Xabar berib o‘tganimizdek, 2-8 iyul kunlari Xorvatiyaning Zagreb shahrida sport kurashlari bo‘yicha o‘smirlar o‘rtasida jahon chempionati bo‘lib o‘tdi. Unda yosh polvonlarimiz mustaqil O‘zbekiston tarixidagi eng yaxshi natijani qayd eta olishdi. Ya’ni, bungacha O‘zbekiston terma jamoasi o‘smirlar o‘rtasidagi jahon chempionatida birdaniga uchta oltin medal qo‘lga kirita olmagandi. Yakunlangan musobaqada esa yigitlarimiz millatimiz sporti tarixida yangi sahifa ochishdi desak mubolag‘a bo‘lmaydi.
Bugun tong saharda musobaqada muvaffaqiyatli ishtirok etgan yosh polvonlarimiz yurtimizga qaytib kelishdi. Ularni Islom Karimov nomidagi Toshkent xalqaro aeroportida Milliy olimpiya qo‘mitasi va O‘zbekiston sport kurashlari assosiasiyasi mutasaddilari, muxlislar, sportchilarning yaqinlari va ommaviy axborot vositalari xodimlari kutib olishdi.
Eslatib o‘tamiz, jahon chempionatida erkin kurash bo‘yicha Jamshid Marufov oltin, Shahboz Komilov esa bronza medalini qo‘lga kiritdi. Yunon-rum kurashchilarimizdan esa Abror Atabayev va Lazizxon O‘zbekov oltin, Amir Sultonov bronza medaliga ega chiqishdi.
«Oltin medal sohibiga aylanganimdan keyingi hislarimni so‘z bilan tasvirlab bera olmayman. Hayajon juda kuchli bo‘ldi. Avvalambor, ustoz va murabbiylarimga rahmat aytmoqchiman. Jahon chempionati katta taassurot qoldirdi. Musobaqa ajoyib o‘tdi. Ayniqsa, O‘zbekiston madhiyasi yangragan payt o‘zimni juda boshqacha his qildim.
Eng qiyin jang? Yarim finalda italiyalik raqibimga qarshi bahs men uchun qiyin kechdi. Finalda amaldagi Osiyo chempioni hisoblangan yaponiyalik polvonga qarshi kurashdim, bu bahs ham anchagina murakkab tarzda o‘tdi. Ammo men chempionlik shohsupasi uchun yo‘l qiyin bo‘lishini oldindan bilardim va bunga ruhan tayyor edim.
Musobaqa oldidan barchamiz muvaffaqiyatli ishtirok etishimizga ishongandik. Erishilgan ushbu natijalar bilan to‘xtab qolmoqchi emasmiz. Kelajakda Olimpiada chempioni bo‘lmoqchiman», – dedi roppa rosa 20 yillik tanaffusdan so‘ng O‘zbekistonga erkin kurash bo‘yicha o‘smirlar o‘rtasidagi jahon chempionatining oltin medalini taqdim etgan Jamshid Marufov.
Qahramon sportchilarimiz Toshkent xalqaro aeroportidan ota-onalari va yaqinlari qurshovida usti ochiq sayyoxlik avtobusiga chiqib, poytaxtimiz ko‘chalari bo‘ylab o‘ziga hos chempionlar paradidan o‘tishdi.
Milliy olimpiya qo‘mitasi ushbu muvaffaqiyat bilan O‘zbekiston sport kurashlari assosiasiyasi, chempion sportchilarimiz va ularni tarbiyalagan ustozlarini ushbu tarixiy g‘alaba bilan muborakbod etadi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
