommarajuga qarshi shaxmat toji uchun kechadigan bahsda ishtirok etish huquqini ham qo‘lga kiritdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
