Faoliyatini keng qamrovda olib borishga harakat qilayotgan «Bunyodkor» yana bir tashabbusga qo‘l urdi.
Kecha mamlakatimizdagi eng nomdor bilim dargohlaridan biri Toshkent davlat iqtisodiyot universitetiga tashrif buyurgan «Bunyodkor» hamkorlik memorandumini imzoladi. Universitetning Madaniyat saroyida tashkil qilingan tadbirda talabalardan tashqari, o‘qituvchilar, kafedra mudirlari, dekan va shaxsan rektor Sharipov Kongratboy Avezimbetovich ishtirok etdi. «Bunyodkor» vakillari orasida klub direktori Ulug‘bek Mirzayev, moliya menejeri Shomurod Isroilov, marketing mutaxassisi Shuhrat Turdiyev hamda futbolchilar Xurshid G‘iyosov, Rasul Yo‘ldoshev, Sarvar Karimovni ko‘rish mumkin edi.
Tadbir avvalida universitet rektori Sharipov Kongratboy Avezimbetovich so‘zga chiqib, mazkur hamkorlik memorandumi haqida batafsil to‘xtaldi. Shuningdek, «Bunyodkor» futbol klubi to‘g‘risida iliq fikrlar bildirar ekan, jamoamizning yorqin tarixini eslab o‘tdi. So‘ng «Bunyodkor» futbol klubi direktori Mirzayev Ulug‘bek Abdusattorovich so‘z oldi. Klubimiz rahbari so‘zi avvalida «Bunyodkor» muxlislar uchun o‘ynaydi», shiorini eslab o‘tar ekan, hamkorlik memorandumining asl maqsadi ishqibozlar ekanligiga alohida ahamiyat qaratdi. Ya’ni, mazkur hamkorlik memorandumiga ko‘ra, Toshkent davlat iqtisodiyot universiteti talabalari «Bunyodkor»ning uy uchrashuvlarini bevosita stadionda tomosha qilishlari bepul etib qo‘yiladi. Futbol iqtisodiyoti bilan shug‘ullanishni istagan talabalarga ham bu borada sharoit yaratib beriladi. Qolaversa, «Xalqaro turizm» fakulteti talabalari xorijlik turistlarni «Bunyodkor» stadioniga, muzeyiga olib kelish bo‘yicha ish olib borishlari mumkinligi ham ta’kidlandi.
Rahbarlar so‘zlarini yakunlagach, tadbirning eng asosiy qismi – hujjatlarni imzolash jarayoni o‘tkazildi. Sharipov Kongratboy Avezimbetovich va Mirzayev Ulug‘bek Abdusattorovich hamkorlik memorandumiga imzo chekar ekan, ushbu hujjat har ikkala tomon uchun ham foydali bo‘lishini tilab, bir-birlariga qo‘l berishdi hamda o‘zaro sovg‘alar almashishdi.
Tadbirning rasmiy qismlari yakunlangach, talabalarga «Bunyodkor» rahbarlari va futbolchilariga savol berish imkoniyati berildi. Asosiy savollar nega milliy terma jamoamizning jahon chempionatiga chiqa olmayotgani-yu, yaxshi futbolchi bo‘lib yetishish uchun nimalarga ahamiyat qaratish ekanligi haqida bo‘ldi. Uchala futbolchimiz ham talabalarning barcha savollariga batafsil va qoniqarli javob berdi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
