Ispaniya primerosida hakamlik masalasiga bog‘liq navbatdagi mojaro yuzaga kelgach, mahalliy jurnalistlar alohida «tergov» uyushtirib, referilar chempionat ishtirokchilaridan qanday esdalik sovg‘alari olishlarini aniqlashdi. Gap shundaki, «Vilyarreal» - «Real» o‘yini (24-tur)dan so‘ng mezbon jamoa prezidenti Fernando Royg kutilmagan bayonot bilan chiqdi: «Hakamlar brigadasi vakillari stadiondan «Real» belgisidagi sovg‘alarni ko‘targancha mamnun chiqib ketishdi. Menimcha, bu noto‘g‘ri ish...». Ispaniyalik milliarder shuning barobarida referi Xil Mansanoning ishiga ochiq-oshkora e’tiroz bildirdi. Keyinchalik Hakamlar qo‘mitasi vaziyatga aralashib, «Real» tomonidan berilgan sovg‘alar moddiy qadriyatga ega bo‘lmaganini ma’lum qildi. «Madrid» rahbariyati hakamlarga shunchaki, minnatdorchilik va hurmat nuqtai nazaridan klub ramzi tushirilgan kalitilgich, nishon va oddiy ruchkalar bergan emish. Eslatish joiz, o‘sha bahsda madridliklar 3:2 hisobida g‘alaba qozonishgandi. Xullas, Marca gazetasi jurnalistlar izlanishlari samarasi o‘laroq, ispan klublari tomonidan hakamlarga tortiq etiladigan esdalik sovg‘alari ro‘yxatini tuzib chiqdi.
«Alaves»
Bu klub har bir hakamni bir quti shirinlik va o‘yin avvalida olingan surat tushirilgan fleshka bilan siylaydi. «Alaves» vakillari uchrashuv rasmiylariga shu tariqa minnatdorchilik bildirishni odat tusiga olib kirishgan. Ya’ni jamoa qanday natija qayd etishidan qat’iy nazar, ular quruq qaytmaydilar.
«Atletik»
Bilbaoliklar avvallari hakamlarga jamoa formasi yoki «Atletik» ramzi tushirilgan hammom xalati berishardi. Endilikda maxsus tayyorlangan vimpellar tortiq etish bilan cheklanishyapti.
«Atletiko»
«Matraschilar» o‘yinini boshqargan referi maxsus nishon yoki vimpel olishga ko‘z tikishi mumkin, xolos. «Atletiko» bu masalada ancha ziqna.
«Barselona»
Kataloniyaliklar odatga ko‘ra, hakamlar brigadasiga bitta katta va bir nechta kichik vimpel hozirlab qo‘yishadi. To‘g‘ri, ba’zan himmatlari oshib ketsa, klub logotipi tushirilgan soatlar berishlari mumkin.
«Betis»
Faqat vimpel - bu klubdan boshqa narsa kutish befoyda.
«Valensiya»
«Ko‘rshapalaklar» avvallari hakamlarga keramik haykalchalar tortiq etish orqali minnatdorchilik izhor qilishardi. Lekin ayni payt «Valensiya»ning sovg‘a «quti»si klub jurnali, vimpellar, nishonlar, ruchkalar va formalardan iborat.
«Vilyarreal»
Bu jamoa ham avvallari aksariyat ishtirokchilar kabi maxsus nishon va vimpellar tarqatardi. Oxirgi vaqtlarda esa hakamlarni quruq qo‘l bilan qaytarishga odatlandi. To‘g‘ri, «Vilyarreal» rahbariyati yevrokuboklar doirasidagi o‘yinlarda ziqnalikni unutib, UYEFA tomonidan yuborilgan barcha rasmiylarga maxsus likopcha, klub formasi yoki suvosti kemasining kichik nusxasini beradi.
«Granada»
Kamtarona yondashuv. Hakamlar bu jamoadan atigi maxsus nishon olishadi.
«Deportivo»
«Depor» hozirda klub nishonlari berish bilan cheklanyapti. Oldinlari esa o‘yinda ishlagan hakamlar o‘z xotinlariga atalgan sirg‘alar va Ispaniyaning eng mashhur kompaniyasida ishlangan sopol idishlar to‘plami bilan qaytishardi.
«Las-Palmas»
Klub xodimlari hakamlar uchun ayni ular ishlagan o‘yin chog‘i olingan suratlardan tezkor ravishda maxsus fotoalbom tayyorlashadi. Chinakam esdalik.
«Leganes»
Jamoa o‘yinlardan so‘ng nafaqat o‘z futbolchilari, balki raqiblar va hakamlarni pissaxo‘rlikka taklif etadi. Xayrlashish chog‘i esa mehmonlarga vimpel va nishonlar beriladi.
«Malaga»
Malagaliklar bu borada «Las-Palmas» yo‘lini tanlashgan - hakamlar o‘yin suratlaridan tarkib topgan maxsus albom olishadi.
«Osasuna»
Bu jamoa o‘yiniga tayinlangan referi ko‘pi bilan maxsus nishonga umid bog‘lashi mumkin.
«Real»
Hakamlarga ham, raqib jamoa futbolchilariga ham «Real»ning muayyan o‘yinchisi raqami yozilgan forma taklif etiladi. Gohida futbolka yozuvsiz bo‘lishi ham mumkin. Bunga nishonlar, kalitilgichlar va ruchkalar qo‘shiladi.
«Real Sosyedad»
Klub hakamlarni esdalik sovg‘alarisiz qaytarmaydi. Xususan, referi ko‘pincha «Real Sosyedad»ning original futbolkasini oladi.
«Sevilya»
Standart to‘plam: nishon, vimpel va klub futbolkasi.
«Selta»
Kamtarona sovg‘alar to‘plami - maxsus nishon yoki oddiy vimpel.
«Sporting»
Hakamlar bu jamoadan hech vaqo olmaydilar.
«Espanyol»
Kataloniyaning ikkinchi raqamli klubi ham o‘z maydoni, ham safardagi o‘yinlardan so‘ng hakamlarga nimadir beradigan ishtirokchilardan biridir. To‘g‘ri, ayni payt jamoaning sovg‘alar to‘plami ancha g‘arib ko‘rinishda - nishonlar va vimpellar. Lekin oldinlari hakamlar brigadasiga dengiz mahsulotlari tortiq etilardi.
«Eybar»
Hakamlar o‘tgan mavsum klubning 75 yilligi sharafiga chiqarilgan bejirim albom olishgandi. E’tiborlisi, «Eybar» hozirgacha shunday albom tortiq qilyapti. Ya’ni avvalgi chempionatda «Ipurua» stadionida ishlamagan referilarga aynan fotosuratlar jamlanmasi berilyapti.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
