«Real» yana haddidan oshmoqda - bolalikning beg‘ubor jo‘shqinliklaridan forig‘ bo‘lmagani bois, vaqtini Play Station va varraklarga sarflaydigan 16 yoshli braziliyalik yigitcha eng shov-shuvli kelishuv qahramoniga aylandi. U tufayli qizg‘in bahs-munozaralarga berilib ketgan futbol jamoatchiligi mavsumning muhim voqealari - YECHL va YEL finallarini ham unutib qo‘yishgandek, go‘yo.
Kelishuv
Darhaqiqat, Braziliyaning «Flamengo» klubi Vinisius Junior uchun «qirollik klubidan» «yurib turgan» pulda 61 million yevro oladigan bo‘ldi. Mablag‘ning 45 millioni bevosita jamoa g‘aznasiga, 16 millioni esa Vinisiusning hisob raqamiga tushadi. Prezidentning futbolchi va agentlariga bo‘lgan o‘ziga xos tashakkuri sifatida. Yana kimlardir bonus sifatida rag‘batlantirilishini inobatga olsak, kelishuvning umumiy qiymati 70 milliondan oshadi. Vaholanki, 16 yoshli Junior hali biror marta professional darajada maydonga tushgan emas, o‘tgan haftada «Flamengo»ning asosiy tarkibi bilan ilk mashg‘ulotini o‘tkazdi. Xullas, 16ga 61. Benzema Modrich va Krooslar transferidan qimmatroq!
O‘yini
Vinisiusning faoliyati kamtarin San-Gonsalu shaharchasida boshlandi. Bolakay asosiy vaqtini plyaj va mini-futbol maydonlarida o‘tkazib, «Flamengo» akademiyasidan juda barvaqt joy oldi. E’tiborli jihati shundaki, Junior doimo o‘zidan kattaroq bolalar guruhida saboq oldi.
Futbolchi ikki yildan beri yevropalik skautlarning diqqat markazida. O‘tgan yili u U-15 toifasida Sudamerikano (Amerika kubogining o‘smirlar o‘rtasidagi turniri) musobaqasida porlab, 6 uchrashuvda 6ta gol urdi va chempionlik unvoniga sazovor bo‘ldi. Bundan atigi ikki oy avval esa uning mahoratiga hamon shubha bilan qarayotgan mutaxassislarni butunlay o‘ziga og‘dirdi. U-17 o‘rtasidagi Janubiy Amerika kubogi turniri amalda Braziliyaning benefisiga aylandi. Junior esa turnirni 7 gol bilan yakunlab, eng yaxshi to‘purar va eng yaxshi futbolchi sovrinlariga ega bo‘ldi.
O‘z jamoadoshlari orasida Vinisius jismoniy quvvati, zarbaning kuchi va aniqligi bilan yaqqol ajralib turadi. Barcha sohalarda u tengdoshlaridan shunchalik ilgarilab ketganki, maydonda ular Juniorga yaqinlasha olmaydilar, yaqinlashganlari esa xuddi stol qirg‘og‘iga urilgan bilyard shari kabi ortga uchib ketishadi. Albatta, har qanday shartli Neymarning o‘z kushandasi - Vellington Silvasi bo‘lganidek Vinisiusni jilovlay oladigan qo‘riqchi ham topiladi. qolaversa, Junior va unga o‘xshab barvaqt yetilgan futbolchilarning hammasi ham katta futboldan munosib joy olavermaydilar. Futboldagi noyob iqtidor ham Braziliya uchun yangilik emas. Masalan, uning yoshida Gabriel Jezus Juniordan ko‘ra rangbarangroq, shiddatli va samaraliroq to‘p surardi.
Tabiati
Vinisius - haqiqiy braziliyalik, plyaj va karnavallar o‘g‘loni. Anchayin sodda, biroz dangasaligi ham yo‘q emas. Ko‘pchilik tengdoshlari kabi shon-shuhratga o‘ch, maqtanishni xush ko‘radi. Ikki yil avval «Flamengo» 15 yoshli iqtidor sohibi bilan shartnoma imzolash jarayonida bir qator muammolarga duch keldi. Klub sohibining aytishicha, avvaliga Juniorga ham hamma qatori standart bitim taklif etishgan. Futbolchi rad etgan. Keyin unga o‘smirlar uchun o‘ta manfaatli shartnomani taklif etishgan. Lekin bu safar ham rad javobi olingan. Nihoyat, uchinchi urinishda aql bovar qilmas darajadagi bahoda kelishuvga erishilgan. Tabiiyki, har qanday noyob iqtidor sohibining ortida manfaatparast ota yoki agent turadi. Vinisius ortida esa butun bir jamoa - Traffic kompaniyasi turibdi. Ha, bir paytlari «Barselona»ga Keyrrisonni tiqishtirgan o‘rtachi.
Darvoqe, Junior aslida «Barselona» safidan joy olishga yaqin turgandi, kataloniyaliklar yanvar oyida Vinisius va «Flamengo» vakillari bilan muzokaraga kirishishgan, Bartomeu transfer uchun 30 million yevro ajratgan, futbolchi esa «Barselona-B» safida maydonga tushish tadorigida edi. Ayni o‘sha paytlarda futbolchi Play Stationda faqat «Barsa»ni tanlar, Messini Ronaldudan kuchliroq, deb hisoblardi.
Biroq kutilmaganda «Real» paydo bo‘lib, vaziyatni butunlay o‘zgartirib ketdi. Bahoni 15 millionga oshirgan Peres «Flamengo» sohibining qalin do‘stiga aylandi. Keyin futbolchining ota-onasi va agentlarini 16 million bilan siylashni lozim topdi. Shu tariqa Ronaldu Messidan kuchliroq bo‘lib qoldi. Nima uchun Peres bunchalik saxovat ko‘rsatmoqda?
Janubiy Amerika chempionati (U-17) - Junior faoliyatidagi yagona, lekin o‘ta yorqin turnir. O‘sha musobaqada Karlos Amadeu o‘z shogirdini «qora ishlar»dan ozod etib, faqat gol urish vazifasini yukladi. Terma jamoa Vinisius uchun to‘p suradi, u esa natijani ta’minlaydi. «Real»da Krishtianu Ronaldu shu vazifani ado etmoqda. Demak, portugaliyalik hujumchi o‘rnini aynan Junior to‘ldira oladi. Peres esa aynan shunday vorisni izlab yurgandi. Bu yo‘lda mablag‘ini ayamay, maqsadga erishdi. Ha, pul bo‘lsa, changalda sho‘rva!
Sho‘rtan
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
