“Andijon” va “So‘g‘diyona” (4:0) o‘rtasida bo‘lib o‘tgan Superliga 1-tur doirasidagi uchrashuvdan keyin tashkil qilingan matbuot anjumanining ikkinchi qismida mezbonlar bosh murabbiyi Samvel Babayan qatnashdi.
Assalomu alaykum. Birinchidan, hamma andijonlik muxlislarni g‘alaba bilan tabriklayman. To‘g‘risini aytsam, biz uchun qiyin bo‘ldi. Baribir bu debyut o‘yin. Tarkib 99 foizga yangilangandi va shu bois biroz boshida qiyinroq kechdi. Keyin hammasi joyiga tushdi.
“So‘g‘diyona” haqida nima deyishim mumkin? Birinchi taymda taktik o‘yin bo‘ldi. Oxirgi yillarda murabbiyning mahorati tufayli jamoa ancha sifatli o‘yin ko‘rsatyapti. Yetarlicha tajribaga ega klub. Biz raqibni yaxshilab o‘rgandik. O‘rtoqlik uchrashuvlarini ko‘rib chiqdik. Raqib biz kutgan o‘yinni ko‘rsatdi. Barcha imkoniyatimizni ushbu uchrashuvda ochishga harakat qildik va 60 foizga o‘z o‘yinimizni ko‘rsatdik. Ochiq aytadigan bo‘lsam, jamoamizning potensialini yaxshi bilaman. Boshlang‘ich tarkibimiz 99 foizga o‘zgardi. Shunday ekan, o‘yindan-o‘yinga jamoamiz yanada shakllanib boradi. O‘yinni 70 foizida nazorat qildik. O‘ylaymanki, jamoamiz himoyada ham, hujumda ham ko‘ngildagidek harakat qildi.
Shuningdek, bugungi ajoyib atmosferani ham alohida ta’kidlab o‘tgan bo‘lardim. Har bir futbolchi va murabbiy bunday muhitda o‘ynashni orzu qilishadi. Muxlislarni ajoyib tarzda qo‘llab-quvvatlashi, butun tribunani qarsaklar chalishi, sifatli maydonni bo‘lishi, o‘ylaymanki, g‘alabaga zamin yaratdi. Alohida ta’kidlash kerakki, stadion xodimlari maydonni o‘yinga ideal holatda tayyorlashgan. Birinchi qadam juda muhim edi va uni bajardik. Bizda uy yoki safar degan tushuncha yo‘q. Har bir bahsda maksimal darajada harakat qilib, g‘alaba qozonishni reja qilamiz.
Meni “Andijon”ga kelishimga to‘xtaladigan bo‘lsak, yangi tarix boshlandi, deb o‘ylayman va g‘alabalar an’anasini yaratishimiz muhim. Bunday ishqibozlar bunday g‘alabalarga loyiq va ular O‘zbekistonning eng yaxshi muxlislaridir. Men, murabbiylar shtabi va futbolchilar har bir uchrashuvda ishqibozlarga bayram bo‘lishini va yuqori darajada mehnat qilib, uyda yo safarda bo‘lsin, g‘alaba qozonish uchun barcha kuch-qudratimizni ishga solamiz.
Kiritilgan 4 ta goldan uchtasi legionerlar hisobiga yozildi. Ularning o‘yinidan qoniqdingizmi?
Boshqa mamlakatdan legioner kelar ekan, birinchi navbatda u o‘zining sifatli futbolchiligi va lider bo‘lishi bilan ajralib turishi kerak deb hisoblayman. O‘ylaymanki, bu yerga kelgan barchasi obdon o‘ylab keyin taklif qilingan legionerlardir. Ularni taklif qilayotganda nafaqat futbolchilik mahorati, balki insoniylik fazilatlariga ham e’tibor qaratganmiz. Ha, bu o‘yinda legionerlar asosiy ishlarni bajarishdi. Shuningdek, yosh o‘yinchilar ham maydonga tushishdi va yaxshi tomonlarini ko‘rsatishdi. Men legioner yoki mahalliy o‘yinchi deb ajratmagan bo‘lardim. Biz bir oilamiz. Har bir o‘yinda kim bo‘lishidan qat’iy nazar maydonda yaxshi harakat qilib, g‘alabaga zamin yaratsa bas.
Aziz Turg‘unboyev nima uchun qaydnomaga kiritilmadi?
Buning sababi unda jarohat bor edi. Uni bitishi uchun biroz vaqt kerak edi. Keyingi uchrashuvga tayyorgarlikning asosiy bosqichida ishtirok etadi.
Shu o‘rinda viloyat rahbariyatiga qo‘llab-quvvatlayotgani uchun minnatdorchilik bildiraman. Bundan tashqari, muxlislarga ham alohida rahmat. Yana bir bor hammani g‘alaba bilan tabriklayman. Sog‘ bo‘linglar!
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
