Jahon futbolida eng keskin hamda murosasiz ruhda o‘tadigan uchrashuvlar sifatida asosan bir shahar yoki hudud sharafini himoya qiladigan jamoalar to‘qnashuvlari e’tirof etiladi.
Derbi maqomida kechadigan o‘yinlar qaysi mamlakatda bo‘lmasin hamisha muxlis-u mutaxassislar diqqat-e’tibori markazida bo‘lib keladi.
Xususan, O‘zbekistonda ham bir qator prinsipial qarama-qarshiliklar mavjudki, ularda jamoalar o‘z hamshaharlarini mag‘lub etish uchun maydonga chiqishadi.
Quyida ayni damda oliy ligada ishtirok etayotgan Toshkent shahri hamda viloyati, Qashqadaryo, Farg‘ona viloyatlari jamoalarining o‘zaro o‘yinlari tarixi haqida ma’lumot berib o‘tamiz.
TOSHKENT DERBILARI
«Bunyodkor» - «Paxtakor»
O‘zaro uchrashuvlar soni: 21
«Bunyodkor» g‘alabasi: 7
«Paxtakor» g‘alabasi: 5
Duranglar: 9
Urilgan gollar soni: «Bunyodkor» - 25; «Paxtakor» - 19.
«Bunyodkor»ning eng yirik g‘alabasi: 3:0
«Paxtakor»ning eng yirik g‘alabasi: 3:1
Yurtimizdagi eng ommabop hamda ko‘p muxlis yig‘adigan uchrashuvlardan biri - poytaxt eski derbisi sanaladi. «Bunyodkor» jamoasi tashkil topguniga qadar «Paxtakor» ancha yillar davomida bayroqdorlikni hech kimga bermay keldi. Asos solinganidan so‘ng «qaldirg‘ochlar» «sherlar»ga munosib raqobatchi bo‘la olishdi. Buni o‘zaro uchrashuvlardagi g‘alabalar sonidan ham bilish mumkin. Zero shu paytga qadar ushbu ikki grand jamoalar 21 marta o‘zaro bahs olib borishgan bo‘lib, o‘yinlarning 7tasi «qaldirg‘ochlar» foydasiga, 5tasi esa «sherlar» foydasiga hal bo‘lgan. 9ta uchrashuv durang bilan yakunlangan. Urilgan gollar soni bo‘yicha ham ustunlik «bunyodkorchilar» tarafida - 25-19. Qayd etish joizki, «Bunyodkor» va «Paxtakor» jamoalari o‘rtasidagi bellashuvlarda ko‘pincha yirik hisoblar qayd etilmaydi. Aksariyat uchrashuvlar natijasini kiritilgan bitta yoki ikkita to‘p hal etadi. «Bunyodkor» 2016 yilda o‘z maydonida «Paxtakor»ni bir marta 3:0 hisobida mag‘lub etgan. «Sherlar» esa ushbu raqibni 2014 yilda 3:1 hisobida yengishni uddalashgan.
«Lokomotiv» - «Bunyodkor»
O‘zaro uchrashuvlar soni: 19
«Lokomotiv» g‘alabasi: 5
«Bunyodkor» g‘alabasi: 9
Duranglar: 5
Urilgan gollar soni: «Lokomotiv» -19 ; «Bunyodkor» -26.
«Lokomotiv»ning eng yirik g‘alabasi: 3:0
«Bunyodkor»ning eng yirik g‘alabasi: 4:0
O‘zbek futbolidagi yana bir diqqatga sazovor derbilardan biri «Lokomotiv» hamda «Bunyodkor» jamoalari qarama-qarshiligidir. So‘nggi yillarga kelib o‘zbek futbolining yetakchi jamoalari qatoriga qo‘shila olgan «temiryo‘lchilar» «Bunyodkor» vakillari bilan hozirga qadar milliy chempionatimiz doirasida 19 marta bahs yuritishgan.
Ushbu uchrashuvlardagi ustunlik hozircha «Bunyodkor» tomonida. «Qaldirg‘ochlar» «Lokomotiv»ni 9 bor mag‘lub etishgan, 5 bor imkoniyatni boy berib qo‘yishgan. «Lokomotiv» vakillari 19 marta ushbu raqib darvozasini ishg‘ol etib, 26 marta o‘z darvozalaridan to‘p olib chiqishgan.
O‘zbekistonning ayni paytda amaldagi chempioni sanaluvchi «Lokomotiv» o‘z hamshahridan eng qaqshatqich mag‘lubiyatini 2010 yilda qabul qilib olgan. O‘shanda «qaldirg‘ochlar» «temiryo‘lchilar» darvozasini javobsiz 4 marta ishg‘ol etishga muvaffaq bo‘lishgan.
«Paxtakor» - «Lokomotiv»
O‘zaro uchrashuvlar soni: 25
«Paxtakor» g‘alabasi: 16
«Lokomotiv» g‘alabasi: 4
Duranglar: 5
Urilgan gollar soni: «Paxtakor» -57 ; «Lokomotiv» -23.
«Paxtakor»ning eng yirik g‘alabasi: 7:1
«Lokomotiv»ning eng yirik g‘alabasi: 2:1
Yana bir poytaxt derbisi «Paxtakor» hamda «Lokomotiv» jamoalari o‘rtasida o‘tib keladi. Aynan mana shu qarama-qarshilik so‘nggi yillarda eng prinsipial to‘qnashuv deya baholab kelinmoqda. O‘z oldiga yuqori maqsadlar qo‘yadigan bu jamoalarning o‘yinlari butun o‘zbek futboli jamoatchiligi diqqat markazida bo‘ladi.
Ta’kidlash kerakki, ushbu ikki jamoa o‘yinlarida yaqqol ustunlik «Paxtakor» vakillari tomonida. «Sherlar» shu paytga qadar o‘tgan 25 o‘yinning 16tasini o‘z foydalariga hal etishgan. «Loko» futbolchilari esa faqat 4 bor «Paxtakor» ustidan g‘alabaga erishishgan.
5ta o‘yin esa durang bilan tugagan. «Paxtakor» futbolchilari «Lokomotiv» darvozasiga jami 57 marta yo‘l topa bilishgan. «Sherlar» ushbu jamoani 2006 yilda 7:1, 2005 yilda 6:1 hisobi bilan taslim etishga muvaffaq bo‘lishgan.
«Lokomotiv» futbolchilari esa haligacha biror marta ham «Paxtakor»ni yirik hisobda mag‘lub etishning uddasidan chiqishgan emas.
«Paxtakor» - «Obod»
O‘zaro uchrashuvlar soni: 3
«Paxtakor» g‘alabasi: 2
«Obod» g‘alabasi: 0
Duranglar: 1
Urilgan gollar soni: «Paxtakor» -9; «Obod» -3.
«Paxtakor»ning eng yirik g‘alabasi: 4:1
«Obod»ning eng yirik g‘alabasi: -
O‘tgan yilgi mavsumdan boshlab oliy ligada poytaxtning yana bir jamoasi - «Obod» ham ishtirok eta boshladi. Shu sababli ushbu jamoaning boshqa klublar bilan o‘zaro uchrashuvlari soni hali u qadar ko‘p emas.
Misol uchun, «Obod»ning poytaxt grandlaridan biri sanaladigan «Paxtakor»ga qarshi o‘tgan o‘yinlari ayni paytda 3tani tashkil etmoqda. 3ta uchrashuvning 2tasini mahorat va tajriba bobida ustunroq bo‘lgan «Paxtakor» futbolchilari g‘alaba bilan tugatishgan.
Bitta o‘yinda esa 1:1 hisobi qayd etilgan. Qiziq jihati shundan iboratki, «Paxtakor» «Obod» maydoniga 2 marta safar uyushtirgan va ikkala bahsda ham bir xil - 4:1 hisobida zafar quchishga erishgan.
O‘tgan yili ikkinchi davra o‘yinlari doirasida «Paxtakor» stadionida kechgan bellashuv esa ko‘pchilik uchun kutilmaganda 1:1 hisobi bilan yakunlangan.
«Bunyodkor» - Obod»
O‘zaro uchrashuvlar soni: 4
«Bunyodkor» g‘alabasi: 3
«Obod» g‘alabasi: 0
Duranglar: 1
Urilgan gollar soni: «Bunyodkor» -10; «Obod» -1.
«Bunyodkor»ning eng yirik g‘alabasi: 4:0
«Obod»ning eng yirik g‘alabasi: -
«Obod» jamoasi poytaxtimizning yana bir klubi - «Bunyodkor»ni ham hali oliy liga o‘yinlari doirasida mag‘lub etgan emas. «Qaldirg‘ochlar» ushbu jamoaga qarshi o‘tgan uchrashuvlarda katta ustunlikka ega.
Shu paytga qadar «Obod» hamda «Bunyodkor» 4 marta o‘zaro bahs olib borishgan bo‘lib, o‘yinlarning 3tasida «qaldirg‘ochlar» zafar quchishgan. «Obod» futbolchilari esa faqat bir martagina raqibdan ochko olishni uddalashgan, xolos.
Joriy yilgi mavsum startida «Obod» o‘z maydonida «bunyodkorchilar»ni qabul qildi va 1:1 hisobida durang o‘ynadi. Yaqinda o‘tgan javob bahsida esa «qaldirg‘ochlar» 2:0 hisobida g‘alabaga erishishdi. O‘tgan yilgi o‘yinlar esa 4:0 hamda 3:0 hisoblarida «Bunyodkor» vakillari foydasiga hal bo‘lgandi.
«Obod» - «Lokomotiv»
O‘zaro uchrashuvlar soni: 3
«Obod» g‘alabasi: 0
«Lokomotiv» g‘alabasi: 2
Duranglar: 1
Urilgan gollar soni: «Obod» -1; «Lokomotiv» -10.
«Obod»ning eng yirik g‘alabasi: -
«Lokomotiv»ning eng yirik g‘alabasi: 7:0
«Obod» jamoasi oliy ligadagi debyut mavsumini unchalik yomon o‘tkazmadi. Ushbu jamoa ishtirokidagi barchaning yodida qolgan bellashuvlardan biri - «Lokomotiv»ga qarshi o‘tgan Toshkent derbisi bo‘lgandi.
«Temir-yo‘lchilar»ni hech bir jamoa to‘xtatolmayotgan bir pallada «Obod» ushbu raqib maydonida 1:1 hisobida durang o‘ynagandi. O‘sha uchrashuvni ko‘pchilik hozirga qadar «Obod»ning eng yorqin o‘yinlaridan biri sifatida eslaydi.
Umuman olganda, «Obod» «Lokomotiv» bilan 3 marta bahs olib borgan va 2ta mag‘lubiyat, bitta durang qayd etgan. Jamoa o‘z tarixidagi eng yirik mag‘lubiyatni ham aynan hamshahridan qabul qilib olgan.
Joriy yilgi mavsumning ilk davrasida «Loko» maydoniga safar uyushtirgan «Obod» futbolchilari naq 7 bora o‘z darvozalaridan to‘p olib chiqishdi.
Ushbu mag‘lubiyat jamoaning keyingi o‘yinlariga ham katta ta’sir o‘tkazdi va poytaxtning kenja klubi hamon kichik inqirozdan chiqib keta olgani yo‘q.
FARG‘ONA DERBISI
«Neftchi» - «QO‘Qon-1912»
O‘zaro uchrashuvlar soni: 24
«Neftchi» g‘alabasi: 18
«Qo‘qon-1912» g‘alabasi: 4
Duranglar: 2
Urilgan gollar soni: «Neftchi» -67; «Qo‘qon-1912» -31.
«Neftchi»ning eng yirik g‘alabasi: 6:1
«Qo‘qon-1912»ning eng yirik g‘alabasi: 3:1
Farg‘ona derbisi ham uzoq tarixga ega sanaladi. Zero Qo‘qon - o‘zbek futboli vatani bo‘lsa, «Neftchi» jamoasi ko‘p yillar mobaynida yurtimizning eng yetakchi klublari qatorida e’tirof etib kelingan. Farg‘ona derbisi maqomida o‘tgan uchrashuvlar har doim ham shiddatli va murosasiz ko‘rinish olgan.
Eng ahamiyatli jihati esa - ushbu derbi o‘yinlari har doim ham stadion to‘la muxlislar guvohligida o‘tib kelgan. Farg‘ona derbisi tarixiga nazar tashlaydigan bo‘lsak, «Neftchi» va «Qo‘qon-1912» shu paytgacha 24 marta o‘zaro kuch sinashishgan.
O‘yinlarning 18tasida Farg‘ona shahri jamoasi, 4tasida esa qo‘qonliklar g‘alabaga erishishgan. Yana 2ta o‘yinda g‘olib aniqlanmagan. Urilgan gollar borasida ham ustunlik viloyat bosh jamoasi tarafida. Lekin so‘nggi vaqtlarga kelib Farg‘ona futbolida yetakchi jamoa o‘zgarmoqda.
Zero joriy yilgi mavsumda «Qo‘qon-1912» o‘z tarixida yangi sahifa ochmoqda. «Neftchi» esa o‘z tarixidagi eng muvaffaqiyatsiz mavsumlardan birini o‘tkazmoqda. Buni yaqindagina bo‘lib o‘tgan nav-batdagi derbida ham kuzatish imkoniyatiga ega bo‘ldik.
«Neftchi» «Qo‘qon-1912»ga 1:3 hisobida imkoniyatni boy berdi va o‘zaro o‘yinlardagi eng yirik hisobdagi mag‘lubiyatini qabul qilib oldi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
