Puyol va Ramos, Ronaldinyo va Pirlo, Maldini va Totti - bu futbol yulduzlarini qanday xislatlar birlashtiradi? Albatta, mashhurlik va Tiempo butsalariga bo‘lgan sadoqat.
«Sezyapsizmi, ular o‘ta yengil, xuddi vazni yo‘qdek?! Oyoqlaringiz yengil harakatlanadi, to‘pni badaningiz bilan his qilasiz. Demak, uzatma va zarbalar aniqligi oshadi» - Tiempo butsalarining yettinchi avlodi taqdimot marosimiga tashrif buyurgan mehmonlarga yangi mahsulotning afzalliklarini namoyish etish uchun Mett Myurrey mashg‘ulot o‘tkazmoqda. Qattiqqo‘l murabbiy rahbarligida futbolchilar astoydil ter to‘kishmoqda. Samara ham shunga yarasha - tezlanish, to‘pni egallab olish, tezkor kombinasiya va gol! Xo‘sh, oyoqda bor yoki yo‘qligi sezilmaydigan poyabzal eng yaxshisi ekanda, a? Ha, aynan shunday! Nike kompaniyasining «futbol poyabzallari» bo‘limi bosh menejeri Joel Begbining ta’kidlashicha, Tiempo Legend-7 butsalarining vazni aynan futbolchilarning takliflariga binoan 22 foizga yengillashgan. Hyperstability texnologiyasi asosida yaratilgan mahsulot maydon va to‘p bilan o‘ta erkin muomalani ta’minlaydi. Firmaning turdosh korxonalaridan asosiy ustunligi shunda. Keling, endi Tiempo butsalari yordamida afsona maqomiga erishgan futbolchilar va ularning alohida fazilatlarini yodga olaylik.
Serxio Ramos
Asosiy xislati: hal qiluvchi bahslardagi muhim gollar muallifi.
Istagan «Real» muxlisidan 92,48 raqamlari nimani anglatishi haqida so‘rasangiz, o‘sha zahoti javob qaytaradi: aynan shu daqiqa va soniyada Serxio Ramos YECHL finalining taqdirini hal qilib, jamoa «desima»ga erishishini ta’minlagan! Sardor qandaydir xatoliklarga yo‘l qo‘yishi mumkin. Lekin uning aynan 90-daqiqada «uyg‘onishi» va ovchilik san’atini ishga solishi butun dunyoga ma’lum.
Andrea Pirlo
Asosiy xislati: vaziyatni aniq baholash va qaqshatqich zarbalar yo‘llash.
«2006 yilning 9 iyulida tushkunlikdan so‘ng biroz dam oldim, keyin Play Station o‘ynadim. Shu oqshom jahon chempionligi unvonini qo‘lga kiritdim», - deb yozgandi Pirlo o‘z avtobiografik asarida. Tug‘ma dispetcher qobiliyatiga ega bo‘lgan futbolchi zargarona uzatmalari bilan dong taratgan. Ehtimol, uning Germaniyaga qarshi kechgan yarim finaldagi uzatmalari, «Parma» bilan o‘yindagi antiqa «cho‘mich» uslubi va Konfederasiyalar kubogi-2009dagi fantastik reydi allaqachon futbol durdonalari xazinasidan joy olib ulgurgandir? Qolaversa, u «Yuventus»ning qad rostlashiga salmoqli hissa qo‘shdi.
Ronaldinyo
Asosiy xislati: sehrli tabassum va hayratomuz fintlar.
Kelajak avlod vakillari bu futbolchini chinakam afsungar sifatida xotirlashsa, ajabmas. U kashf etgan «kamalak» uslubi bir qarashda 3-4 nafar futbolchini dog‘da qoldirish imkonini beradi. Oyoqlari o‘ta yengil harakatlanar, to‘p ham go‘yo yelimlanib qolgandek tuyulardi. Ishini qoyillatib qo‘ygani bois, yuzidan tabassum arimasdi. Afsuski, uning faoliyati chaqmoqdek o‘tdi-ketdi. Yanada achinarlisi, zamonaviy futbolda bunday afsungarlar qadrlanmaydigan bo‘lib qoldi.
Karles Puyol
Asosiy xislati: mukammal odob va sadoqat.
Futbol olamidagi eng ko‘rkam jingalak soch sohibi. Ana shu tabiiy sifati uchun Puyol «Tarzan» taxallusini olgan, havodagi to‘plarni egallab olish chog‘ida raqibni ayab o‘tirmagan. E’tiborlisi, YECHLda so‘nggi kubokni qo‘lga kiritganida Karles sovrinni sardor sifatida birinchi bo‘lib ko‘tarishdan bosh tortib, ushbu sharafli vazifani Erik Abidalga topshirdi. Bunchalik qalbi daryo, oliy himmat futbolchilar hozirda juda kamayib ketgan.
Paolo Maldini
Asosiy xislati: mustahkam himoya.
Futbolga bo‘lgan muhabbat va sadoqatning yana bir namunasi. U ashaddiy «rossoneri» bo‘lmish Chezare Maldinining oilasida dunyoga keldi va bolaligidan faqat «Milan» safida to‘p surish orzusi bilan ulg‘aydi. 16 yoshida ilk marta suyukli jamoasi libosida maydonga tushgan Paolo qariyb chorak asr davomida shu klub sharafini himoya qildi. Faoliyati 7 marta Italiya chempionligi, besh marta YECHL g‘olibligiga sazovor bo‘ldi. Himoyachi nafaqat «rossoneri», balki Italiya futbolining ham mustahkam himoya qo‘rg‘oni ramziga aylandi.
Franchesko Totti
Asosiy xislati: cheksiz sadoqat.
O‘z jamoasi va shahriga bo‘lgan sodiqlikning yana bir yorqin namunasi. Cheskoning bolaligida shakllangan an’ana hozir ham davom etmoqda: yosh iqtidor sohibini o‘z tomoniga og‘dirish niyatidagi «Lasio» skautlari Tottining onasidan qat’iy rad javobini olgach, bu uy ostonasiga takroran qadam bosishga jur’at etolmadilar. «O‘g‘lim hech qachon klubingizga o‘tmaydi. Axir biz asl rimliklar oilasidanmiz!», - degandi ayol kutilmagan mehmonlarga.
Ha, «Imperator»ning tez-tez achchiqlanishi va asabiylashishiga ko‘p guvoh bo‘lganmiz. Biroq uning «Oltin mundial»da maydonga tushish uchun o‘ta og‘ir jarohatdan tezroq forig‘ bo‘lish yo‘lidagi jasorati va tirishqoqligini hatto ashaddiy raqib muxlislari ham tan olishgan. Agar shunday bo‘lmaganida Rim derbisida ko‘plab gollarni amalga oshirgan hujumchini «Lasio» muxlislari hurmat-ehtirom bilan kuzatib qo‘ymasdilar: «Raqiblaring senga ta’zim qilishadi, Totti!»
Karlos Teves
Asosiy xislati: tashqi ko‘rinishi va tabiati.
Karlitos futbol olamiga yuzidagi chandig‘i bilan tanilgan. Bu unga bolalikdan yodgorlik - mast-alast bezorilar orasidan maktabga qatnagan bolakay yo‘l-yo‘lakay shoshilinch tamaddi qilishga majbur edi. Bir kuni yuziga qaynoq suvni to‘kib yuborib, uchinchi darajali kuyish tashxisi bilan shifoxonaga tushgandi. Yuzidagi chandig‘i bilan iflos ko‘chalarda to‘p surgan bolakay keyinchalik «MYU» safida YECHL g‘olibiga aylandi. «Siti»da yulduzlik maqomiga erishdi. Qo‘shimchasiga «Yuventus»ning qad rostlashida faol ishtirok etdi.
Rivaldo
Asosiy xislati: artistlik va standart vaziyatlar.
Bu hujumchi yuzidagi ehtiroslar Gollivud aktyorlarini eslatadi. Yana braziliyaliklarga xos bo‘lgan mukammal texnika qanchadan-qancha darvozabonlarni boshi berk ko‘chaga qamab qo‘ygan. Go‘yoki, Rivaldo to‘pni radio orqali boshqarayotgandek!
Emil Xeski
Asosiy xislati: gavdadan unumli foydalanish.
«Tavba, undan to‘pni qanday olib qo‘yishni hech kim bilmaydi!», - deya shikoyat qilishardi angliyalik baquvvat hujumchiga qarshi o‘ynagan himoyachilar. Darhaqiqat, Xeski o‘z vaqtida «ochilish»ni bilardi va to‘pni hech kimga bermasdi. Uning uslubidagi hujumchi uchun shuning o‘zi yetarli edi. Xeski-Ouen juftligi katta shov-shuvga sabab bo‘ldi. Agar Mayklning bevaqt jarohati yuz bermaganida, bu tandem uzoq vaqt samarali to‘p surgan bo‘lardi
Pike
Asosiy xislati: bir urinishda to‘pni raqibdan olib qo‘yish san’ati va hazilkashlik.
Bu futbolchi bir urinishda to‘pni olib qo‘yishi va raqiblarini ishsiz qoldirishi, shuningdek, o‘yindan keyin boplab hazillashishi ham mumkin. Ayniqsa, «Real» o‘yinchilari bilan. Bunday ma’nodor «smayllar» OAV uchun lazzatli ozuqa, Xavyer Tebas manziliga esa Madriddagi sotib olingan hakamlik uchun achchiq kinoya.
Tiempo butsalari xususida yana shuni qo‘shimcha qilish joiz, u yuqori sifatli kenguru terisidan tayyorlanadi. Mahsulotning Legend-7 nusxasida ilk marta Nike Flyknit texnologiyasidan foydalanildi. Endilikda poyabzallarning yuqori qismi har bir futbolchining oyoqlari yuzasiga moslasha oladi, vazni yengillashgan. Butsaning zarba beradigan qismi esa har qanday choklardan xoli. Ya’ni, zarbalar ta’sirida uning «burni» cho‘zilib ketmaydi. Xullas, butsalarning yangi avlodi xizmatga shay. Endi navbat futbolchilarga!
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
