Malayziya poytaxti Kuala-Lumpur shahrida bugun, 6 dekabr kuni 2018 yilgi Osiyo Chempionlar Ligasi musobaqasi guruh bosqichiga qur’a tashlash marosimi bo‘lib o‘tdi.
Marosim “JW Marriot” mehmonxonasida o‘tkazildi. O‘zbekiston chempioni va mamlakat Kubogi sohibi “Lokomotiv” klubi G‘arb mintaqasi “B” guruhidan joy oldi. Jamoa guruh bosqichida “Duhail” (Qatar), “Al-Vahda” (BAA) hamda “Zobahan” (Eron) / “Aizavl” (Hindiston) juftligi g‘olibiga qarshi bahs olib boradi.
Shuningdek, O‘zbekistonning yana ikkita klubi – 2017 yilgi chempionatning kumush medal sovrindori “Nasaf” va bronza medali egasi “Paxtakor” guruh bosqichiga chiqish uchun 30 yanvar kuni pley-off bosqichida o‘ynaydi.
OCHL–2018 turniri
Saralashning pley-off bosqichi
30 yanvar, seshanba
“Nasaf” (O‘zbekiston) – “Al-Faysali” (Iordaniya)
“Al-Garafa” (Qatar) – “Paxtakor” (O‘zbekiston )
“Nasaf” pley-off o‘yinida g‘alaba qozonsa, “C” guruhidan joy oladi va “Persepolis” (Eron), “Al-Sadd” (Qatar), “Al-Vasl” (BAA) klublari bilan raqobatlashadi. “Paxtakor” muvaffaqiyatga erishsa, “A” guruhiga yo‘l oladi hamda “Al-Jazira” (BAA), “Al-Ahli” (Saudiya Arabistoni) va “Traktorsozi” (Eron) jamoalari bilan kuch sinashadi.