«Monterrey» klubi pley-off bosqichi finalida g‘alaba qozonib, Meksika chempionligini qo‘lga kiritdi. «Amerika»ga qarshi ikkita o‘yin natijasida durang (3:3) qayd etilgan bo‘lsa, penaltilar seriyasida «Monterrey» 4:2 hisobida g‘alaba qozondi. Shu tariqa, jamoa 2010 yildan beri ilk marta chempionlikni qo‘lga kiritdi.
Penaltilar seriyasida g‘alaba to‘pi kiritilganidan keyin «Monterrey» futbolchilari g‘alabani nishonlash uchun maydonga yugurib chiqib ketishdi, ammo klub bosh murabbiyi Antonio Muhammad zaxira o‘rindig‘ida qoldi va qo‘lida tasbehni ushlagancha xo‘ngrab yig‘lab yubordi. Boisi, u hayotidagi eng katta va’daning ustidan chiqqan edi.
Antonio Argentinaning Buenos-Ayres shahrida tug‘ilgan bo‘lsa-da, uning kelib chiqishi Livan va Suriya mamlakatiga borib taqaladi. Uning futbolchilik va murabbiylik faoliyati asosan Argentina va Meksika klublari bilan bog‘liq. Muhammad 1998-2000 yillarda «Monterrey»da hujumchi sifatida o‘ynagan va uning o‘g‘li Farid bu klubni yaxshi ko‘rib qolgan.
Antonio esa o‘z o‘g‘liga vaqti kelib «Monterrey»ga qaytishga va sovrin qo‘lga kiritishga va’da bergan edi. Farid esa 2006 yilda avtohalokat tufayli hayotdan ko‘z yumgan. O‘shanda Muhammad ham oyog‘idan ajralishiga bir baxya qolgan.
Fojia Germaniyada ro‘y bergan edi. Farid Argentina terma jamoasini JCH-2006da qo‘llab-quvvatlashni istagan edi. Otasi esa uni Mundialga olib kelgan edi. Drezden-Frankfurt trassasida mashina qarama-qarshi yo‘lga chiqib ketib, ota-o‘g‘il o‘tirgan o‘tirgan avtomobilga kelib urilgan edi...
Antonio Muhammad murabbiylik faoliyati davomida «Tixuana» va «Amerika» bilan ikki marta Meksika klausurasida g‘olib chiqqan. 2015 yilda esa «Monterrey»ni qabul qilib oldi. U dastlabki 3 yilda jamoani ikki marta chempionat finaliga olib chiqib, har ikkalasida imkoniyatni boy berdi. Shundan so‘ng u Ispaniyaning "Selta" klubiga yo‘l oldi. Muhammad 2019 yilda jamoaga qaytdi va chempionlikni qo‘lga kiritdi.
Bundan 2 hafta ilgari Antonio «Monterrey» bilan klublar o‘rtasidagi jahon chempionatining bronza medalini qo‘lga kiritdi. Jamoa chorak finalda Qatarning "As-Sadd" klubini mag‘lub etgan bo‘lsa, yarim finalda "Liverpul"ga imkoniyatni boy berdi. 3-o‘rin uchun o‘yinda Saudiyaning "Al-Hilol" klubini penaltilar seriyasida mag‘lub etdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
