Xabaringiz bor, kelasi yilning 8-26 yanvar kunlari Tayland mamlakatida U-23 Osiyo chempionati musobaqasi o‘tkaziladi. Mazkur musobaqada 1-3 o‘rinni egallagan jamoalar Tokioda bo‘lib o‘tadigan Olimpiada yo‘llanmasini qo‘lga kiritadi.
O‘zbekiston olimpiya terma jamoasi Toshkentda o‘tkazilgan Osiyo chempionati saralashida muvaffaqiyatli qatnashib, musobaqa yo‘llanmasini qo‘lga kiritgani haqida avval xabar berib o‘tgandik. Ana shu musobaqaga munosib tayyorgarlik ko‘rish uchun O‘zbekiston futbol assosiasiyasi tomonidan barcha zarur chora- tadbirlar amalga oshirilmoqda.
Bugun O‘zbekiston futbol assosiasiyasida O‘zbekiston olimpiya terma jamoasining tayyorgarligiga bag‘ishlangan yig‘ilish o‘tkazildi. Yig‘ilishda terma jamoa uchun yig‘inlar tashkil etish va kuchli raqiblar bilan o‘rtoqlik o‘yinlari o‘tkazish masalalari muhokama qilindi. Shuningdek, terma jamoaga nomzod har bir futbolchining jismoniy va ruhiy holatini doimiy ravishda nazorat qilib borish, buning uchun O‘FA mutasaddilari ular bilan doimiy aloqada bo‘lishi, suhbatlar olib borishi zarurligi, futbolchilarni qiynayotgan muammo va masalalar tezda hal qilinishi kerakligi ta’kidlandi.
O‘zbekiston olimpiya terma jamoasi oldiga Tokio-2020 olimpiadasiga yo‘llanmani qo‘lga kiritish bosh vazifa qilib qo‘yilgani, mazkur maqsadga erishish uchun barcha bir tanu bir jon bo‘lib harakat qilishi kerakligi ham ta’kidlandi. Terma jamoa uchun aniq rejalar belgilab olindi.