Coca Cola Superligasining yangi mavsumiga qur’a tashlanganidan so‘ng “Metallurg”ning o‘tgan yilgi mavsumi birinchi goli muallifi Abror Toshqo‘ziyev bilan kichik musohaba uyushtirdik.
— Abror, mana yangi mavsumga qur’a tashlandi. Ilk turdagi raqiblar ma’lum. Birinchi uchrashuvni safarda “Surxon”ga qarshi o‘tkazamiz. Taassurotlar qanday?
— Qur’a jarayonini intizorlik bilan kutgandik. Chunki, qur’a amalda yangi mavsumni boshlab beradi-da: kimga qarshi, qachon o‘ynashing kerakligini bilib olasan. Bu yil ham ikki mavsum avvalgidek chempionatni “Surxon”ga qarshi boshlarkanmiz. Qur’a jarayonidayoq 2019 yilgi Termizda bo‘lib o‘tgan o‘yin yodimizga keldi. O‘shanda Superligada debyutini o‘tkazayotgan klubga qarshi ancha qiyin o‘yin bo‘lgandi. Maydon egalari tezkor gol kiritib, rejalarimizni chalkashtirib yuborgan, o‘yin oxiriga kelgandagina mag‘lubiyatdan qutilib qolgandik. Endi bu yil o‘sha xatolarni takrorlamaymiz. Ilk o‘yinga jiddiy tayyorgarlik ko‘ramiz va albatta muxlislarimizni xursand etamiz deb o‘ylayman.
— 2020 yilgi mavsumni ham safarda boshlagan edik va AGMK jamoasi darvozasiga kiritgan golingiz “Metallurg”ga bir ochko olib bergandi. Bu yil qanday bo‘ladi?
— Imkon berilsa, maydon tushsam, albatta o‘tgan yilgi muvaffaqiyatni takrorlashga harakat qilaman. Raqib kim bo‘lishidan qat’iy nazar, biz doimo g‘alaba uchun o‘ynaymiz.
— Muxlislarimiz sizning maydonga qaytishingizni kutishmoqda. Davolanish jarayoni yakunlandimi?
— Ha, Xudoga shukur, hammasi ortda qoldi. Jarrohlik amaliyoti ko‘ngildagidek bo‘ldi. Individual tarzda shug‘ullanishni boshladim. Yana bir haftalardan keyin jamoaning umumiy mashg‘ulotlariga qo‘shilaman. Umid qilamanki, chempionatning dastlabki uchrashuvlarigacha jismoniy formamni tiklab olaman.
— O‘tgan mavsum “Metallurg”ning asosiy tarkibi yettinchi o‘rinni egallagandi. Yoshlar jamoamiz esa mamlakat birinchiligining g‘olibi bo‘lishgandi. Bu yilgi rejalar qanday?
— “Metallurg” so‘nggi yillarda barqaror futbol namoyish etib, muxlislarimizni xursand etib kelmoqda. Ketma-ket ikki mavsum 5-o‘rinni egalladik. O‘tgan yilgi natijamizdan ham ishqibozlarimiz qanoatlanishdi, deb o‘ylayman. Bu yilgi maqsad va rejalarimiz avvalgi mavsumlardagi muvaffaqiyatni takrorlash, undan past natijani ko‘rsatmaslik bo‘ladi. Asosiy tarkib bir qator tajribali futbolchilar bilan kuchaytirildi. Rossiya terma jamoasida o‘ynagan Yevgeniy Makeev safimizga qo‘shildi. O‘zbekiston terma jamoasi hujum chizig‘ida to‘p surgan, sobiq jamoadoshimiz Shahzodbek Nurmatov qadrdon klubiga qaytdi. Yana bir hujumchi Ivan Nagayev ham o‘z vaqtida “Metallurg”da porlab, kuchli klublar e’tiboriga tushgandi. Muxlislarimiz tarkibimizda yana bir qator yangi nomlarni ko‘rishadi. Xullas, tayyorgarlik avjida. Chempionatning boshlanishini sabrsizlik bilan kutamiz. Yoshlar jamoamiz esa o‘tgan mavsum plankani juda yuqori ko‘tarishdi. Natijaga erishishdan, uni saqlab qolish qiyin deyishadi. Bu mavsum yoshlarimizga oson bo‘lmaydi. Ammo har qanday vazifani bajarish jamoaning o‘ziga bog‘liq.
— Abror, biz ham muxlislar nomidan sizning tezroq safga qaytishingizni tilab qolamiz. “Metallurg” esa yangi mavsumda ham grand jamoalarning “kushandasi”ga aylanishini, hujumkor, mazmunli o‘yinlari bilan ishqibozlar olqishiga sazovor bo‘lishini istaymiz.
— Rahmat, aytganingiz kelsin. Biz albatta Bekobod shahri ahlini, O‘zbekiston metallurgiya kombinati ishchi va xizmatchilarini, shuningdek, ko‘p ming sonli Toshkent viloyati futbol ishqibozlarini xursand etish yo‘lida bor kuch va mahoratimizni ishga solamiz.
“Metallurg” matbuot xizmati
Холис таҳлилчи блоги
Жалолиддин Қобилжонов
Фурқат Қурбонов
Ҳасанали ота
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
