«Chelsi» va «Arsenal» klublari hamda Fransiya terma jamoasi tarixida yorqin chizgi qoldirgan mashhur himoyachi Vilyam Gallas yodingizdami?
Fransiyalik «beton» himoya (sobiq, albatta) «SE» nashri xodimlari bilan suhbat chog‘i «kanonirlar»ning SSKAga qarshi o‘yinlarini alohida esga oldi:
«Ha, Vagner Lav aynan mening xatoga yo‘l qo‘yishimdan so‘ng darvozabon bilan birga-bir vaziyatga chiqqandi. Ochig‘i, o‘shanda ich-ichimdan o‘tinib so‘ragandim: «Iltimos, zarbasi to‘g‘ri chiqmasin...».
- Vilyam, avvalo, Sankt-Peterburgga tashrifdan ko‘zlangan asosiy maqsadingiz bilan o‘rtoqlashsangiz...
- FIFA taklifiga binoan keldim. Maqsad tayin - jahon chempionatiga qaratilgan tayyorgarlik ishlarini baholash barobarida qadim shaharni tomosha qilish.
- Xo‘sh, taassurotlar qanday?
- Asosiysi - JCH atrofida yaxshi muhit shakllantirish. Tabiiyki, yirik turnirning har bir mezbon mamlakati barchasi talab darajasida o‘tishini xohlaydi.
Bilaman, ayrim davlatlarda Rossiyaning tashkilotchilik bobida omadsizlikka uchrashini kutishmoqda. Lekin ishonchim komil: bu yerda hammasi ajoyib va turnir yakunida ko‘pchilik ruslarga yuqori baho beradi.
- Yevro-2016 vaqti Fransiyada avvalo, qaysi jihatga ko‘proq e’tibor qaratildi?
- Birinchi navbatda, xavfsizlik choralarini kuchaytirdik. Eng muhimi shu. Zero, har bir muxlis mutlaqo xavfsiz joyda ekanligini his qilishi shart. Umuman, Rossiyada ham shu masalaga diqqat bilan yondashayotganlari aniq.
- Marsel shahrida rossiyalik va angliyalik fanatlar o‘rtasida mushtlashuv yuzaga kelgandi. Ochig‘ini ayting, bunday noxush holatlar takrorlanishi mumkinligi borasida xavotir yo‘qmi?
- Ba’zida shunday voqealar ro‘y beradiki, nazorat o‘z-o‘zidan qo‘ldan chiqadi. Lekin Marsel voqealari ruslarga saboq bo‘lsa kerak. Har holda, hech kim bu kabi to‘polonlarni atayin uyushtirmaydi.
Qolaversa, muxlislar JCHdagi missiyalari mushtlashish emas, o‘z jamoalarini qo‘llab-quvvatlash ekanligini tushunishlari kerak. Yoqalashishdan nima ma’no? Undan ko‘ra, futboldan zavq olish yaxshi emasmi?
- Britaniya OAV xabariga ko‘ra, Angliya terma jamoasi yetakchi futbolchilaridan biri JCH-2018 vaqtida o‘ziga shaxsiy tansoqchi yollamoqchi ekan. Bu g‘alati emasmi?
- Hazillashyapsizmi? Kim shunday qiladi? Ayni payt inglizlar yetakchisi kim?
- Garri Keyn.
- Yo‘q, Garrini yaxshi bilaman, u tansoqchi yollamaydi aslo. Umuman, bunday yo‘l tutadigan futbolchini tasavvur qilolmayapman. Menimcha, hammasi uydirma xabar.
- Rossiyalik futbolchilardan kimlarni taniysiz?
- Jirkovni, unga qarshi o‘ynaganman. Yana terma jamoa sardori, darvozabonini bilaman, familiyasi...
- ...Akinfeev.
- Ha, ha. Qolaversa, Arshavin, Pavlyuchenko va Smertin bilan birga o‘ynaganman.
- Rossiya termasi 2008 yildan buyon yirik turnirlarda guruh bosqichidan nariga o‘tolmayapti.
- Demak, jamoa oldida aniq maqsad bor. Bilishimcha, murabbiylar yangi tarkibni shakllantirishmoqda. O‘tmishni unutish kerak. Misol uchun, Fransiya termasi ham og‘ir damlarga yuz tutgan, lekin hozir hech kim o‘sha muvaffaqiyatsizliklarni eslamayapti.
Rossiya termasi uchun eng muhimi - JCH-2018. O‘ylaymanki, jamoa muxlislari ko‘magi ostida guruhdan chiqadi, 1|8 finalda o‘ynasa ham ajablanmayman.
- Keyinchi?
- Yashirmayman, agar ruslar yarim finalgacha turnirda qolishsa, hayratim oshadi.
- Terma jamoa markaziy himoyasida katta muammo bor. Ikki nafar eng kuchli himoyachi - aka-uka Berezuskiylar iyunda 36 yoshga to‘lishlarini aytib, jamoada o‘ynashdan bosh tortishdi. Ularni qanday tushunish mumkin?
- O‘zlari shunday to‘xtamga kelishibdimi, ayblash emas, qarorlarini qabul qilish kerak. Chunki bunday katta turnirda futbolchi mukammal sport formasida bo‘lishi va har 4-5 kunda talab darajasida o‘ynay olishiga ishonishi muhim. Aks holda, foydasidan zarari ko‘proq tegadi.
Qolaversa, 36 yoshda kuchli bosimga dosh berish mushkul, hattoki, markaziy himoyachilar ham juda qiynalishadi. Axir ular yosh, chaqqon va baquvvat hujumchilarga qarshi turishlari lozim.
- Rossiya Premyer-ligasida legionerlarga nisbatan cheklov bor. Sizningcha, bu terma jamoa foydasiga ishlaydimi yoki...?
- Ha, ijobiy ta’siri bor, albatta. Harqalay, mahalliy o‘yinchilar yetarli amaliyotga ega bo‘lishadi. Rossiya chempionatida xorijlik futbolchilar ko‘pligini inobatga olsak, bu o‘rinli cheklov.
- Fransiya termasini JCH favoriti sifatida ko‘rsata olasizmi?
- Jamoamiz favoritlardan biri. Menimcha, kubokka 5ta asosiy da’vogar bor - Braziliya, Ispaniya, Germaniya, Argentina va aynan Fransiya termalari. Ya’ni tartib bo‘yicha shunday - braziliyaliklar birinchi raqamli favorit.
- Milliy jamoangizning eng kuchli va zaif tomonlari...
- Oxirgi o‘yinlarga qarasak, yaqqol kuchli sifatini aytish qiyin. Menimcha, har bir chiziqda iqtidorli yoshlarga egaligimiz ko‘pchilik havasini keltirsa kerak. Lekin jamoaga ruhiy tetiklik yetishmasligi asosiy kamchilikdir. Yana yaqqol yetakchi yo‘q.
- Zidanga o‘xshaganimi?
- Fransiya termasi yetakchilari haqida gap boshlanishi bilan har safar Zizuni eslatishadi. Lekin unutmaylik, 2006 yili bizda 4 nafar yetakchi bor edi - Zidan, Tyuram, Makelele va Viyeyra.
- Yana Anri ham...
- Yo‘q, u bu guruhga 2006 yildan keyin qo‘shilgan. Bungacha shunchaki, yulduz edi va faqat o‘sha JCHdan so‘ng yetakchilikni qo‘lga ola boshlagandi.
- Pogba bugungi jamoani o‘z ortidan ergashtirishga qodirmi?
DAVOMI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
