«Реал» Дортмунд «Боруссия»си голеадори Эрлинг Холандни ўз томонига оғдириш масаласида хуфёна иш кўрмоқда, чоғи. Ҳаммага маълум: айни пайт норвегиялик ҳужумчини Мадрид клубидан ташқари, «Барселона», «Манчестер Сити» ва «ПСЖ»да илҳақ ҳолда кутишяпти. Энди унинг эҳтимолий трансфер тарихи айғоқчилар ҳақидаги сериалга айланмоқда. Бу сериал якунда Эрлингни айнан «Қироллик клуби»га етаклаши эҳтимоли катта. Ҳар ҳолда, «Реал»нинг ишга Adidas фирмасини ҳам жалб этгани маълум бўлди.
Германиянинг Bild нашрида ёзилишича, февраль ойи бошида Adidas компанияси бош офисида Зайниддин Зидан, Мичу, Эрлинг Холанд ва унинг отаси ўртасида махфий учрашув бўлиб ўтган. Гап шундаки, норвегиялик голеадор ва Nike ўртасидаги ҳомийлик шартномаси муддати тугади. Изоҳ берилишича, «адидасчилар» Холандни ўз қанотлари остига олиш асносида унинг «Реал» фойдасига қарор чиқаришга ундамоқчилар. Компания шу мақсадда хуфёна учрашувга Эрлингнинг болаликдаги кумирлари - Зайниддин Зидан ва испаниялик Мичуни ҳам таклиф қилди.
Ҳаммаси жуда оддий: агар Adidas Эрлинг билан келишувга эришса, футболчининг бу бренд билан узоқ муддатли муносабатларга эга «Реал» сафини тўлдириш эҳтимоли кескин ошади. Зидан ва Мичу эса Холандга клуб танлаш масаласида таъсир кўрсатиш учун ёлланган. Қўшимча қилинишича, учрашувда Холандлар оиласи дўсти Ивар Эггья ва ҳуқуқшунос Рафаэла Пимента ҳам иштирок этишган.
Тўғри, Nike ва Puma ҳам ҳамон ўйин ичида - ҳар иккиси Холандга янги шартнома таклиф қилмоқчи. Эрлинг Nike билан «Зальцбург» клубида ўйнаётган вақти шартнома тузганди. Йиллик қиймати 1 миллион еврони ташкил этган ўша битим шу ой ўз кучини йўқотди. Аслида Nike дарҳол шартнома муддатини узайтирмоқчи эди, бироқ Adidas ва Puma компанияларининг ҳужумчи учун курашга қўшилгани вазиятни чигаллаштирди. Зеро, ҳар икки бренд вакиллари футболчининг шахсий агенти - Мино Райола билан музокара жараёнини бошлаб юборишди. Marca нашрининг Futbol Aleman манбасига таяниб, хабар тарқатишича, ҳар икки компания норвегияликка 5 йиллик ҳамкорлик учун чамаси 50 миллион евро таклиф қилмоқда. Йилига 10 «лимон»! Ёмон эмас-а... Ҳа, Эрлинг олдида нафақат янги клуб, балки янги бренд танлаш масаласи ҳам турибди.
Холанд олдидаги ягона йўл «Реал»ми?
Sport.es нашри хабарида айтилишича, «Реал» аллақачон Холанднинг вакиллари билан дастлабки келишувга эришган. Бу ҳужжат футболчининг отаси Альф-Инге Холанд ва Мино Райоланинг агентлик фирмаси ҳуқуқшуноси Рафаэла Пимента томонидан имзоланган. Қўшимча қилинишича, Мадрид жамоаси Холанд трансфери бўйича ишни ёзда якунига етказади. Ўртадаги шартлашувга асосан, ҳужумчи энди бошқа клублар билан музокара олиб боролмайди.
А.АҲМЕДОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
