Football Leaks futbol olamida sensasion ma’lumotlarni oshkor qilishda davom etmoqda. Kilian Mbappening "Monako"dan "PSJ"ga o‘tishi bilan bog‘liq qiziqarli ma’lumotlar chop etildi.
"Real" Mbappe uchun 180 mln yevro to‘lashga rozi bo‘lgandi
2017 yilning yozida "Monako" Mbappening transferi borasida qizg‘in muzokaralar olib bordi. Muzokaralar transfer muddatining so‘nggi kuniga qadar davom etdi. 20 iyul kuni "Real" fransiyalik futbolchini sotib olish borasida aniq kelishuvga erishgandi.
"Monako" asosiy transfer narxi va qo‘shimcha bonuslarni qo‘shib hisoblaganda 180 million yevro olishi kerak edi. Bundan tashqari, Ispaniya qonuniga ko‘ra, mazkur transfer uchun yana 34 million yevro soliq to‘lanishi lozim edi. "Monako" bu summani to‘lashni istamagani uchun, Florentino Peres to‘lanadigan soliq summasini o‘z zimmasiga oladi. Shu bois, Mbappening transferi "Real" uchun 214 mln yevroga tushar edi.
Bunday kelishuvga qaramay, Kilian Mbappe "PSJ"ga o‘tishni istab qoldi. "Monako" bosh direktori Dmitriy Vasilyev dastlab jamoaning asosiy raqibiga futbolchi sotishni istamadi. Lekin keyinchalik klub "PSJ"dan "Real" taklif qilgan pulni talab qildi. 31 avgust kuni "PSJ" bu taklifga rozi bo‘ldi. Natijada Mbappe Parijga ko‘chib o‘tdi.
"PSJ" va "Monako" soliqlarni chetlab o‘tishdi
"Pari Sen-Jermen" dastlab Kilianni 1 yilga bepul ijaraga oldi. Ammo shartnomada bir yildan keyin uni 145 mln yevroga sotib olish majburiyati bor edi. Bundan tashqari, parijliklar futbolchini keyinchalik boshqa jamoaga sotadigan bo‘lsa, "Monako"ga 35 million yevro bonus to‘lab beradi.
O‘tgan yili Neymarni 222 million yevroga sotib olgan "PSJ", bunday kelishuv orqali moliyaviy halol o‘yin qoidasini buzmaslikka harakat qildi. Ammo Football Leaks tomonidan e’lon qilingan hujjatlar shuni ko‘rsatib turibdiki, bepul shartnoma orqali tomonlar Fransiya soliq tizimidan qochib qolishgan.
"Monako" va "PSJ" o‘rtasidagi dastlabki shartnomaga ko‘ra, parijliklar Mbappening ijarasi uchun 30 mln yevro to‘lashlari kerak edi. Bunday holatda "PSJ" 10 million yevro soliq to‘lashiga to‘g‘ri kelar edi. Shu bois, parijliklar ijara shartnomasini 20 million yevroga tushirishni taklif qilishdi. Bu taklif "Monako" rahbariyatiga yoqmadi. Yakunda ular bepul ijara va 35 million yevro bonusga kelishib olishdi. Transfer oynasi yopilishiga 10 soat qolganida rahbarlar yakuniy qarorga kelishdi.
Futbolchining maoshi
Mbappening vakillari muzokaralar chog‘ida 5 yillik shartnoma davomida futbolchi 55 million yevro maosh olishi kerakligini talab qilishdi. Ya’ni, Kilian 5 yil davomida jami 50 million yevro maosh hamda shartnoma imzolagani uchun yana 5 million yevro mukofot (bu 2 yil davomida to‘lab berilishi kerak) olishi lozim. "Pari Sen-Jermen" bu talabga ham rozi bo‘ldi.
Mbappe birinchi mavsumda 9,5 million yevro maosh olishni istagandi. Ammo klub bunga rozi bo‘lmadi va yildan-yilga o‘sib boruvchi maosh taklif qildi. 2017/18 yilgi mavsumda Kilian 7 mln evro olgan bo‘lsa, ushbu mavsumda 9,3 mln yevro oladi. Uchinchi mavsumda o‘yinchi 10,3 million yevro maosh oladigan bo‘lsa, beshinchi yilda fransiyalik futbolchiga 12 mln. yevro to‘lanadi.
Samolyot, "Oltin to‘p", shaxsiy xodimlar
Eng qizig‘i shu joyda. Mbappe va uning oilasi "PSJ"dan juda ko‘p narsa so‘rashdi. Jumladan, agar Kilian "Oltin to‘p"ni qo‘lga kiritadigan bo‘lsa, jamoaning eng ko‘p maosh oladigan futbolchisiga aylanishini istadi. Bunday holatda uning maoshi 3 baravar oshib ketgan bo‘lardi — 30 mln yevro. "PSJ" bunga rozi bo‘lmadi. Mbappe "Oltin to‘p"ga ega chiqadigan bo‘lsa, futbolchi bir martalik 500 ming yevro miqdorida mukofot olishi haqida shartnomaga band kiritildi.
O‘yinchining ikkinchi talabi. "PSJ" moliyaviy feyr-pley tufayli Chempionlar ligasidan chetlatiladigan bo‘lsa, Mbappe kompensasiya talab qildi, ammo klub bu talabga rad javobini berdi. Uchinchidan, "PSJ" futbolchining yana bir talabini bajarishni istamadi. Unga ko‘ra, jamoa Mbappega shaxsiy samolyot taqdim qilib, u har yili 50 soat davomida bu samolyotda uchishi kerak edi.
"PSJ" futbolchining boshqa talabini bajardi. Uy ijarasi hamda 3 nafar xodimlar — xizmatchi, haydovchi va qo‘riqchining maoshlari uchun oyiga 30 ming yevro to‘lab beradi.
Futbolchining agentlari uchun to‘lov
Football Leaks yana bir qiziq faktni ma’lum qildi. Mbappening transferi uchun ikki nafar agent o‘z ulushlarini olishdi. Jorje Mendeshning (Krishtianu Ronaldu va Joze Mourinyoning agenti) hisob raqamiga transferning umumiy qiymatidan 5 foiz miqdorida — 9 million yevro miqdorida pul kelib tushdi. Aslida Mendesh Mbappening agenti hisoblanmaydi. Mazkur transferda u qanday ishni bajargani noma’lum.
Yana shu narsa ma’lum bo‘ldiki, ushbu transfer uchun pullar "Monako" hisob-raqamiga emas, klub xo‘jayini Dmitriy Ribolovlevning cho‘ntagiga kelib tushadi. 2018 yilning 30 iyul kuniga qadar 77 million yevro tushib bo‘lgan.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
