2015 yilning 12 mart kuni Sharqiy Timor poytaxti - Dilida OFK miqyosidagi JCH-2018 saralash bosqichiga start berilgandi (SHarqiy Timor - Mo‘g‘uliston - 4:1).
Ortda qolgan vaqtda kvalifikasiya doirasida jami 226ta o‘yin o‘tkazildi va ularda 665ta gol qayd etildi. Saralash yakunida Muhammad al Sahlaviy (Saudiya Arabistoni) va Ahmad Xalil (BAA) bosh to‘purar maqomini olishdi - 16tadan gol.
2016 yil 7 aprelda esa FIFAning navbatdagi reytingi asosida hal qiluvchi uchinchi saralash raundiga qur’a tashlangandi.
Bilasiz, bu jarayonda 12ta kuchli jamoa 2ta guruhga bo‘lindi. Oxirgi bosqich va OFK miqyosidagi «pley-off» o‘yinlari 2016 yil 1 sentyabr - 2017 yil 10 oktyabr oralig‘ida o‘tkazildi.
Tabiiyki, saralash sikli mobaynida o‘ziga xos «sensasiya»lar kuzatildi, parvoz va qulashlar ham uchradi. Bugun yakuniy mulohaza - xulosalarimiz, ayrim faktlarni terma jamoalar misolida bayon qilmoqchimiz.
Eron.Fors milliy jamoasining asosiy yutug‘i murabbiydami yoki hujumchilarda? Bizningcha, ikkisining ham roli katta, ammo muvaffaqiyat avvalo, mamlakat futbol rahbariyati nomiga yoziladi, baribir!
Chunonchi, Karlush Keyrush futbolga bevosita aloqador va umuman aloqasi yo‘q masalalar tufayli naq 3 marta ishdan ketishga chog‘landi, futbol rahbariyati esa sabr qildi.
Vaholanki, mutasaddilar portugaliyalik mutaxassisning turli-tuman e’tirozlariga javoban uni shunchaki, iste’foga chiqarishlari ham mumkin edi, chunki bunga sabab yo‘q emasdi.
Muhimi, eronliklar murabbiy atayin qandaydir «to‘polon» ko‘tarishga urinayotganini vaqtida tushunishdi.
Hammasi futbolchilarni kuchli bosimdan himoyalashga qaratilgandi. Xullas, Karlush Keyrush muvaffaqiyat yo‘lida barcha imkoniyatlar va kuchlardan maksimal darajada foydalandi.
Bilishimizcha, Eron futbol federasiyasi Keyrushning talabiga muvofiq, kerak bo‘lsa, milliy chempionat peshqadamlari o‘rtasidagi o‘yinlarni ham biroz ortga surishi mumkin edi. Yana bir tomoni, Eron pro-ligasida kuchli raqobat yuzaga kelgan.
Deylik, ayni payt chempionatda aynan qaysi klublar chinakam favorit ekanligini bilib bo‘lmaydi. Shuningdek, terma jamoa yetakchilariga saboq berish maqsadida ularga nisbatan intizomiy choralar qo‘llashga hammaning ham yuragi dov bermasa kerak-ov...
Bosh qahramon - Sardor Azmun. 1995 yilning 1 yanvarida Gonbad shahrida tavallud topgan. Otasi - Xalil Azmun vaqtida Eron voleybol terma jamoasida o‘ynagan.
Sardor ayni payt «Rubin» safida to‘p surmoqda. Rossiya mundiali oldidan aynan shu yurtda o‘ynayotgani uning foydasiga xizmat qilsa, ajabmas.
Azmun milliy jamoa tarkibiga qo‘shilguncha mamlakatning U-17, U-20 va U-23 toifasidagi termalarida ham munosib to‘p surgan. U JCH-2014 oldidan kengaytirilgan 28 kishilik tarkibga ham kiritilgandi.
E’tibor bering, 22 yoshli hujumchi shu kunga qadar forslar bosh jamoasida 28ta o‘yin o‘tkazib, 22ta gol urdi.
Vaholanki, u debyut golini 3 yilcha oldin, aniqrog‘i, 2014 yilning 18 noyabr kuni J.Koreya terma jamoasiga qarshi o‘rtoqlik bahsi (1:0)da nishonlagandi. 2017 yilning o‘zida esa 6ta gol urdi:
Chernogoriya va Suriya jamoalari darvozasini 2 martadan nishonga olgan Azmun O‘zbekiston va Rossiya termalarini bir martadan ranjitdi.
**************************************
J.Koreya. Koreyaliklar bu safar so‘nggi saralash bosqichi doirasida safar uchrashuvlarida biror marta g‘alaba qozonolmadilar. Boz ustiga, mehmondagi 5ta o‘yinda atigi 2ta durang qayd etishdi - Suriya va O‘zbekiston termalariga qarshi kechgan bahslarda 0:0 hisobini ushlab qolishdi.
Xullas, imkoni bor 15 ochkodan atigi 2 ochko olingani bugungi J.Koreya termasi ancha kuchsizlanib qolganini ifodalaydi.
Uli Shtilikening ishdan bo‘shatilishiga kelsak, nemis murabbiyi terma jamoaga yangi «qon quyish»ni kechiktirib yubordi va safar o‘yinlarida himoyaviy taktikaga yopishib oldi.
Misol uchun, koreyslarning milliy jamoamizga qarshi o‘yinlariga qarasak, ular har ikki tomonda ham bizdan ustun ko‘rinishmadi.
Shunchaki, o‘z tabiatlaridan kelib chiqib, o‘yin intizomiga to‘liq, hattoki, keragidan ortiq rioya qilishdi, ijodkorlikka berilishmadi. Xususan, terma jamoaning yangi ustozi ham 2 nafar hujumchi bilan o‘ynash taktikasiga o‘tishni istamadi.
Shiddatli bahs. DAVOMI