«Milan»da o‘zini ko‘rsatayotgan Xesus Suso italiyalik jurnalistlarga intervyu berdi. Quyida ana shu suhbatni o‘qishingiz mumkin.
- Xesus, joriy mavsum top-5 chempionatlardagi eng yaxshi assistent bo‘lib turibsiz. Bu haqda qanday fikr bildirasiz?
- Ko‘p ishlasangiz, natijalar uzoq kuttirmaydi. Hammasi tinimsiz mehnat evaziga bo‘ldi. «Milan»da ajoyib futbolchilar jamlangan. Haqiqatan ham, biz maydonda bir-birimizni yaxshi tushunib harakat qilyapmiz. Shuningdek, o‘zim ham ajoyib sport formasiga kirib boryapman.
- Yaqinda farzandlik bo‘lasiz. Uning dunyoga kelayotgani ham siz uchun rol o‘ynayaptimi?
- Qallig‘im bilan munosabatlarimiz ajoyib. Albatta, farzandimizning dunyoga kelishi biz uchun yangiliklar taqdim etadi. Juda xursand bo‘lish bilan birga, hayajonlanyapman. U xuddi men kabi noyabr oyining birinchi haftasida dunyoga kelishi kerak.
- O‘g‘il bo‘lsa, Romanyoli tufayli unga Alessio deb nom berasizmi?
- Albatta, yo‘q (kuladi). U shu yerda, Italiyada tug‘iladi. Ushbu mamlakatni qallig‘im ikkovimiz juda hurmat qilamiz. Shu bois chiroyli italyancha ism tanlaymiz.
- Agar gol ursangiz, uni bo‘lajak o‘g‘lingizga ataysizmi?
- Umr yo‘ldoshim «Sassuolo»ga qarshi o‘yinda gol ursam, bo‘lajak farzandimizga bag‘ishlashimni kutgan ekan. Lekin o‘sha payt jamoa qiyin kunlarni boshidan o‘tkazayotgandi. Shu bois ham birinchi qilgan ishim murabbiyni quchoqlash bo‘ldi.
- Gattuzo haqida qanday fikrdasiz?
- O‘zgacha inson. U haqda yomon gapirayotganlarga quloq solmang. Shubhasiz, futbolchilar ham, murabbiylar ham o‘sishimiz kerak. Gattuzo o‘tgan mavsumning o‘rtasida ishga kirishdi va ko‘plab muammolarni bartaraf etdi. Menimcha, ayni paytda «Milan» uchun kerakli murabbiy aynan u. O‘zining chempionlik faoliyatiga qaramay, Gattuzo ochiq, oddiy inson. U bilan jahondagi har narsa haqida gaplashish mumkin.
- Klubga Leonardo va Maldinining kelishi muhitni o‘zgartirdimi?
- Ba’zida Leonardo bilan o‘yinlar, shaxsiy masala borasida gaplashaman. Uni hamma narsa qiziqtiradi. Maldini - bu «Milan» degani. U har kuni Milanelloda. Mashg‘ulotlarni kuzatadi, futbolchilar bilan suhbatlashadi, tajribalarini baham ko‘radi. Albatta, bu jamoaning rivojlanishiga yordam beradi.
- Maldiniga qaraganda, «Milan»ning haqiqiy afsonasi bo‘lish istagi uyg‘onadimi?
- Yaqinda klubdagi 100-uchrashuvimni o‘tkazdim. U 900ta o‘yinda maydonga tushgan. O‘ylaymanki, muxlislar muhabbatiga sazovor bo‘lib, ularning qalbidan joy olaman.
- Katta klublardan takliflar bormi? Otangizning «Real» muxlisi ekanligini yaxshi bilamiz.
- Zamonaviy futbolda hamma narsa bo‘lishi mumkin. Balki qachondir klub uchun kerak bo‘lmay qolarman. Lekin ayni payt bu yerda baxtliman va hech qayerga ketmoqchi emasman.
- «Inter»ga o‘tishingiz mumkin edi...
- Darhaqiqat, ikki marta yozgi transferlar bozori paytida «Inter» sotib olishga urindi. Lekin menda jamoani o‘zgartirish istagi bo‘lmadi. O‘tgan yozda ham ular agentim bilan bu borada muloqot o‘tkazishdi. Ammo Mirabelli mendan so‘rab o‘tirmay, «Inter» taklifini rad etdi.
- 2016 yilgi derbi oldidan, agar «dubl» qayd etsangiz uyingizgacha piyoda ketishingizni aytgandingiz. Lekin o‘shanda «San Siro»ga yaqin joyda yashardingiz.
- O‘sha uchrashuvda biz g‘alaba qozonmaganmiz. Endi bunday bema’ni va’dalar bermayman.
- Iguain bilan tandemingiz idealdek ko‘rinmoqda.
- Gonsalo - chempion. U jamoaga tezda kirishib ketdi. Yoshlarga yoram bermoqda.
- U bilan bo‘sh vaqtingizni birga o‘tkazyapsizmi?
- Uch oy qo‘shni bo‘lib yashadik. Har kuni ertalab mashg‘ulotga birga borardik.
- Sizning pozisiyangizda o‘ynaydigan qaysi futbolchini yoqtirasiz?
- Menga Azar juda yoqadi. Bolaligimda Kakaga muxlislik qilardim.
A.AHMEDOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
