"Тоттенхэм" бош мураббийи Антонио Конте "Арсенал"га қарши дербида Эмерсон Роялнинг майдондан четлатилишидан сўнг АПЛдаги ҳакамлик даражасини танқид қилди.
Рояль кеча бўлиб ўтган Премьер-лига ўйинининг 62-дақиқасида Габриэль Мартинеллининг тўпиғи соҳасига зарба бериб, тўғридан-тўғри қизил карточка олди.
Орадан бир неча дақиқа ўтиб “Тоттенхэм” учинчи голни ўтказиб юборди ва якунда 3:1 ҳисобида мағлубиятга учради.
Конте ҳакам Энтони Тейлорнинг қизил карточка ҳақидаги қарорига тўғридан-тўғри рози бўлмаса-да, Антонио Премьер-лига ҳакамлари янада барқарор бўлишини истайди.
"Тўғрисини айтишим керак. Англияда ҳакамлик қилиш жуда қийин, чунки бу ердаги ҳакамлар бир чизиққа ёпишиб олмайди.
Баъзида сиз вазиятни кўрасиз ва сиз бу қизил карточка бўлиши мумкин деб ўйлайсиз, лекин бунинг ўрнига улар сариқ карточка ёки ҳеч нарса кўрсатишмайди. Баъзида эса сариқ карточка учун вазиятни кўрасиз ва улар қизил карточка кўрсатишади.
Улар бунинг устида кўп ишлашлари керак. Италияда ҳакамлар пайшанба куни йиғилишади ва уч кун бирга бўлиб, видеоларни ўрганишади ва яхшиланишга ҳаракат қилишади.
Улар Англияда шундай қилишадими, билмайман, лекин бу яхши фикр бўларди, чунки бу ерда футбол даражаси жуда юқори ва бизга ҳакамлик ва ВАР даражаси бир хил бўлиши керак.
АПЛда ҳақиқатан ҳам юқори даражадаги футбол бор ва шунинг учун ҳамма нарса мос бўлиши керак.
Шубҳасиз, Эмерсон хафа, чунки у нима бўлганини билади ва қизил карточкадан кейин биз учун қанчалик оғир бўлганини билади. Бу футболда содир бўладиган ҳодиса.
Эмерсон ёш ўйинчи, у эндигина 23 ёшда ва менимча, у бу вазиятдан кейинги сафар яхшиланиш ва шунга ўхшаш вазиятдан қочиш учун фойдаланиши керак.
Тўғрисини айтсам, нафақат унинг ўзи, балки барча футболчилар унинг четлатилишидан ҳайратда қолишди", - деди Конте The Independent билан суҳбатда.
Матнда хатолик топсангиз, ўша хатони белгилаб, бизга жўнатинг (Ctrl + Enter).