Ispaniya terma jamoasi bosh murabbiyi Luis de la Fuente milliy jamoaning 2026 yilgi jahon chempionatiga tayyorgarligi haqida gapirdi va dastlabki ro‘yxat tafsilotlari bilan o‘rtoqlashdi.
Ispaniyalik mutaxassisning aytishicha, turnir uchun yakuniy ro‘yxatga 26 nafar futbolchi kiritiladi. Shu bilan birga, tayyorgarlik yig‘iniga qo‘shimcha o‘yinchilar ham jalb etiladi. Ular 4 iyun kuni La-Korunya shahrida Iroqqa qarshi o‘tkaziladigan o‘rtoqlik uchrashuvida ishtirok etib, shundan so‘ng terma jamoa qarorgohini tark etadi.
Luis de la Fuentening ta’kidlashicha, terma jamoa shtabi jarohat olgan futbolchilarning holatini diqqat bilan kuzatmoqda. U jamoa yetakchilari Lamin Yamal, Niko Uilyams va Mikel Merino jahon chempionatining ilk o‘yinlarigacha safga qaytishiga ishonch bildirdi.
— O‘ylashimcha, Lamin, Niko va Mikel jahon chempionatining birinchi o‘yiniga tayyor bo‘ladi. Agar bo‘lmasa — ikkinchi yoki uchinchi o‘yingacha tiklanadi. Jiddiy muammolar yo‘q, — dedi murabbiy Sport.es nashriga.
Shuningdek, Luis de la Fuente Gavi va «Barselona» himoyachisi Erik Garsiyaning terma jamoaga chaqirilishi ehtimoli haqida ham fikr bildirdi, ammo aniq ismlarni ochiqlamadi.
— Bizda juda universal va oldindan bashorat qilib bo‘lmaydigan jamoa bor. Bu — asosiy kuchli tomonlarimizdan biri, — dedi murabbiy.
Murabbiy alohida ravishda darvozabonlar chizig‘iga ham to‘xtaldi. Uning so‘zlariga ko‘ra, dastlabki ro‘yxatga olti nafar golkiper kiritilgan, ammo jahon chempionatiga faqat uch nafar darvozabon boradi.
— Dunyoning eng yaxshi o‘n darvozabonidan oltitasi — ispaniyaliklar. Turnirga uch nafar golkiper yo‘l oladi va ularning barchasi o‘z klublarida asosiy tarkib futbolchilari hisoblanadi, — deya ta’kidladi Luis de la Fuente.
Mutaxassis David Rayyani alohida e’tirof etdi, shuningdek, Unai Simon, Joan Garsiya va Aleks Remiro nomlarini ham tilga oldi. Uning aytishicha, ular orasidan tanlov qilish juda qiyin bo‘ladi.
Bundan tashqari, murabbiy Kornelyada Misrga qarshi o‘rtoqlik o‘yini vaqtida sodir bo‘lgan irqchilik bilan bog‘liq mojarolarga ham munosabat bildirdi. O‘sha bahsda muxlislar haqoratli shiorlar aytgani xabar qilingan edi.
— Ispaniya irqchi davlat emas. Futboldan zo‘ravonlik va nafratni tarqatish uchun foydalanayotgan insonlar ham futboldan, ham ko‘chalardan chetlatilishi kerak, — dedi terma jamoa ustozi.
Luis de la Fuente 2030 yilgi jahon chempionati finalining ehtimoliy mezboni haqida ham fikr bildirdi. U hal qiluvchi uchrashuv Ispaniyada o‘tishini istashini aytdi, ammo «Santyago Bernabeu», «Kamp Nou» va Kasablankadagi «Hassan II» stadioni o‘rtasidagi bahsda aniq bir arenani qo‘llab-quvvatlashdan bosh tortdi.
So‘nggida murabbiy Madridning «Real» klubidagi inqiroz va Joze Mourinyo tayinlanishi mumkinligi haqidagi mish-mishlarga ham munosabat bildirdi.
— Mourinyo «Real» uchun yechim bo‘ladimi-yo‘qmi, bilmayman. Ammo u buyuk murabbiy, — dedi Luis de la Fuente.
Matnda xatolik topsangiz, o'sha xatoni belgilab, bizga jo'nating (Ctrl + Enter).
Hasanali ota
Furqat Qurbonov
Xolis tahlilchi blogi
Jaloliddin Qobiljonov
Yahyoxo‘ja Ulug‘xo‘jayev
Safarali Siddiqov
«InterFutbol» gazetasi
O'zbekiston Milliy axborot agentligi
Ma'murjon Ibragimov
Qahramon Aslanov
Shuhrat Shokirjonov
Sherzod Rajabov
Stadion.uz
Abdurahmon Fozilov
