«Barselona»ning sobiq o‘yinchisi Aleksandr Gleb rossiyalik jurnalistlar bilan bo‘lgan suhbatda Filippe Koutinyoning transferi borasida o‘z fikrlarini bildirib o‘tdi.
- «Barselona» Koutinyo uchun «Liverpul»ga 120 million yevro to‘ladi. Bundan tashqari, katta bonuslar ham bor. Futbol olami aqldan ozyaptimi?
- Ha, shunday. Oldin Krishtianu Ronalduga to‘langan katta pullar, Beyl haqida gapirilardi. Keyin barchasi o‘zgarib ketdi. 120 million... Hozirgi bo‘layotgan transferlar aqldan ozdiradi. Yana bir-ikki yildan so‘ng transfer uchun yarim milliard odatiy holga aylanib qolishi hech gap emas.
- Bunday xaridlardan so‘ng futbol tomosha qilish istagi yo‘qolmaydimi?
- Nega endi? Istak yo‘qolmaydi. Bu klublarning ishi. Shuncha mablag‘ sarflashga qaror qilishdimi, transferni kelishib oldilarmi, bu hammani qo-niqtiryapti. To‘g‘ri, summalar katta. Lekin bu birinchi shunday holat emas-ku.
- Koutinyo 120 million yevroga arziydigan shunchalik kuchli futbolchimi?
- Beyl o‘ziga to‘langan pulga munosibmi? Neymar-chi? Albatta, munosib emas. Shunchaki, hozir barchasi o‘zgarib ketdi. Qancha ko‘p davom etsa, shuncha qiziqarli bo‘laveradi. Hatto nima bo‘lishini ham bilmaysiz.
- Hozir Angliya yoki Ispaniyada o‘ynamayotganingizdan afsusda emasmisiz?
- Ha. Afsuski, hozir 22 yoshda emasman.
- Yaxshi ishlab olgan bo‘lardingiz.
- Davr o‘zgaryapti. «Shtutgart»da o‘ynayotganimda Balakov eng qimmat futbolchi edi. Keyin o‘yinchilar narxi ikki baravarga ko‘tarilib ketdi. Hamma qayerga qarab ketyapmiz, deb o‘ylagandi. Hozir esa moliyaviy tarafdan o‘sish jiddiy oldinladi.
- Buning qandaydir ijobiy taraflarini ko‘ryapsizmi?
- Bular yosh futbolchilar uchun yaxshi o‘rnak. Ishlang, mehnat qiling, barchasi o‘zingizga bog‘liq. Ham o‘ynab, ham pul ishlab olish mumkin.
- Umuman olganda, Koutinyo sizga yoqadimi?
- Ha.
- Bu futbochi «Barselona» darajasidami?
- Bilsangiz, «Barsa» o‘zgardi va oldingidek emas. Menimcha, Koutinyo kataloniyaliklarning o‘yiniga mos tushadi. Texnik va kreativ yigit. Balki kurashlarda unchalik yaxshi emasdir. Lekin Ispaniyada Angliyadagi kabi kurashish shart emas.
- Endi Messi va kompaniya Chempionlar Ligasida g‘alaba qozonadimi?
- Nima uchun ishonch bilan aytyapsiz? Bir futbolchi hammasini hal qila olmaydi. YECHL g‘olibligi uchun da’vogarlar ko‘pchilikni tashkil qiladi. Buning ustiga, Koutinyoning Inyesta darajasiga chiqishi uchun ham vaqt kerak. «Liverpul» va «Barselona»da o‘ynash boshqa-boshqa narsa.
- Yaqinda 2017 yilning ramziy terma jamoasini tuzdingiz. Unga Koutinyoni kiritmadingiz. Nima uchun?
- Menimcha, undan kuchliroq futbolchilar bor.
- Azar, De Bryuyne?
- Ha, u Azarga imkoniyatni boy beradi. Belgiyalik APLning eng kreativ futbolchilaridan biri. Yuqorida aytganimdek, Inyestani Koutinyodan baland qo‘yaman. Andreas - shunchaki, kompyuter odam! U hamma narsani ko‘ra oladi.
- Aytgancha, Krishtianu Ronalduni nega ramziy termangizga kiritmadingiz? Bunga oldin «Barsa»da o‘ynaganingiz sababmi?
- Gap unda emas. Shunchaki, 11 kishidan iborat ramziy terma jamoani tuzib berishimni so‘rashdi. Oldingi chiziqqa Messi va Neymarni qo‘ydim. Ular «Barsa»da ajoyib juftlikni tashkil qilishgandi.
Qolaversa, Neymarning Krishtianudan kam joyi yo‘q. Lekin Ronalduni jahonning eng yaxshi futbolchilaridan biri deb tan olaman.
- Rossiyalik Fyodor Smolovning «Real» a’zosiga aylanishi mumkinligi haqidagi xabarlarga munosabatingiz qanday?
- Bu short-list qandayligini bilmaymiz. Undan 100 kishi yoki 2 kishi o‘rin olishi mumkin. Har nima qilganda ham Fyodorga shunday klubning qiziqish bildirgani yoqimli.
Smolov - kuchli futbolchi. Menimcha, u «Krasnodar»ni tark etishi kerak. Unga Angliyadan taklif bo‘layotgani rostmi?
- «Vest Xem» qiziqish bildirayotgani to‘g‘risida yozishdi. Bu Smolovning darajasimi?
- Smolovning darajasi? To‘g‘risini aytadigan bo‘lsam, «Vest Xem» «Krasnodar»dan kuchli. Angliya - bu Angliya. U yerdagi barcha klublarda ajoyib futbolchilar to‘p surishadi. Fyodor «Krasnodar»gacha qayerda o‘ynagan?
- «Dinamo», «Anji», «Ural».
- Mana, ko‘rdingizmi? Agar u «Real» yoki «Barselona»dan «Vest Xem»ga ko‘chib o‘tganida, daraja haqida gapirsak bo‘lardi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
O‘zbekiston
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
