Stadion.uz (o‘z versiyasiga ko‘ra) ayni damda Afrika qit’asining eng kuchli futbolchilaridan tashkil topgan kuchli beshlikni taqdim etadi. Ushbu ro‘yxat futbolchining futbol olamidagi o‘rni va o‘tgan mavsumdagi statistikasi asosida tuzilgan.
5-o‘rin. Riyad Marez
Ochig‘i, kuchli beshlikni Kalidu Kulibali ochib berishi lozim edi. Yevropaning barcha grandlari e’tibor markazidagi himoyachi o‘tgan mavsumni ko‘tarinki kayfiyatda o‘tkazdi, ammo biz «Manchester Siti» vingeri Riyad Marezni undan biroz ustunroq hisobladik. Gap shundaki, jazoirlik futbolchi Pep Gvardiola qo‘l ostida o‘z o‘yinini yanada kuchaytirishga muvaffaq bo‘ldi. To‘g‘ri, uni «shaharliklar»ning asosiy tarkib futbolchisi deb bo‘lmaydi, biroq Marezning «Siti»da o‘z o‘rni bor. APLdek shiddatli musobaqada ketma-ket uch bor chempion bo‘lgan futbolchi “A seriya”da aytarli hech narsa erisha olmagan Kulibalidan biroz balandroqdan o‘rin egallashi adolatdan bo‘ladi. Qahramonimiz o‘tgan mavsumda APL bahslarining 33 tasida maydonga tushdi va o‘z hisobiga 11 ta gol yozdirib qo‘ydi.
4-o‘rin. Ashraf Hakimi
Yangi mavsumni Milanning «Inter» safida boshlagan Hakimi haqida alohida to‘xtalib o‘tishimiz lozim. Qisqa fursat ichida super progressni namoyish etgan Ashraf Bundesliganing eng yaxshi futbolchilaridan biriga aylandi. Ikki mavsum davomida Dortmund klubi safida rekordlar o‘rnatgan qahramonimizga «Real» asosiy tarkibdan joy ajratib bera olmadi. Bunga Dani Karvaxalning super stabilligi sabab bo‘ldi. Zidan Hakimini yanada tajribaliroq bo‘lishi uchun Milanga qo‘yib yuborishga qaror qildi. Uning transferidan «Real» 40 million yevro daromad olgan bo‘lsada, qayta sotib olish bandini shartnomaga kiritishni yoddan chiqarmadi. Hakimini nafaqat tezkor, balki juda sermahsul qanot himoyachilari sirasiga kiradi. Ashraf o‘tgan mavsumda Bundesliganing 33 ta o‘yinida maydonga tushdi va o‘z hisobiga 10 ta assistni yozdirib qo‘ydi. Bundan tashqari, 5 ta gol kiritishni ham uddaladi. Shunchaki, fantastik natija.
3-o‘rin. Pyer-Emerik Obameyang
Gabon terma jamoasi va “Arsenal” sardori kuchli uchlikni ochib beradi. Yevropaning ko‘plab nashrlari ayni damda sayyoramizning eng kuchli markaziy hujumchisi sifatida Obameyangni ko‘rsatadi. Darhaqiqat, qahramonimiz o‘tgan mavsumda “Arsenal”ni juda qiyin ahvoldan olib chiqib ketdi. Mikel Arteta shogirdlari APL uchrashuvlarida omadsiz ishtirok etishdi, biroq mavsumni sovrin bilan yakunlashdi. 31 yoshli hujumchi bilan «Barselona» uzoq muddat qiziqish bildirdi, ammo gabonlik futbolchi uchun ularda pul topilmadi.
Gabon terma jamoasining barcha zamonlardagi eng yaxshi futbolchisi sanaluvchi Obameyangning o‘tgan mavsumdagi statistikasiga e’tibor qarating. APLning 36 ta o‘yinida maydonga tushgan qahramonimiz o‘z hisobiga 22 ta gol+ 4ta assistni yozdirib qo‘ygan. Aynan u o‘tgan mavsumda kuchli beshlik doirasida eng sermahsul «qora qit’a» vakiliga aylandi.
2-o‘rin. Sadio Mane
Ayni damda Sadio nafaqat Afrikaning, balki butun dunyoning eng kuchli futbolchilaridan biri sanaladi. Uning mehnatkashligi, pressingdagi faolligi, hujumdagi chaqqonligi «Liverpul»ga sovrinlar yutishda qo‘l kelmoqda. Qahramonimiz, o‘zining super jismoniy imkoniyatlar egasi ekanligini allaqachon barchaga isbotlab qo‘ydi. Senegal terma jamoasi yetakchisi katta futbolgacha bosib o‘tgan yo‘li insonni hayratda qoldirishi turgan gap.
E’tiborlisi shundaki, Mane «Sautgempton» safida shunchaki chaqqon futbolchi edi xolos. Yurgen Klopp uni taktik va nazariy bilimlarini yuqori darajaga olib chiqdi. Aynan shu omil evaziga, Mane qisqa muddatda «Liverpul» uchun katta effekt berishni boshladi.
«Liverpul»ning chempionligi bilan yakunlangan mavsumda Mane 35 ta o‘yinda ishtirok etdi va o‘z hisobiga 18 gol+9 ta assistni yozdirib qo‘ydi.
1-o‘rin. Muhammad Salah
Salah zamonaviy «Liverpul»ning yetakchisiga aylanib ulgurdi. Buni hamma anglab turibdi. Jamoaning YECHLdan erta chiqib ketganiga qaramay, «Liverpul» sayyoramizning eng qudratli jamoasi bo‘lib turibdi. Ushbu klubning yetakchi futbolchi esa, Misr terma jamoasi a’zosi Muhammad Salah!
Salah ham endi 28 yoshga qadam qo‘ydi. Uning futbolchilik faoliyati yanada yuqoriroq nuqtaga ko‘tarilishi mumkin. Bugungi kunda uning ismi Neymar, Mbappe, Ronaldu va Messi singari ijrochilar bilan bir o‘rinda tilga olinadi.
Qahramonimiz o‘tgan mavsumda APL bahslarining 34 tasida ishtirok etdi. 19 ta gol va 19 ta assistga mualliflik qildi. Eng muhimi esa, «Liverpul» muxlislari 30 yil kutgan sovrinni – APL chempionligini taqdim etishda bosh rolni ijro etdi. Shunday ekan, Salahni ayni damda Afrika qit’asidagi eng yaxshi futbolchi desak, adashmagan bo‘lamiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
