«Erudit Sport» nashri quyida tomoshabop o‘tishi kutilayotgan besh to‘qnashuvni tomosha qilishni tavsiya etadi:
№5-match: “Lasio” – “Milan”
(13 fevral, dushanba, soat: 00:45)
O‘zaro uchrashuvlar:
27 G‘ALABA 57 DURANG 63 G‘ALABA
So‘nggi uchrashuv: “Lasio” – “Milan” 1:1 va 0:2
Imkoniyat: 30/40/30
Jamoalarning transfer qiymati:
“Lasio” – “Milan”
170,20 million yevro VS 224,80 million yevro
O‘yin haqida ikki og‘iz:
“Rossonerilar” tomondan “quyosh chiqqanidan” xursand bo‘lgan ishqibozlarning quvonchi uzoqqa cho‘zilmadi. Yigirma tur davomida kuchli uchlikda qorasi ko‘ringach, yana so‘nggi yillardagi o‘rniga qaytdi. Ochko yo‘qotish “qon bilan” kirganmi, keyingi olti turda bor-yo‘g‘i besh ochko ishladi. Qiziq, “Milan”ga ko‘z tegdimi yoki yana yo‘lini yo‘qotib qo‘ydi? Tabiiyki, murabbiy Vinchenso Montella barchasi joyida ekanligini isbotlash payida bo‘ladi. Bir vaqtning o‘zida “Lasio”ning ham ishlari joyida emas. O‘xshatmasdan uchratmas, deganlaridek, A Seriyadagi eng ko‘p legionerni shug‘ullantirayotgan Simone Indzagiga ham barqarorlik begona. Demak, tur davomida birinchilikda ketma-ket o‘rinlarni egallab turgan raqiblar o‘zaro uchrashuvda masalaga oydinlik kiritadi. Tiffozilar mazkur matchni ko‘rish asnosida zerikmasliklari tayin.
№4-match: “Real” Madrid – “Napoli”
(15 fevral, chorshanba, soat: 00:45)
O‘zaro uchrashuvlar:
1 G‘ALABA 1 DURANG 0 G‘ALABA
So‘nggi uchrashuv: “Real” Madrid – “Napoli” 1:1 va 2:0
Imkoniyat: 40/30/30
Jamoalarning transfer qiymati:
“Real” Madrid – “Napoli”
766,80 million yevro VS 324,75 million yevro
O‘yin haqida ikki og‘iz:
“Napoli” (26,7 yosh) o‘zidan uch oylik katta “Real”ga (27 yosh) qarshilik ko‘rsatishga hozirlik ko‘rmoqda. Birinchi navbatda, mutaxassis Maurisio Sarri shogirdlari Madridga o‘z chempionatlarining goleador jamoasi sifatida tashrif buyuradi. Madridliklar tezlikni tushirgani ba’zi muxlislarning toqatini toq qilgani rost. “Qirollik klubi” Kubokni tark etdi, mag‘lubiyatsiz o‘yinlar seriyasi nihoyasiga yetdi. Aksincha “Azzurilar” o‘n bir matchdan beri raqiblariga yutqazmaydi. Statistik ma’lumotlarga qaraganda, qarama-qarshilik ishtirokchilarining imkoniyatlari deyarli teng. Zidan ko‘rsatmalarini bajarayotgan o‘yinchilar bir o‘yinda o‘rtacha hisobda darvozaga 17,8 zarba yo‘llaydi. Qizig‘i, mehmonlarda ham xuddi shunday ko‘rsatkich. “Napoli” a’zolari uzatayotgan paslarning 87,2 foizi, maydon egalarining 86,5 foiz uzatmalari manziliga aniq boradi.
№3-match: “Liverpul – “Tottenxem”
(11 fevral, shanba, soat: 22:30)
O‘zaro uchrashuvlar:
22 G‘ALABA 22 DURANG 41 G‘ALABA
So‘nggi uchrashuv: “Liverpul – “Tottenxem” 1:1 va 1:1
Imkoniyat: 30/40/30
Jamoalarning transfer qiymati:
“Liverpul – “Tottenxem”
376,70 million yevro VS 370 million yevro
O‘yin haqida ikki og‘iz:
O‘zaro uchrashuvlarning oxirgi uchtasida durang kuzatilgan bo‘lsada, “Taqachilar” sakkiz matchdirki, “Liverpul” qarshiligini sindira bilmaydi. Boz ustiga, o‘sha o‘yinlarda “Qizillar” yaqqol ustunlikni namoyish etib, raqib darvozasiga kamida uch marta yo‘l topgan. Hozir esa “Tottenxem” yoshlik g‘ayrati va shijoatini (Premyer ligadagi eng yosh jamoa) namoyish qilmoqda. To‘g‘ri, hali Yurgen Klopp hech narsani yo‘qotmadi. Ammo amaldagi vaziyat “Liverpul” uchun ancha qaltis bo‘lib, klubning ochko yo‘qotishi yakunda amaldagi o‘rnini boy berishiga olib keladi. Eng qizig‘i, chempionatda darvozalarga zarba berishda Pochettino qo‘l ostidagi futbolchilarga yetadigani yo‘q (17,6 zarba). Shunga qaramay, Premyer ligada hisobiga eng ko‘p gol yozdirib qo‘yish “Liverpul”ga nasib etgan.
№2-match: “PSJ” – “Barselona”
(14 fevral, seshanba, soat: 00:45)
O‘zaro uchrashuvlar:
2 G‘ALABA 3 DURANG 3 G‘ALABA
So‘nggi uchrashuv: “PSJ” – “Barselona” 1:3 va 0:2
Imkoniyat: 30/30/40
Jamoalarning transfer qiymati:
“PSJ” – “Barselona”
455,90 million yevro VS 753,50 million yevro
O‘yin haqida ikki og‘iz:
Tomonlarning keyingi bosqichga chiqish imkoniyatini ellikka ellik qiymatida baholash mumkin. Maydon egalari kamida La liga vakillari “Betis” va “Vilyarreal” uddasidan chiqqan ishni takrorlashi kerak. Mutaxassis Unay Emeri yuqoridagi ikki jamoa ustozlarining master-klassiga e’tibor qaratishi ahamiyatlidir (har ikki matchda “Barsa” 90-daqiqada mag‘lubiyatdan qutulib qolgan). Ustiga-ustak, “Barselona”ni ispan mutaxassisining “kubokchi” ekani havotirga solmoqda. O‘z navbatida, Luis Enrikeni ham bahsga jiddiy tayyorgarlik ko‘rishga undaydi. Shunisi e’tiborliki, jamoalar Chempionlar ligasi pley-offida to‘rt marotaba to‘qnashgan bo‘lsa, ularning uchtasida katalon klubi musobaqani davom ettirgan. Faqat 1994/1995 yilgi mavsumda parijliklarning omadi chopib, keyingi bosqich yo‘llanmasini qo‘lga kiritgan. O‘z-o‘zidan, Emeridan bu noxush an’anaga ham chek qo‘yish talab etiladi.
№1-match: “Bavariya” – “Arsenal”
(15 fevral, chorshanba, soat: 00:45)
O‘zaro uchrashuvlar:
5 G‘ALABA 2 DURANG 3 G‘ALABA
So‘nggi uchrashuv: “Bavariya” – “Arsenal” 0:2 va 5:1
Imkoniyat: 30/40/30
Jamoalarning transfer qiymati:
“Bavariya” – “Arsenal”
578,65 million yevro VS 489,50 million yevro
O‘yin haqida ikki og‘iz:
Mana olti mavsum “Arsenal” Chempionlar ligasidagi ishtirokini nimchorak finaldayoq yakunlaydi. “To‘pchilar” to‘rt mavsum ketma-ket dastlabki o‘yinni o‘z maydonida o‘tkazgan. Endilikda, tegirmon navbati bilan ekan, londonliklar yurishni mehmondan boshlaydi. Ya’ni, londonliklar mehmonda urilgan gol evaziga biroz ustunlikka ega bo‘lishi mumkin. Biroq statistika “Nemis mashinasi” foydasiga ishlamoqda. Shu kungacha “Bavariya” bilan uch bora 1/8 finalda yuzlashgan Venger janoblari raqib oldida “ip esholmagan”. Demak, fransuz mutaxassisi “bir toshga” to‘rtinchi marta qoqilmaslikka intiladi. Katta ehtimol bilan dastlabki bellashuvda myunxenliklar yaxshigina qarshilikni sindirishga to‘g‘ri keladi. Xo‘sh, “Karlo ota”ning “Buratino”lari bu bosimga dosh beradimi? Yuqoridagi faktlarni umumlashtirsak, tomoshabinlar kurashlarga boy matchning guvohiga aylanishini taxmin qilish mumkin.
Ulug‘bek RAHMONQULOV
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
