So‘nggi dam olish oqshomlaridan keyin Yevropaning yetakchi chempionatlari vakillari orasida faqat «PSJ» 100 foizli natijani qayd etmoqda - 10ta o‘yin, 10ta g‘alaba. Parij superklubini izma-iz ta’qib qilib kelayotgan «Yuventus» hisobot turida durangga imzo chekdi va qimmatli ikki ochkodan mahrum bo‘ldi.
Angliya. Yetakchilar o‘sha-o‘sha. Lekin...
APLda 9-turni boshlab bergan «Chelsi» - «MYU» uchrashuvi kutilganidek o‘ta qiziqarli va murosasiz ruhda o‘tdi. Chunki uning natijasi har ikki tomon uchun muhim ahamiyat kasb etgandi. Maydon egalari yetakchidan ortda qolmaslik uchun, ularni ikki marta shohsupaga olib chiqqan Mourinyo esa yo‘qolib borayotgan ishonchni o‘ziga qaytarish uchun ijobiy natijaga erishishi shart edi. Bellashuvni mezbonlar faol boshlashdi va tez orada hisobni ochishdi. Ammo ustunlikni mustahkamlashning iloji topilmadi.
Ikkinchi bo‘limda tashabbus «MYU» tomoniga o‘tdi. Natijada Martial tez orada muvozanatni tiklab, keyingi urinishda jamoasini hisobda oldinga olib chiqdi. Tabiiyki, tanaffusdan keyin qarshi hujum taktikasiga o‘tib olgan maydon egalari muvozanatni tiklash umidida oldinga intilishdi. Ammo ancha vaqtgacha raqib darvozasini zabt etish na u, na bu tomonga nasib etdi. Nihoyat, Joze Mourinyo o‘zining sobiq jamoasidan 3 ochko tortib olganini nishonlashga tayyor turgan pallada Ross Barkli de Xea darvozasini ishg‘ol etdi. Mazkur bahs shuningdek, «Chelsi» murabbiylar shtabi vakili va Mourinyo o‘rtasida kechgan dahanaki jang bilan ham yodda qoldi. Portugaliyalik mutaxassisga hamkasbining gapi yoqmay, unga e’tiroz bildirdi. Aftidan, «Benazir»ning «Stemford Brij»ga uyushtiradigan har bir safari chog‘i shu kabi maydon chetidagi mojarolarga ham ko‘nikamiz, chog‘i.
«Chelsi»ning ochko yo‘qotishidan unumli foydalangan «Manchester Siti» va «Liverpul» navbatdagi 3 ochkoni rasmiylashtirib, mavqelarini mustahkamlab oldilar. «Shaharliklar» «Etihad Stedium»da «Byornli»ga ko‘z ochish imkonini berishmadi - 5:0. «Qizillar» esa Muhammad Salohning yagona aniq zarbasi evaziga Xaddersfild safaridan kichik zafar, lekin to‘liq 3 ochko bilan qaytishdi. «Vest Xem» va «Tottenxem» o‘rtasidagi London derbisida ham mehmonlarning minimal ustunligi qayd etildi. Turning yakunlovchi qarama-qarshiligida «Arsenal» «Lester»dan 3:1 hisobida ustun kelgach, peshqadamlarni ta’qib etayotgan London triosi ochkolar bo‘yicha tenglashib olishdi.
Ispaniya. «Qirollik»dan navbatdagi sensasiya
Bu turga qadar qatorasiga 4 uchrashuvda zafar qucha olmagan «Real» yana o‘z muxlislarini ranjitdi. Bu gal grand o‘z maydonida «Levante»dan yengilib, uni o‘ziga qo‘shni qilib oldi. E’tiborlisi, mehmonlar tezkor gollar evaziga qo‘lga kiritilgan ikki to‘p ustunligini 72-daqiqagacha saqlab turishdi. Marselo hisobdagi farqni qisqartirganidan keyin ham maydon egalarida mag‘lubiyatdan qutulib qolish uchun ko‘plab imkoniyatlar bo‘ldi. Biroq ulardan foydalanish na Beyl, na Benzema va na Isko yoki Asensioga nasib etdi.
Avvalgi turda karvonboshi bo‘lib olgan «Sevilya» esa bu maqomni o‘z egasiga qaytarib berdi - «Kamp Nou»dagi keskin kurash «Barselona»ning ishonarli g‘alabasi (4:2) bilan yakunlandi. Avval Koutinyoning goliga assistentlik qilgan Messi 12-daqiqada ikkinchi golni o‘z nomiga rasmiylashtirdi, ammo birozdan keyin jarohat olib, maydonni tark etdi. Ana shu yo‘qotish o‘yinga o‘z ta’sirini o‘tkazdi va yirik hisobda mag‘lub bo‘layotgan «Sevilya» ikkita gol bilan javob qaytardi. Shu tariqa «Barsa» yana 1-o‘ringa ko‘tarilib oldi.
Vigodan 3 ochko bilan qaytgan «Alaves» hamda UYEskada debyutant darvozasini ikki bor ishg‘ol etgan «Espanyol» sovrindor o‘rinlarga chiqib olishdi. Qizig‘i shundaki, dastlabki 2 pog‘ona hozirda Kataloniya jamoalariga tegishli: «Espanyol» bilan «Barselona» o‘rtasidagi farq esa atigi 1 ochko! Ochig‘i, bunday manzarani ilk marta ko‘rib turibmiz. Yetakchi trioning doimiy vakili bo‘lgan «Atletiko» «Vilyarreal»ni yenga olmay, 5-o‘ringa tushib qoldi.
Germaniya. «Borussiya»dan sinxron qadam
La Ligada «Real» inqiroz botqog‘idan chiqa olmayotgan bo‘lsa, Bundesliga grandi 4ta g‘alabasiz seriyadan so‘ng o‘ziga kelgan ko‘rinadi. Niko Kovach shogirdlari Volfsburgdan ishonchli zafar bilan qaytishdi - Levandovskining «dubl»i va samarali uzatmasi chempionga 3:1 ko‘rinishidagi g‘alabani keltirdi.
Bu pallada Dortmund va Menxengladbaxning nomdosh jamoalari mos ravishda «Shtutgart» hamda «Mayns» ustidan bir xil - 4:0 hisobida zafar quchdilar. Shuningdek, «Verder» ham safarda «Shalke»dan ustun kelib (2:0), 3-pog‘onani saqlab qoldi. «Ayntraxt» tomonidan qayd etilgan xokkeyga xos hisobdagi g‘alaba (7:1) alohida e’tiborga loyiq. «Fortuna»ga qarshi bahsda «penta-trik»ka erishgan Luka Yovich o‘z hisobidagi gollar sonini 7taga yetkazib, to‘purarlar ro‘yxatida peshqadamlikni o‘z qo‘liga oldi. To‘g‘ri, merganlar poygasida unga joriy mavsum raqiblar darvozasini yetti marta ishg‘ol qilgan Pako Alkaser asosiy raqobatchi bo‘lib turibdi.
Fransiya. «PSJ»ga gap yo‘q!
Ortda qolgan turlar natijasidan xulosa chiqaradigan bo‘lsak, Parij superklubining muddatidan ancha avval chempionlikni naqd qilishiga shubha qolmaydi. Hozir yetakchi ligalar o‘rtasida faqat «PSJ» ochko yo‘qotmasdan o‘ynashda davom etmoqda. Bu gal jamoa o‘z maydonida «Amyen» darvozasiga 5ta javobsiz gol urdi. To‘plar nisbati - 37ga 6. Sermahsullik va himoya mustahkamligi borasida ham eng yuksak ko‘rsatkich. Xullas, Tomas Tuxelning debyut mavsumi fantastik tarzda o‘tmoqda.
Ta’qibchilar o‘rtasidagi bahs esa tobora qizg‘in tus olmoqda. To‘g‘ri, «Lill» hamda «Monpelye» navbatdagi 3 ochkoni o‘z hisoblariga qo‘shib qo‘ydilar. Ammo «Lion» va «Marsel»dek grandlar o‘zlariga kelib, boy berilgan mavqelarini tiklashga intilishmoqda. Faqat «Monako» hamon muammolar girdobida. Hatto Tyerri Anridek afsonaning kelishi ham hozircha samara bermadi - jamoa Strasburg safaridan quruq qaytdi. To‘g‘ri, bu bellashuvda omad knyazlik klubidan yuz o‘girgani ham haqiqat. Avvaliga hakam Falkaoning sof golini inobatga olmadi, birozdan so‘ng sermahsul to‘purar jarohat olib maydonni tark etdi. Ilk daqiqadan maydonga tushgan Golovin esa o‘yinda burilish yasay olmadi. Yakunda 1:2 hisobida mag‘lub bo‘lgan «Monako» jadval tubidan jilmadi.
Italiya. Tarixiy, lekin tatimagan rekord
«Yuventus» - «Jenoa» bellashuvida Krishtianu Ronaldu Yevropa futboliga tarixiy rekordni tuhfa etdi - portugaliyalik to‘purar top-chempionatlar doirasida 400ta (La Ligada 311, APLda 84 va «A» seriyada 5) gol urgan dastlabki futbolchiga aylandi. Biroq uning aniq zarbasi evaziga oldinga chiqib olgan chempion g‘alabani ushlab qola olmadi - 67-daqiqada Daniel Bessa muvozanatni tikladi. Natijada «Keksa sinyora» bir ochko bilan kifoyalandi.
«Napoli» esa Udineda yirik g‘alabaga erishib (3:0), o‘rtadagi farqni qisqartirib oldi. «Roma»ning o‘z uyida «SPAL»ga imkoniyatni boy bergani turning kutilmagan natijasi sifatida e’tirof etildi. «Lasio» safarda «Parma»ni yengdi - 2:0, «Inter» esa Milan derbisida azaliy raqibidan 3 ochkoni tortib oldi. So‘nggi daqiqalarda Mauro Ikardi tomonidan urilgan gol «neradzurri»ga muhim g‘alabani hadya qildi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
