Bekobodning “Metallurg” jamoasi bugungacha kuchlilar safida 637 ta uchrashuv o‘tkazgan bo‘lib, shulardan 212 tasida g‘alaba nashidasini surgan.
131 ta o‘yinda raqiblar bilan ochkoni baham ko‘rgan hamshaharlarimiz, 294 ta o‘yinda imkoniyatni boy berishgan. Hozirgacha “Metallurg” raqiblari darvozasiga 790 ta gol urib, o‘z darvozalaridan 991 ta to‘p olib chiqishgan. Bu yil Bekobodning “Metallurg” jamoasi raqiblar darvozasiga yubiley – 800-golni kirita oladimi? Agar yana beshta o‘yin qolganligini inobatga olsak bu vazifani bajarish keyingi mavsumga qolishi ehtimoli ham yo‘q emas. Boisi keyingi paytlarda jamoalar pragmatik futbol namoyish etishyapti.
Ya’ni raqib darvozasi ishg‘ol etilgach, aksariyat hollarda qayd etilgan natijani saqlashga uriniladi. Ammo “Metallurg” so‘nggi turni anchayin sermahsul o‘tkazdi. Safarda “Qo‘qon 1912” jamoasi darvozasi uch bora ishg‘ol etildi. Andrey Shipilov shogirdlari ushbu kayfiyatni keyingi uchrashuvlarda ham saqlab qolishsa, yubiley golni shu mavsumda ham ko‘rsak ajabmas. Siz qanday bo‘lishini xoxlardingiz, aziz muxlis?
“Metallurg”ning 2019 yilgi mavsumda qolgan uchrashuvlari:
22-tur, 18 oktyabr: “Metallurg” – “So‘g‘diyona”
23-tur, 29 oktyabr: “Qizilqum” – “Metallurg”
24-tur, 4 noyabr: “Metallurg” – “Dinamo”
25-tur, 24 noyabr: “Buxoro” – “Metallurg”
26-tur, 27 noyabr: “Metallurg” – “Surxon”