O‘zbekiston milliy jamoasi 22-30 mart oralig‘iga belgilangan FIFA kunlari doirasida birinchi o‘rtoqlik o‘yinini Namanganda Gana termasiga qarshi o‘tkazdi. Chiroyli muhit ostida kechgan bahsda hamyurtlarimiz g‘alabani tantana qilishdi. Biz mazkur o‘yin yakunlangach, uzoq tanaffusdan so‘ng yana milliy jamoa libosida maydonga tushgan «Navbahor» sardori Azim Ahmedovni suhbatga tortdik.
- Azim, mana, ma’lum tanaffusdan keyin yana milliy jamoa safida maydonga tushdingiz. Taassurotlar qanday?
- Ajoyib, albatta. Har qanday futbolchi uchun mamlakat bosh jamoadan chaqiruv olish - sharaf. Xudo xohlasa, ishonchni oqlashga harakat qilaman.
- Gana termasiga qarshi kechgan o‘yin yuzasidan umumiy fikringiz...
- Betakror muhit, ajoyib o‘yin. Ayniqsa, stadion tribunalarida yuzaga kelgan manzara yigitlarni maydonda katta ishtiyoq bilan to‘p surishga undadi. Namanganlik muxlislar yurtimizda tengsiz ekanliklarini yana bir karra isbotlashdi. Fursatdan foydalanib, terma jamoa a’zolari nomidan ularga minnatdorchilik bildiraman.
- Markaziy himoyada to‘p tepayotganingiz borasida ko‘p savollar berildi. Ehtimol, pozisiyangizning o‘zgargani ham milliy jamoadan chaqiruv olishingizga zamin yaratgandir.
- Balki shundaydir. Bilasizmi, oldin ham himoyada o‘ynaganman. Ehtimol, murabbiylar orqa chiziqdagi harakatlarimga qarab, yana terma jamoaga chaqirishgandir. Ochig‘i, murabbiylarning qaroriga hech qanday e’tirozim yo‘q. Ular qaysi chiziqqa qo‘yishsa, o‘sha joyda o‘ynashga tayyorman. Muhimi, jamoaga nafim tegsa, bas.
- Terma jamoa sardori, akangiz Odil Ahmedov ma’lum sabablar tufayli bu safar yig‘inga chaqirilmadi. Turli mish-mishlarga qaraganda, Odil ikkinchi davradan «Navbahor»da o‘ynashi mumkin ekan. Bu kabi gap-so‘zlarga oydinlik kirita olasizmi?
- Ha, akam bu safar terma jamoa yig‘inida qatnasholmadi. Afsus, shunday bo‘lib qoldi. Uning «Navbahor»ga kelishi haqida gapirsam, shunday niyati yo‘q emas. Lekin o‘tish joriy yil amalga oshadimi yoki keyinroq - buni vaqt ko‘rsatadi.
- Igor Golbanning terma jamoaga chaqirilmagani sizni hayron qoldirmadimi?
- To‘g‘risi, uni chaqirishlarini kutgandim. Umid qilamanki, keyingi yig‘inlarda Golban bilan birga ishtirok etamiz.
- Endi «Navbahor» haqida: ayrim muxlislar va tashqi kuchlarning klub ichki muhitiga salbiy ta’sir o‘tkazayotgani haqida eshitdik. Jamoa sardori sifatida bu masalada nima deya olasiz?
- Ishoning, «Navbahor»da ichki muhit a’lo darajada! Barcha bir-biri bilan kelishib, tushunib oldi. Hammasi zo‘r!
- «Navbahor» o‘z uyida «So‘g‘diyona» va «Nasaf»ga qarshi uchrashuvlarda qimmatli ochkolarni yo‘qotdi, lekin safarda «Lokomotiv»ni mag‘lubiyatga uchratdi. Jamoaning jonkuyar muxlislari qarshisida g‘alaba qozonishiga nima xalaqit berdi?
- O‘z maydonimizdagi uchrashuvlarda biroz omad yetishmadi, menimcha. Har holda, ikki uchrashuvda ham yetarlicha vaziyatlar yaratdik, oldinga intildik, ammo samara chiqarishda omadimiz kelmadi. Oqibatda muhim ochkolarni boy berdik, endi kelasi o‘yinlarni buning o‘rnini tezda qoplashimiz shart.
- Superliganing 3ta turi ortda qoldi, dastlabki taassurotlar...
- Ko‘ryapmizki, chempionatimizda teng kuchli jamoalar ko‘paygan. Shuning ortidan har bir uchrashuv murakkab tus olmoqda. Asosiysi, yaxshi o‘yinlar soni oshmoqda. Menimcha, muxlislar mavsum yakuniga qadar shunday shiddatli va murosasiz uchrashuvlardan bahra olishadi.
XURSHIDBEK suhbatlashdi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
