Бир йиллик танаффусдан кейин Марио Балотелли Туркияга, «Адана Демирспор» клубига қайтди.
Ўтган йили футболчи ўз ўрнини Артём Зюбага бўшатиб, Швейцарияга равона бўлганди. Бироқ «Сьон»даги фаолияти кутилганидек муваффақиятли чиқмади.
Тўғри, Марио 19та ўйинда 6та гол урди, лекин у учун одатий бўлиб қолган можаролар кўпроқ бўлди. Ваҳоланки, бошланиши чакки бўлмаганди: ажойиб голлар, мухлислар билан суратга тушишлар. «Сьон» учун Балотеллига сарфланган 2,6 млн. евро клуб тарихидаги энг қимматбаҳо келишувлардан бири бўлди. Трансферга бағишланган матбуот анжуманига 52 нафар журналистлар ташриф буюришди.
Марионинг янги жамоаси 2-турда «Санкт-Галлен» майдонига йўл олганди. У ерда «Сьон» захира ўриндиғи томон чопиб борган маҳаллий мухлис Балотеллидан биргаликда суратга тушишни илтимос қилди. Хавфсизлик хизмати фанатни тўхтатиб қолганида, Марио мухлис тарафини олди ва «Сьон» мураббийи Паоло Трамеццани уларни суратга туширди.
2та ўйин - 2та ғалаба. «Базель» ва «Санкт-Галлен» устидан. 3-турда Марио илк бор бошланғич таркибда майдонга тушди ва «Сьон» таркибидаги дастлабки голини расмийлаштирди. Кейин сермаҳсул серияни 4та ўйинга етказди. Жумладан, ўта кучли (тўп 103 км.Ғс. тезликда учганди) зарбани ҳам намойиш этишга улгурди. Шундан кейин мухлислар олдида одатий Марио Балотелли намоён бўла бошлади.
Балотеллининг асабий ҳолатлари: Мухлисларга ёмон муносабатда бўлди ва футбол федерациясини мафияга тенглади
Дастлабки қўнғироқ - ноябрь ойидаги «Базель»га қарши (0:0) баҳс. Ўша учрашувда «Сьон» озчиликда тўп сурган, Балотелли эса сариқ карточка олганди. Нима учун, дейсизми? Рақиб жамоа мухлисларига ҳақорат ишорасини йўллагани учун.
Учрашувдан кейин Марио инстаграм орқали Швейцария ФФни коррупцияда айблади: «Мафиянгиз қандай эканлигини билмайман, лекин ишонинг, менга ўхшаган ўйинчиларга адолатсизлик, коррупция ва масъулиятсизлик ҳукмронлик қиладиган лигада фаолият юритиш умуман ёқмайди. Футбол - бизнинг касбимиз. Шундай экан, барчамиз унга нисбатан жиддий муносабатда бўлишимиз лозим. Жумладан, ҳакамлар ҳам. Мен рақиб футболчиларнинг қўполликлари ва мухлисларнинг таҳдидлари туфайли саломатлигимга путур етишини истамайман. Бу ерда қандай муҳитга мослашиб олганингизни билмайман, бироқ сиз уни имкони борича тезроқ ўзгартиришингиз керак. Жаҳон жамоатчилиги эса бу лигага эътибор қаратиб, қандай шармандаликлар юз бераётганини кўриши лозим. Мен хатога йўл қўйсам, бунинг учун жавоб бераман. Федерация хатоликкайўл қўйса, у ҳам жавоб беради. Ҳакам хато қилдими? У ҳам жавоб бериши шарт».
Таажжубки, Балотеллининг фикр-мулоҳазаларини «Сьон» президенти Кристиан Константин ҳам қўллаб-қувватлади. У ҳам амалдорларни жиддий танқид қилиб, футболчи ўзини ҳимоя қилиш ҳуқуқига эга эканлигини таъкидлади.
Қишки танаффусдан кейин Марио 4 учрашувнинг 3тасида майдонга туша олмади - 2таси амалга оширган шўхликлари учун, биттаси жароҳат олгани сабабли. Швейцариялик журналистларнинг таъкидларига кўра, клуб ана шу енгил жазолар эвазига Мариони жамоани тарк этишдан асраб қолган.
Омадсиз ўйинларга қорни баҳона қилди, муштлашувда тасодифан клуб президенти ўғлини уриб юборди
Қишда «Сьон»нинг ўйинлари янада пасайиб кетди, яқинда келган мураббий алмаштирилди, Балотелли эса сардорлик боғичини олди. Хўш, янги сардор жамоанинг муваффақиятсизлигида кимни айблади? Об-ҳавони. Ахир шаҳар ва стадион қордан тозаланмаган шароитда футболчилар қандай қилиб ўйинларга тайёргарлик кўришлари мумкин?
Ўша кунларнинг бирида «Сьон» президентининг ўғли Мариони маҳаллий анъаналар билан таништиришга қарор қилган ва ўйиндан кейин шаҳардаги карнавалга олиб борганди. Улар кийимларини алмаштирган бўлсаларда, тадбир иштирокчилари барибир Марио ва кичик Константинни таниб қолишди. Кейин суратга олишга уринишлар бошланиб, якунда ўзаро муштлашувга айланиб кетди. Тўс-тўполонда Марио тасодифан ўз ҳамроҳини уриб юборди.
Можародан кейинги учрашувда мухлислар трибуналарда Балотеллининг футболкаларини ёқиб юборишди. Ваҳоланки, у ҳамон сардорлик боғичида эди. Бироқ жамоа аутсайдерлар ҳудудига янада яқинлашиб қолганди.
«Сьон»нинг навбатдаги бош мураббийи этиб Зиданнинг собиқ ёрдамчиси Давид Беттони тайинланди. Бироқ бу ўзгариш ҳам самара бермади. Беттони ва Балотелли учун сўнгги учрашув бўлган баҳсда жамоа «Серветт»дан 5та жавобсиз гол қабул қилиб олди. Энг ажабланарли жиҳати, танаффусдан кейин Марио майдонга тушишни истамади, мураббий ҳам танаффус пайтида лавозимидан четлатилди.
Чемпионатнинг якуний босқичидаги 10та ўйиннинг 3тасида Марио иштирок этди. Жамоа ана шу давр ичида битта ғалаба ва дурангга эришди, ўша ягона ғалабага Балотелли ҳисобни очиш билан муҳим ҳисса қўшди.
Ҳал қилувчи баҳслар ўрнига ЕЧЛ финалига саёҳат
«Сьон» мавсумни сўнгги - 10-ўринда якунлади - жон сақлаб қолиш учун кечган охирги беллашувларда Балотелли қатнашмади, у ҳатто «заявка»да ҳам йўқ эди. Лекин ўзининг собиқ жамоалари - «Интер» ва «Манчестер Сити» ўртасидаги ЕЧЛ финалида иштирок этди. Уни BT Sport телеканали эксперт сифатида таклиф этганди. Шарҳловчи Жейк Хамфри Мариога қайси жамоа ғалаба қозонади, саволини берганида, у «изоҳга ҳожат йўқ» деганди. «Мана шу таҳлил учун биз 1000 евро гонорар бердик» дейди шарҳловчи ҳазиллашиб.
Кейинчалик Балотелли ўз фикрини ошкор этди: «Очиғини айтганда, мен ҳеч қайси жамоа мухлиси эмасман, қайсиси ғолиб чиқишининг мен учун фарқи йўқ. Муҳими, ўйиннинг асосий вақтда ниҳоясига етиши. Чунки Истанбул йўллари жуда тиқилинч бўлади».
«Сьон» Балотелли билан ҳамкорликни тўхтатди. «Адана Демирспор»га қайтиш Марио учун ягона йўл эди. Ҳозир у ерда Артём Зюба ҳам, Винченцо Монтелла ҳам йўқ. Янги мавсумда Мариони Патрик Клюйверт муҳитга мослаштиришга уриниб кўради. Ва айтиш ўринли, «Супер Марио» Туркия клубидаги дебют ўйинидаёқ тили билан бирга оёқлари ҳам ҳамон «бурро» эканлигини кўрсатиб қўйди: Туркия Суперлигаси 7-тур доирасидаги «Алантяспор»га қарши ўйин (4:0)да майдонда 60 дақиқа ҳаракат қилган Балотелли дубль қайд этди.
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
