Олти йил аввал, 2017 йилнинг апрел ойида Виктор Вальдес фаолиятидаги сўнгги ўйинини - Премьер-лигадаги "Мидлсбро" сафида ўтказди. Аммо бутун дунё уни бошқа жамоадаги ўйинлари билан эслайди, албатта. Вальдес — "Барса"нинг афсонаси, ўйинлар сони бўйича клуб дарвозабонлари орасида рекордчи. Олти карра Испания чемпиони ва уч карра Чемпионлар лигаси ғолиби. Аммо Викторнинг мураббийлик фаолияти футболчилик фаолияти каби омадли эмас.
Қўлқопларини михга илган Вальдес футболда қолишга қарор қилди ва дарвозабонликдан кам бўлмаган стрессли касбни танлади. У мураббийлик курсларига қатнай бошлади. Виктор Испания терма жамоасининг юлдузлари – Хави, Раул, Хаби Алонсолар қаторида лицензия олди. Собиқ дарвозабон "Мораталас" ҳаваскор ёшлар жамоасини бошқариб, дебют қилди. У ерда Вальдес ўз йигитлари билан иккита минтақавий совринни қўлга киритди. 36 ёшли мутахассис ўшанда иш дидини ҳис қилган ва тез орада ўз она клубига қайтиш таклифини қабул қилган. 2019 йилнинг ёзида Виктор “Барселона” ёшлар жамоаси (U-19) “Хувенил А”ни бошқарган.
Бироқ унинг Каталония клубига қайтиши қисқа умр кўрди. Тайинланганидан атиги 80 кун ўтиб, 2019 йил октябрь ойида Вальдес "Барселона"ни тарк этди. Бунга собиқ дарвозабон ва унинг собиқ жамоадоши Патрик Клюйверт ўртасидаги можаро сабаб бўлган. Нидерландиялик Каталония клубида ёшларни тайёрлаш учун масъул бўлган, "Ла Масия" директори лавозимини эгаллаган ва уларнинг Виктор билан сўнгги суҳбати ёмон кечган.
Клюйверт ва бошқа "Барса" раҳбарлари кўп нарсадан норози бўлишди: Вальдеснинг тактик қарашларидан (у классик 4-3-3 схемасидан воз кечди) Каталония клубининг баъзи ходимлари билан совуқ муносабатларигача. Қолаверса, Виктор УEФА ёшлар лигасида “Барселона”ни бошқарар экан, ушбу турнирнинг айрим қоидаларини бузган. Хусусан, у ҳалол ўйин рекламаси доирасида ўтказилган рақиблар билан биргаликда кечки овқатга келмади. Бу арзимас нарсадек туюлса-да, клуб имиджида ўз аксини топди.
Дарвоқе, истеъфога чиқарилишидан бироз аввал Вальдес “Барселона” ва “Зенит” ўртасидаги ўртоқлик учрашувида мураббий учун ноодатий иш қилди: у рақиб дарвозабонига яхши ўйин учун миннатдорчилик билдирди.
Вальдес 2020 йилнинг май ойида Испания чемпионатининг тўртинчи дивизионида ўйнайдиган “Хорта” таклиф олгач, мураббийлар ўриндиғига қайтди. Бу унинг мураббий сифатидаги сўнгги клуби эди. Виктор "Хорта”да ҳам кўп ушланиб қолмади. 2021 йилнинг январида жамоадан кетди. Расмий версияга кўра, у ўшанда "Барселона" президентлиги учун сайлов кампаниясида иштирок этган Жоан Лапортанинг лойиҳасига эътибор қаратмоқчи бўлган.
Куни кеча Релево веб-сайтида Викторнинг мураббийлик фаолиятининг ажойиб тафсилотлари акс этган материал чоп этилди. Унинг собиқ футболчилари ёрдамида журналистлар Вальдес мураббийнинг психологик портретини чизишган. Маълум бўлишича, у "Барселона"га Испания ва Европада жуда кўп совринларни ютишига ёрдам берган тики-такани ёмон кўрарди.
Вальдес “Хорта”да мураббийлар штаби вакиллари ва бошқа ходимлар билан зиддиятга борди. Мисол учун, Виктор физиотерапевт унга қарши фитна уюштираётганига ишонди. У ўйинчиларни ҳам, ходимларни ҳам сўкди.
Бошқа томондан, “Хорта”да нафақат бош мураббий, балки спорт директори вазифасини ҳам бажариб, Вальдес саховатли ишларни амалга оширди. У ўз маблағларини клубга киритди, баъзи футболчиларнинг маошини оширди. Дарвозабонларга янги қўлқоплар олиб берди. “Барса” ёшлар жамоасида ҳам Виктор хайрли ишлар қилди: маошини мураббийлар штаби аъзолари ўртасида тақсимлаб берди, футболчиларга қувватни оширувчи ичимликлар харид қилди, футболчиларга янги бутса совға қилди. Ва бир марта у жароҳатланганларга ихтисослаштирилган клиникада даволанишни таклиф қилди ва бунинг учун ўзи пул тўлади.
Унинг собиқ ўйинчилари Вальдесни "ғалати", "ғайриоддий", "ноёб" сўзлари билан тавсифлайди. Виктор баъзан машғулотларда қизишиб кетар, баъзида эса ёрдамчиси билан скамейкада узоқ ўтирарди ёки умуман кўринмасди.
Сўнгги пайтларда Вальдес бошчилигида ўйнаган "Хорта" футболчилари у билан боғланишга ҳаракат қилган. Уларнинг айтишича, Вальдес ўзга сайёралик. “Хорта”дан кейин Виктор икки ярим йилдан бери мураббийлар ўриндиғига қайтмади. Футбол билан фақат эса DAZN каналида шарҳловчи сифатида боғланиб қолган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
