Musobaqa yakuniga 7 tur qolganida «Spartak» RPLda yaqin ta’qibchisidan 10 ochkoga oldinda bormoqda. Biroq orziqib kutilayotgan chempionlikni nishonlashga Massimo Karrera shogirdlari oshiqishmayapti. Bu - chinakam professionallarga xos fazilat. Chunki futbol olami uzoq vaqt davomida peshqadamlik qilib, so‘nggi pallada deyarli naqd bo‘lgan chempionlikni raqiblariga berib qo‘ygan jamoalarga ko‘p shohid bo‘lgan. Quyidagi maqola finishda sovrindan chetda qolgan «chala chempionlik» haqida.
«Nyukasl» - 1995|1996 yillar mavsumi
Marraga 13 tur qolganida 12 ochko oldinda bo‘lgan
O‘sha mavsum «MYU» uchun UYEFA kubogining saralashi doirasida «Rotor»dan qabul qilingan alamli mag‘lubiyat bilan boshlangandi. Ichki musobaqada ham «qizil iblislar»ning omadi chopmay, «Nyukasl»ni oldinga o‘tkazib yuborishdi. Fevralga kelib Kevin Kigan shogirdlari «MYU»dan 12 ochko ilgarilab ketishdi. Garchi oldinda 13 tur bo‘lsada, aksariyat mutaxassislar «Nyukasl»ning 69 yil ichidagi ilk chempionligiga shubha qilishmayotgandi. Falokat «Vest Xem» va aynan «MYU»ga qarshi bahslardagi omadsizlikdan boshlandi. O‘rtadagi farq shiddat bilan qisqarib, olti uchrashuvdan so‘ng butunlay barham topdi. Shundan keyin «qon» hidini sezgan Aleks Fergyuson shogirdlari «Nyukasl»ni oldinga o‘tkazib yubormadilar. Oxirgi ikki turda g‘alabaga erishdilar. «Nyukasl» esa «Nottingem Forest» hamda «Tottenxem» bilan murosa yo‘lini tanlab durangga erishdi.
Keyingi mavsumda ham Kigan jamoasi birinchi davrani yetakchi maqomida tugatdi, biroq yakunda yana ikkinchi bo‘ldi. Shundan keyin sovrindorlar safiga ko‘tarila olmagan jamoa hozirda APLga chiqish uchun kurashmoqda.
«MYU» - 1997|1998 yillar mavsumi
Marraga 16 tur qolganida 11 ochko oldinda bo‘lgan
Oradan ikki yil o‘tgach, endi «MYU» «chala chempion» maqomini olishga majbur bo‘ldi. Unvon uchun so‘nggi turga qadar ayovsiz kurash olib borish lozimligini bir yildan beri Arsen Venger rahbarligida to‘p surayotgan «Arsenal» amalda isbotladi. Vaholanki, ser Aleks jamoasi olti uchrashuvdan iborat g‘alabalar seriyasi evaziga yangi yilni yakka peshqadam sifatida kutib olgan, ikkinchi o‘rindagi «Arsenal» bilan 11 ochkolik tafovutni ta’minlashgandi. Aynan o‘sha pallada endigina ish boshlagan Arsen Venger shogirdlarining omadsizligiga taqvimning noqulayligini bahona qilgan, bu esa Fergyusonning jig‘iga tekkandi. Shu tariqa fransiyalik va shotlandiyalik murabbiylarning yashil maydondagi qarama-qarshiligi shaxsiy xusumatga aylandi. Oqibatda ikki grand o‘rtasidagi tortishuvga bo‘lgan e’tibor yanada oshdi. O‘sha mavsum Venger kasbdoshidan uzr surashga majbur bo‘lmadi. Chunki ikkinchi davrada o‘zining haq ekanligini isbotladi - barcha uchrashuvlarni mag‘lubiyatsiz o‘tkazgan «to‘pchilar» muddatidan avval chempionlikni rasmiylashtirishdi.
«Arsenal» - 2002|2003 yillar mavsumi
Marraga 10 tur qolganida 5 ochko oldinda bo‘lgan
2003 yili londonliklar qatorasiga ikkinchi marta «Oltin dubl»ni qayd etish tadorigini ko‘rishayotgandi. Rojdestvo tantanalaridan keyin jamoa «MYU»dan ilgarilab ketdi. Keyingi bahslarni ham ko‘ngildagidek o‘tkazgan bo‘lsada, baribir, maqsadga erisholmadi - Fergyuson o‘z shogirdlari bilan shiddatli finishni ta’minladi. Oxirgi 18ta uchrashuvda erishilgan 15ta g‘alaba, 3ta durang tojni «Arsenal»dan tortib olish uchun yetarli bo‘ldi.
«Real» - 2003|2004 yillar mavsumi
Marraga 12 tur qolganida 8 ochko oldinda bo‘lgan
Tarkibiga Devid Bekxem, Luish Figu, Zayniddin Zidan va Ronaldoni jamlagan «Qirollik klubi» fantastik g‘alabalarga ham, ajabtovur mag‘lubiyatlarga ham qodir edi. 2004 yili bahorda ta’qibchilardan 8 ochkoga ilgarilab ketgan jamoaning unvonni himoya qilishiga mone’lik qiladigan alomatlar yo‘q edi. Tafovut unchalik katta bo‘lmasada, «Real» ayni tobiga kelgan holatda edi. Keyinchalik yuz bergan voqealar hanuzgacha futbol olamining buyuk jumbog‘i bo‘lib qolmoqda. Karlush Keyrush shogirdlari butun mavsum davomida misqollab yig‘ilgan ustunlikni bor-yo‘g‘i 5ta uchrashuvda yo‘qqa chiqarishdi. Vaholanki, Madrid derbisidagi «Atletiko» ustidan qozonilgan g‘alaba «Qirollik klubi»ning birinchi o‘ringa ko‘tarilishini ta’minlagandi. Lekin qatorasiga boy berilgan beshta bellashuv jamoani nafaqat chempionlik, balki sovrinli o‘rinlardan ham mahrum etdi.
«Monako» - 2003|2004 yillar mavsumi
Marraga 19 tur qolganida 10 ochko oldinda bo‘lgan
Mavsum knyazlik klubi uchun omadsiz yakunlandi. Birinchi davrani yuksak saviyada o‘tkazgan monegasklar ta’tilga «Lion»ni mag‘lubiyatga uchratgan holda yo‘l olishgandi. Ikkinchi davra o‘yinlarida «Monako»ni umuman tanib bo‘lmay qoldi - g‘alabalar qariyb ikki baravarga kamaydi, duranglar ko‘payib ketdi. Ayniqsa, asosiy ta’qibchilarni mag‘lub eta olishmagani salbiy ta’sir o‘tkazdi. Ochkolardagi ustunlik turdan-turga qisqarib bordi. Jamoa nafaqat «Lion», balki «PSJ»ni ham oldinga o‘tkazib yubordi. Nihoyat, uzoq yillik tanaffusdan so‘ng «Monako» joriy mavsumda nufuzli sovrin sari dadil odimlamoqda. Ko‘z tegmasin!
«Lokomotiv» (Moskva) - 2004|2005 yillar mavsumi
Marraga 8 tur qolganida 7 ochko oldinda bo‘lgan
DAVOMI
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
