O‘zbekiston Professional futbol ligasi (PFL) JCH-2026 yakunidan keyingi Superliga taqvimi va o‘zbek klublarining xalqaro maydondagi ishtiroki bo‘yicha yangi tafsilotlarni ochiqladi.
Mundialdan keyingi start
Jahon chempionatining final uchrashuvi 19 iyul kuni bo‘lib o‘tadi. Liga rejasiga ko‘ra, yozgi tanaffus aynan shu kuni yakunlanadi va 20 iyuldan e’tiboran Superliganing 12-turiga start beriladi.
Xalqaro maydondagi yangi imkoniyatlar
OFK tomonidan kvotalarning qayta taqsimlanishi natijasida, joriy yilning sentyabr oyidan boshlanadigan yangi formatdagi turnirlarda («Elit Chempionlar ligasi» va «Chempionlar ligasi 2») O‘zbekistonning uchta klubi ishtirok etishi kutilmoqda.
Xususan, «Paxtakor» klubida «Elit Chempionlar ligasi»ning saralash bosqichida qatnashish imkoniyati yuzaga keldi. Dastlabki ma’lumotlarga ko‘ra:
-
«Paxtakor» saralash uchrashuvini 11 avgust kuni BAAda o‘tkazadi.
-
G‘alaba qozonilsa — «Elit Chempionlar ligasi»ning asosiy bosqichiga yo‘l oladi.
-
Mag‘lubiyat qayd etilsa — «Nasaf» bilan birgalikda «Chempionlar ligasi 2» guruh bosqichida ishtirok etadi.
Taqvimdagi nomutanosiblik va o‘zgarishlar
Qur’a jarayonida «Paxtakor»ning 11 avgustdagi o‘yinini Toshkentda o‘tkazish rejalashtirilgan edi. Biroq xalqaro taqvim sababli «sherlar» aynan shu kuni safarda bo‘lishadi.
Shu bois, PFL mavsumning ikkinchi yarmi uchun taqvimga o‘zgartirish kiritishni rejalashtirmoqda. 20 iyuldan 30 avgustga qadar Superliga jamoalari (Kubok bahslari bilan birga) 9 ta uchrashuvda maydonga tushishlari lozim. Tig‘iz grafik sababli «Paxtakor»ning 16-tur doirasidagi «Buxoro»ga qarshi o‘yini boshqa muddatga ko‘chirilishi mumkin. Ushbu bahs JCH-2026ning yarim final uchrashuvlaridan keyingi bo‘sh kunlarga belgilanishi ehtimoli yuqori.
Hozirda Liga iyul oyidan boshlab o‘tkaziladigan uchrashuvlarning aniq sanalar bilan tasdiqlangan taqvimini ishlab chiqmoqda. Tez orada rasmiy sanalar PFL saytida e’lon qilinadi.