«Milan» bosh murabbiyi Vinchenso Montella La Gazzetta dello Sport nashriga bergan intervyusida klubning ayni holatidan ko‘ngli to‘qligini alohida ta’kidladi.
U shuning borabarida yangi rahbariyat boshqaruvidagi ilk 100 kun yakunlari haqida iliq fikrda.
- Marko Fassone joriy yoz o‘z faoliyatidagi eng qiziq va hissiyotni qo‘zg‘atuvchi davr bo‘lganini tilga oldi Sizchi, oxirgi 2-3 oyga qanday ta’rif berasiz?
- Bu orzumandlar yozi va eng muhimi, orzular ro‘yobga chiqmoqda. Bilasiz, yoz hali tugagani yo‘q. Safimizga yangi qo‘shilgan futbolchilar soni va ular uchun sarflangan mablag‘ miqdori masalasida ko‘tarilgan shov-shuvlarni e’tiborga olmasak ham, klub qandaydir aql bovar qilmas ishlarni amalga oshiryapti.
- Bu harakatlar yakunda nimaga olib borishi mumkin?
- Ishonchim komil, hozirgi jamoa tarixda qoladi va yillar o‘tsa-da, qard-qiymati pasaymaydi. Hattoki, murabbiyning ishlari yurishmagan taqdirda ham...
- Ayni holatda ushbu gapning sizga taalluqli joyi yo‘q. Ammo shunday vaqtlar ham bo‘ldiki, jamoada qolishingizga ishonch qolmagandi...
- Yo‘q, yo‘q, shaxsan men jamoadagi kelajagimga zarracha shubhalanmadim. Shunga muvofiq, «Milan»dan boshqasi haqida hattoki, o‘ylamadim ham. Chunonchi, har kuni salohiyatimga ishonishlari va xizmatimga yuqori baho berishlarini qalban his qilib turdim.
- Fassonening aytishicha, qabul qilingan loyihaga ko‘ra, «Milan» 2022 yilga borib, dunyoning eng kuchli 5ta klubi qatoridan joy olishi lozim. O‘sha vaqtgacha Montellaning jamoa bilan birga bo‘lishi imkoniyati qanday?
- Ochig‘i, bilmadim. Ammo belgilangan vaqtga qadar jamoani boshqarishni istardim. Bu men uchun mo‘’jizaviy professional o‘sish, ya’ni maksimal natija bo‘lardi.
- Jamoangiz Xalqaro chempionlar kubogi turnirida «Bavariya»dek raqib darvozasiga 4ta gol urdi. Yangi mavsum arafasida xursandchilik darajasi haddan tashqari oshib ketmayaptimi?
- Aslo. Yashirmayman, ayni payt hammasi kutilganidan ancha osondek tuyulyapti, axir klub safida vaziyatga real ko‘z bilan qaraydigan chin professionallar yig‘ilishgan.
«Bavariya» bilan o‘yinga kelsak, bu yozgi futbol. Tabiiyki, «Borussiya»dan qabul qilib olingan mag‘lubiyat ranjitdi, «Myunxen»ni taslim qilganimiz xushnud etdi.
Umuman, mavsumoldi o‘yinlarida jamoadagi o‘sishni yaqqol sezdim. Ayniqsa, futbolchilarning bo‘sh zonalarni qanday yopishayotgani va raqiblarga nisbatan faolroq harakatlanayotganlari yoqdi. Muhimi, ular yaxlit kuch sifatida to‘p sura boshlashdi.
- Ha, ixtiyoringizda juda qiziqarli tarkib to‘plandi...
- Jamoaning umumiy saviyasi ham talab darajasida. Mana, Nyangni olaylik, u bir qator bahslarda ideal futbol ko‘rsatdi. Bu yigit yaqin kelajakda mega-yulduzlar qatoriga qo‘shilishi mumkin, agarda o‘z ustida jiddiy shug‘ullanishda davom etsa, albatta.
- Demak, Nyangning ketish masalasiga hozircha nuqta qo‘yilmagan...
- Unga ishonch bildirmasligimizga biror sabab yo‘q. Umuman, hozirda hammasi faqat o‘ziga bog‘liq.
- Nazorat bahslarida yana nimalarga e’tibor qaratdingiz?
- Kayfiyatga. Jamoam biror uchrashuvda passiv harakatlanmadi, xususan, yangi futbolchilar ham o‘zlarini ko‘rsatishga intilishdi. Masalan, Bilyani alohida maqtashim mumkin.
Andre Silvaning salohiyati esa juda baland. Uning timsolida xalqaro darajadagi top-o‘yinchini ko‘ryapman. To‘g‘ri, bu vaqt hukmidagi masala. Xullas, futbolchilarning o‘z o‘yinlarini namoyish etishayotganini ko‘rish chindan ham, maroqli.
- Oddiy aytganda, yangi mavsum startidan oldin mutlaqo xotirjamsiz.
- Rostini aytsam, «Bavariya»ga qarshi o‘yingacha umumiy xulosalarim ayqash-chuyqash edi. Xususan, ayrim masalalar ustida bosh qotirish zarurligini o‘ylagandim. Axir tabiatan reallikka moyilman. Hozir esa ko‘tarinki kayfiyatdaman.
- «Reallikka moyil» - bunda nimani nazarda tutyapsiz?
- Hozir 90 daqiqa davomida birdek to‘p surishga tayyor 8 nafar futbolchi topish ham qiyin. Xullas, mavsum boshida shuncha o‘yinchi loaqal 70 foiz shay holatga kelsa ham, xursand bo‘laman. Biroq bu masalada ishonch bilan gapirolmayman...
- Jamoaning ruhiy tayyorgarligi qanday?
- Ochig‘i, ilk o‘yinlar bo‘yicha xavotirim yo‘q emas. Ammo chinakam kurashga ilhaqmiz. Xususan, YELga ham katta umid bog‘layapmiz. Zero, «pley-off» bosqichi jamoani CHLga ancha yaqinlashtiradi.
- Anchelotti esa «Milan» skudettoni ko‘zlashi lozimligini aytdi.
- Unga iliq so‘zlari va ishonchi uchun rahmat, ammo o‘ylashimcha, hozircha bunga biroz erta. Aniqrog‘i, ayni holatda chempionlikni o‘ylash - sarob. To‘g‘ri, har qanday holatda ham, jamoa ishtiyoqi va maqsadini sira cheklamayman.
- Transferlar byudjeti haqida eshitganingizda, avvalo, nimalarni o‘ylagandingiz?
- O‘z-o‘zidan orzuga berildim. Yana shuncha ko‘p mablag‘ qanday sarflanishini tushunmadim. Mana, bir qator saviyali futbolchilarni sotib oldik. Ochig‘i, transferlar uchun tasavvurimdagidan ancha ko‘p mablag‘ ajratildi.
- Janob Li kam gapiradi, ammo ko‘p ishlaydi...
- Xitoylik sarmoyadorlar har bir mas’ul kishining ishiga hurmat bilan munosabatda bo‘lishyaptiki, bunaqasi zamonaviy futbolda kam uchraydi. Shunday bo‘lgach, asosiy burchimiz - oldimizga jiddiy vazifalar qo‘yish. Prezident doimo yonimizda va bir safar «Milancha ruh» nimaligini ko‘rsatishimni iltimos qildi. Bunday munosabat kishini ilhomlantiradi. Jamoa ham shunga moslashmoqda.
- Transferlar bozorida ish hali yakunlanmaganini aytdingiz. Xo‘sh, yana qanday xaridlarni kutish mumkin?
- Hozir markaziy hujumchi xususida ishlayapmiz. Keyin balki yangi vinger va yarim himoyachiga egalik qilishni ham xohlab qolarmiz. Ammo buyog‘iga hech kim shoshilmayapti.
- Shaxsan siz uchun ideal hujumchi qanday?
- U vaziyatni oldindan his qilishi, «iflos» gollarni ham ura olishi va jamoa uchun o‘ynashi lozim.
- Umuman, bu darajadagi faol transferlar kampaniyasi tabiatingizga to‘g‘ri keladimi?
- Hammasi klub bilan kelishib hal qilindi. Loyiha bo‘yicha qarashlarimiz bir xil - iqtidorli yoshlar va tajribali o‘yinchilarga birdek e’tibor qaratamiz.
Agar deylik, loaqal Yevropada binoyidek futbol namoyish etayotgan «Napoli»ga yaqinlashishni istasang, transferlar bozorida shunday ish tutishingga to‘g‘ri keladi.
«Roma» va «Napoli»dan ilgarilab ketganimiz haqida gapirishga hali ertayu, ammo niyatimiz shu va buni yashirmayman. Xullas, klubdagi yangilikka intilish harakatini qo‘llab-quvvatlayman.
- Bonuchchidek ijrochilar bilan yuqori maqsad sari intilish nisbatan yengilroq kechadi. Fassone mazkur transfer siz tufayli amalga oshganini yashirmayapti.
- Barcha xaridlar ustida birga ishladik va aytishim mumkinki, ularda xizmatim 49 foizga teng, faqat Bonuchchi transferi boshqa masala. Zero, bizda Leonardoni o‘z safimizga qo‘shib olish imkoniyati yuqori ekanligiga ishonardim. Ammo rahbariyat bu borada boshqacha fikrda edi...
- Qiziq, rahbarlar qarashini qanday o‘zgartirdingiz?
- Mirabelliga har kuni kamida 10 marta atigi 4ta kalimadan iborat SMS-xabar yozdim: «Xayrli tong (yoki oqshom), direktor: Bonuchchi». U bilan munosabatlarimiz a’lo darajada, hattoki, kamchiliklarimiz ham o‘xshash (kuladi).
- «Milan» Bonuchchi timsolida nimaga ega bo‘ldi? Axir u oddiy o‘yinchi emas.
- Ha, gap oliy darajadagi professional haqida ketyapti. Leonardo eng yuqori maqsadlar sari intilishga o‘rgangan. Shu xislati bilan yoshlarga ibrat ko‘rsata oladi. Bilmadim, «Yuve» kuchsizlandimi yoki yo‘q, ammo «Milan»ning kuchaygani aniq. O‘ylaymanki, Bonuchchi kiyinish xonasida katta «figura» sifatida o‘z so‘zini aytishga qodir. Bu fikrga uning faqat muammolarini ko‘rishni istaydiganlargina qo‘shilmasliklari mumkin.
- Endi Leo yordamida o‘yinni 3 nafar himoyachi bilan tashkillashingiz mumkin...
- Bu g‘oya juda qiziq va menga yoqadi. Umuman, turli sxemalarni bemalol qo‘llash imkoniyatiga egamiz, chunki tanlov juda katta.
- Aytishlaricha, Donnarumma masalasi ham bevosita aralashuvingizdan so‘ng hal bo‘libdi...
- Yo‘q, bunisiga aloqam yo‘q. Hammasini Mirabellining o‘zi bir yoqli qildi. To‘g‘ri, bosh murabbiy sifatida Janluijining yaqinlari bilan gaplashib ko‘rdim, chunki ular shuni kutishayotganini sezdim. Ammo suhbat jarayonida murabbiylik vakolati xususida so‘z ochmadim, shunchaki, tajribam bilan o‘rtoqlashdim.
- Jijo to‘g‘ri qarorga kelganini to‘liq tasdiqlay olasizmi?
- Tushunarliki, u avvalo, klub emas, o‘zi uchun shunday to‘xtamga keldi. Jijo fantastik darajadagi darvozabon, qolaversa, klubda turli avlod vakillarini birlashtirib turibdi.
Qarang, Donnarumma shuncha gap-so‘zlardan so‘ng shartnomasi muddatini uzaytirganida, 7 yoshli jiyanim Martina yig‘lab yubordi. Qayerdadir 70 yoshli onaxon ham shunday qilganiga imonim komil. Zero, Janluijini faqat «milanchi»lar emas, balki boshqalar ham yaxshi ko‘rib qolishgan.
- Biroq Rayolo va klub o‘rtasidagi munosabatlarga darz ketdi...
- Uning ishiga yarasha javob bo‘ldi, bor gap shu. Shaxsan menda Mino bilan muammolarim yo‘q. O‘ylaymanki, u ham shu gaplarni takrorlaydi.
- Darvoqe, muammolar haqida. Birinchi rasmiy mag‘lubiyatdan keyingi zarbani qabul qilishga tayyormisiz?
- Murabbiy har doim bunga tayyor turishi kerak. Ha, har bir omadsizligimiz qat’iy muhokama qilinishi tayin, ammo bunday munosabat ishimizga xalaqit bermasligi lozim. Ehtimol, tanqidlar haddan oshib ketar, ammo bu ham ishimizning bir qismi.
- Keyingi 100 kundan aynan nimalarni kutyapsiz? 1000 kundan-chi?
- Umid qilamanki, yana 100 kundan so‘ng «Milan» timsolida mehnatlarim mahsuli ko‘rinadi. 1000 kundan keyin esa skudetto orzu emas, aniq maqsadga aylanishini xohlardim...
Andijon
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
