Bugun, 23 mart kuni Milliy olimpiya qo‘mitasida O‘zbekiston Respublikasi Prezidenti Shavkat Mirziyoyev tomonidan e’lon qilingan “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari to‘g‘risida”gi farmon ijrosini ta’minlash ishlarini nazorat qilish, uni yanada jonlantirishga qaratilgan katta yig‘ilish tashkil qilindi.
Unda O‘zbekiston Milliy olimpiya qo‘mitasi, Jismoniy tarbiya va sport vazirligi hamda O‘zbekiston futbol assosiasiyasida faoliyat olib borayotgan mutaxassislar, Rseupblika Oliy sport mahorati maktablari rahbarlari ishtirok etishdi. Yig‘ilishni Milliy olimpiya qo‘mitasi Prezidenti Umid Ahmadjonov va Jismoniy tarbiya va sport vaziri Shoakram Isroilovlar olib borishdi.
MOQ rahbari yig‘ilishda farmonda belgilab berilgan mamlakatimizda sport erkin iqtisodiy zonasini tashkil qilish bo‘yicha ishlarni jonlantirish, unga yirik xorijiy kompaniyalar va sarmoyadorlarni jalb qilish bo‘yicha alohida topshiriq berdi.
Shuningdek, respublika sport federasiyalar va assosiasiyalarining qaytadan shakllantirilgan shtat jadvallarini yaqin vaqtlar ichida tasdiqlash borasida ma’lum qilindi. Undan tashqari yakkakurash sport turlarida har bir vazn toifasida terma jamoa uchun saralab olinadigan to‘rt nafardan sportchilar aprel oyidan Osiyo o‘yinlariga qaratilgan o‘quv-mashg‘ulot yig‘inlarini boshlashi haqida aytildi.
"Reja bo‘yicha har bir vazn toifasida saralangan to‘rt nafar sportchi 1 apreldan boshlab yig‘inlarni boshlashi kerak. Ular Osiyo o‘yinlarida va ungacha xalqaro musobaqalarda yurtimiz sharafini himoya qiladilar. Bundan tashqari sport uchun yo‘naltirilayotgan mablag‘larni maqsadli, samarali sarflashni nazoratini kuchaytirishimiz lozim. Buning uchun MOQ qoshida alohida inspeksiya ham tashkil qildik.
Olimpiya zaxiralari kollejlari faoliyati sifatiga alohida e’tibor qaratishimiz lozim. Qabul jarayonlarini MOQ, vazirlik va federasiya vakillari ishtirokidagi maxsus komissiya nazorat qiladi. Ular turli kunlarda o‘tkaziladi. Qabul jarayonlarida eng muhimi shaffoflikni ta’minlashimiz kerak. Shuningdek, ular ommaviy axborot vositalari orqali ham yoritilib borilishi lozim", - dedi Umid Ahmadjonov.
Yig‘ilishda Prezident farmoni asosida mamlakat olimpiya terma jamoalari uchun ajratilgan o‘quv-mashg‘ulotlar bazalari uchun loyiha va smetani tayyorlash borasida ko‘rsatma berildi. Unga ko‘ra yaqin vaqt ichida Samarqand viloyati Samarqand tumanida universal olimpiya tayyorgarligi va xalqaro musobaqalar o‘tkazish markazi, Toshkent viloyati Bo‘stonliq tumanida joylashgan “Aziya-CHimgan” mehmonxonasi negizida milliy terma jamoalar uchun universal olimpiya tayyorgarligi markazi, Jizzax viloyati Zomin tumanida “Aloqachi” sog‘lomlashtirish oromgohi negizida gimnastika sport turi bo‘yicha olimpiya tayyorgarligi markazi, Namangan viloyati Chortoq tumanida serjantlar tayyorlash maktabi negizida sport o‘yinlari bo‘yicha olimpiya tayyorgarligi markazi va Qashqadaryo viloyati Shahrisabz tumanida “Gulnora” sog‘lomlashtirish oromgohi negizida sport yakkakurashlari bo‘yicha olimpiya tayyorgarligi markazining loyihalari tayyor bo‘ladi, shu bilan birgalikda qurilish va kapital ta’mirlash ishlari boshlab yuboriladi.
Umid Ahmadjonov yig‘ilishda bolalar va o‘smirlar sport maktablari faoliyatini qayta ko‘rib chiqish lozimligi haqida ham gapirdi. "Namangan viloyatidagi gimnastikaga ixtisoslashtirilgan bolalar va o‘smirlar sport maktabiga borganimda dzyudo tatamilari joylashtirilganligiga guvoh bo‘ldim. U yerda shuningdek, boks bo‘yicha mashg‘ulotlar ham tashkil etilar ekan. Buni qanday izohlash mumkin? Axir ushbu BO‘SM faqatgina gimnastika sport turiga ixtisoslashtirilgan", - dedi MOQ rahbari.
Shuningdek, farmon asosida "Bunyodkor" sport majmuasini O‘zbekiston futbol assosiasiyasi balansiga o‘tkazish, Qo‘qon shahrida qurilishi rejalashtirilgan yangi zamonaviy stadionning loyiha va smetasini ishlab chiqish, Toshkent viloyati, Bo‘stonliq tumani Sijjak qishlog‘ida futbol bo‘yicha terma jamoalar uchun baza bunyod etish borasida Sardor Rahmatullayev va Omon G‘ofurovlarga tegishli ko‘rsatmalar berildi.
Uchrashuvda terma jamoalarimizni kuchaytirish uchun xorijdan malakali va tajribali murabbiylar jalb qilish borasida ham gap bordi. Suzish, yengil atletika, qolaversa, voleybol, basketbol, tennis kabi sport turlariga murabbiylarni olib kelish, ularga esa O‘zbekiston davlat jismoniy tarbiya universitetining yuqori bosqich talabalarini malaka oshirish maqsadida biriktirib qo‘yish taklifi ham berildi.
"Sport" telekanali bilan hamkorlikda tashkil etilayotgan "Sport klub" ko‘rsatuvining keyingi sonida sportning yakkakurash turlari - taekvondo, boks, sport kurashlari, karate hamda dzyudo federasiyalari rahbarlari va sportchilari ishtirokida dastur tayyorlash borasida ham reja qilindi.
O‘z navbatida, Jismoniy tarbiya va sport vaziri Shoakrom Isroilov ko‘rsatuvning kecha namoyish etilgan ilk sonida farg‘onalik Haydarjon Abdullayevning karate bo‘yicha yo‘llagan murojaatini o‘rganib chiqish va kerakli choralarni ko‘rish bo‘yicha Jang san’ati va yakkakurashlar departamenti direktori Sardor Toshxo‘jayevga topshiriq berdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
