Italiyaning La Gazetta dello Sport nashri o‘z odatiga ko‘ra, «A» seriyasi moliyaviy jihatlarini o‘z ichiga qamrab olgan yillik reytingni e’lon qildi. Unga ko‘ra, maoshlar to‘lovi bo‘yicha «Yuventus» (164 mln. yevro), «Milan» (117 mln. yevro) va «Roma» (91 mln. yevro) klublari oldinda. Kalchoda eng ko‘p ish haqi oladigan futbolchilar esa - Leonardo Bonuchchi va Gonsalo Iguain.
Fakt. «A» seriyasida ishtirok etuvchi 20ta jamoa bir yil davomida futbolchilarga jami 955 mln. yevro miqdorida maosh beradi. Bu summa mavsum-2014|2015 ko‘rsatkichidan 106 mln. yevro ko‘pdir. «A» seriyasi funksionerlarining aytishlaricha, top-klublar tomonidan futbolchilarga bundan ancha ko‘p pul ajratilishi mumkin edi, biroq moliyaviy «Feyr-pley» qoidasi ularning ushbu yo‘nalishdagi faoliyatini cheklab qo‘ymoqda.
Futbolchilar. «Milan» himoyachisi Leonardo Bonuchchi va «Yuventus» hujumchisi Gonsalo Iguain yiliga 7,5 mln. yevrodan olishadi - bu Italiyadagi eng yuqori ko‘rsatkich. Bonuchchi yozda Turinda o‘ynashdan ko‘ra, xitoyliklar puli yordamida amalga tatbiq etilgan megaloyihada ishtirok etishni ma’qul ko‘rdi va «rossonerlar» sardorlik bog‘ichini qabul qilishga ham ulgurdi. Iguain esa «Napoli»dan «Yuve» safiga qo‘shilganidan keyin ko‘proq jamoa uchun o‘ynashni o‘rgandi, u ayni payt «keksa sinyora»ning eng foydali futbolchilaridan biri bo‘lib turibdi. Aytish joiz, «A» seriyasining eng ko‘p maosh oluvchi futbolchilaridan tuzilgan ramziy terma jamoada atigi 3ta klubdan vakil bor: «Yuventus» - 7 nafar, «Milan» - 3 nafar va «Roma» - 1 nafar.
Murabbiylar. «Yuventus» ustozi Massimiliano Allegrining yillik ish haqi 7 mln. yevroga teng. U o‘tgan mavsum jamoasini navbatdagi skudetto tomon boshlash barobarida CHL finaliga olib chiqdi. To‘g‘ri, turinliklar hal qiluvchi bahsda «Real» tomonidan shunchaki, «kaltaklanishdi» - 1:4. Gap-so‘zlarga qaraganda, Italiyaning amaldagi chempioni rahbariyati endi Allegridan aynan eng obro‘li yevroturnirda zafar quchishni ta’minlashni talab qilmoqda. Aks holda, murabbiy iste’foga chiqariladi, garchi 2020 yilgacha mo‘ljallangan shartnomaga ega bo‘lsada. «A» seriyasida ishlayotgan murabbiylar orasida ikkinchi katta maosh «Inter»ning yangi yo‘lboshchisi Luchano Spallettiga tegishli - 4 mln. yevro. «Milan»ni yorug‘likka olib chiqishga zo‘r berib urinayotgan Vinchenso Montellaningyillik daromadi ham chakki emas - 3 mln. yevro. Keyingi o‘rinlarda 1,5 mln. yevro evaziga ishlayotgan Eusebio di Franchesko («Roma») va Sinisha Mixaylovich («Torino») borishyapti.
Eng kam to‘lov. «Krotone» o‘z futbolchilariga hammadan kam haq beryapti. Aslida Davide Nikola jamoasi bu borada «A» seriyasi debyutantlari «Benevento» (15 mln. yevro), SPAL (21 mln. yevro) va «Verona» (22 mln. yevro)dan oldinda turishi kerakdek. Yo‘q, bunday emas: «akulalar» tarkibida jamlangan futbolchilar jami 12 mln. yevrolik maoshga qanoat qilishyapti.
Yuksalish. Dris Mertens mahsuldor o‘yinlari orqali yillik maoshini birdaniga 2,3 mln. yevro ko‘paytirdi. O‘tgan mavsum startidan oldin belgiyalikka belgilangan maosh miqdori 1,2 mln. yevro edi, endi esa u 3,5 mln. yevro oladi. Chunonchi, Mertens avvalgi futbol yili davomida Nea-pol klubi hujumidan muqim joy olish barobarida 28ta gol urishga muvaffaq bo‘ldi. Natijada Italiya OAV uning yozda APLga yo‘l olishi haqida fol ocha boshladi. «Napoli» prezidenti Aurelio de Laurentis esa Dris maoshini oshirishdan tashqari, uning shartnomasi muddatini uzaytirish asnosida masalani ijobiy hal etdi. Hozirgi kelishuvga binoan hujumchi 2020 yilga qadar neapolliklar safida to‘p suradi.
DarvoQe...
Italiyalik eng iqtidorli hujumchi deylik, rossiyalik Aleksandr Kokorindan ham kam maoshga ega. Andrea Belotti yaqindagina «Torino» bilan tuzgan shartnomasi muddatini 2021 yilgacha uzaytirdi va unga ko‘ra, 1,5 mln. yevro oladi. Boz ustiga, «buqa-lar»ning ehtirosli xo‘jayini Urbano Kairo hujumchining kelishuvida 100 mln. yevroga teng tovon puli belgilab, real xaridorlarni ham cho‘chitib yubordi.
-------------------------
Janluiji Donnarumma maosh bobida o‘z adashi, afsonaviy Buffondan o‘zib ketdi. Zero, yoz boshlanmay turib, korchalon agent Mino Rayola mijozining «Milan»dan ketishi haqida jar soldi va bu orqali kelishuv shartlari ancha yaxshilanishini ta’minladi. Xullas, «rossonerlar» darvozabonni qo‘ldan chiqarmaslik uchun unga 6 mln. yevroga teng yillik maosh belgilashdi. 18 yoshli kiper endi 2021 yilgacha «Milan» ixtiyorida. E’tiborli fakt, Italiya terma jamoasida hamon asosiy darvozabon rolini bermayotgan Jiji milanlik «yig‘loqi» yigitchadan naq 1,5 mln. yevro kam maoshga ega.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
