Toshkent vaqti bilan 29 maydan 30 mayga o‘tar kechasi soat 00:00 da "Manchester Siti" va «Chelsi» jamoalari o‘rtasida Chempionlar ligasining final uchrashuvi bo‘lib o‘tadi. Mazkur bellashuvni millionlab futbol muxlislari (muxlisalari) orziqib kutishmoqda. Hammada bir xil savol. Bu yilgi g‘oliblik kimga nasib etadi degan fikr-mulohazalar baralla yangramoqda. Hozirdanoq ko‘pchilik futbol ixlosmandlari allaqachon o‘z suyuklilarini qo‘llab-quvvatlashni boshlab yuborishgan. Mazkur bahs oldidan ikki jamoaning holatiga e’tibor qaratishni joiz topdik.
1. Gvardiola faktori bugun qanchalik rol o‘ynaydi?
Tabiiyki, "Manchester Siti" jamoasining YECHL finaligacha yetib kelishining asosiy sababchisi Gvardiola hisoblanadi. Uning qo‘l ostida shaharliklar mana 4-5 yildan buyon tartibli, jamoaviy o‘yin ko‘rsatib kelmoqda. Klub yirik hisobda g‘alaba qozonayotganda ham, mag‘lub bo‘layotgan vaqtida ham futbolchilar maydonda murabbiyning ko‘rsatmalarini so‘zsiz bajarishda davom etadi. Shu boisdan bo‘lsa kerak, ayni damda jahonning eng kuchli 5ta klubidan biri sifatida "Manchester Siti" jamoasi ham tilga olinadi. Bugungi final bahsida ham Pep shogirdlari uning ko‘rsatmalarini uchrashuv yakunlangunga qadar og‘ishmasdan bajarishlari kutilmoqda. Balki ushbu faktor yakunda «Siti» jamoasining g‘alabasini ham ta’minlashi mumkin.
2. Gvardiola hujumchisiz ham natijaga erishish sirini topgandek?
To‘g‘ri, bu taktikani Gvardioladan oldin Ispaniya terma jamoasining sobiq bosh murabbiyi Visente del Boske ham sinab ko‘rgan. Yakunda ushbu taktika evaziga ispaniyaliklar Jahon (2010) va Yevropa chempionligini (2012) qo‘lga kiritishgan edi. Ehtimol, Gvardiola ham jamoasidagi futbolchilarning salohiyatidan kelib chiqqan holda, Visente del Boske qo‘llagan taktika orqali, o‘zi ham, klubi ham orziqib kutayotgan g‘oliblik nashidasini qo‘lga kiritar. O‘sha vaqtda Ispaniya termasining zafarli yurishini ta’minlagan Xavi, Iniyesta, Buskest kabi iqtidorlar darajasiga chiqish uchun harakat qilayotgan bir necha futbolchilar bugungi kunda Sity sharafini himoya qilmoqda. Balki o‘sha Bryune, Silva, Mahrez o‘yin taqdirini hal qilar.
3. Tarix yana takrorlanishi mumkin.
Gap 2012 yilgi YECHLda zafar quchgan «Chelsi» haqida ketayotganligini ashaddiy futbol ishqibozlari darrov sezishdi. O‘sha mavsumda jamoani boshqargan Villash Boshning ishlari qoniqarsiz ketayotganligi sabab, rahbariyat YECHLning 1/8 finalidan o‘rin olgan birinchi bahsda «Napoli»dan uchralgan 3:1 hisobidagi mag‘lubiyatdan so‘ng uni iste’foga chiqaradi. Uning o‘rnini egallagan Dimateo qisqa vaqtda «Chelsi» futbolchilari bilan til topishib, jamoasi bilan tarixiy g‘alabani qo‘lga kiritdi.
Bu yili ham «Chelsi» jamoasida o‘sha tarix yana takrorlanishi mumkin. Mavsum boshida boshqa murabbiy qo‘l ostida harakatlangan klub, yakunda Lempardning o‘rnini egallagan Tuxel boshqaruvida YECHL finaliga qadar qiyinchiliksiz yetib kelishini ta’kidlash joiz. Agar «Aristokrat»lar Tuxel jamoaga kelganidan keyingi o‘yinni takrorlay olsa, bugun kubok ikkinchi bor Londonga yo‘l olishi mumkin.
4. Bugungi uchrashuvda qaysi jamoa birinchi bo‘lib gol urib oladigan bo‘lsa, o‘sha klubning g‘alaba qozonish imkoniyati ortadi. Har ikki jamoaning ham pressing imkoniyati yuqori ekanligidan kelib chiqsak, futbolchilarning ruhiy holati ham yakunda asosiy planga chiqishi mumkin. Kichik bir xatoga yo‘l qo‘ygan klub yakunda YECHL bosh sovrinisiz qolishiga olib keladi. Ushbu holatda murabbiylar katta sahnaga chiqib, qaysi biri o‘yinga puxta tayyorgarlik ko‘rib, shogirdlarini ham jismoniy, ham ruhiy tomonlama tayyorlay olsa, yakunda o‘sha murabbiy Yevropaning bosh sovrinini qo‘lga kiritishi mumkin.
Xullas, hamma har xil fikrda. Gvardiola yoki Tuxel? "Manchester Siti" yoki «Chelsi»? Kubok kimga nasib etadi. Qaysi jamoa Yevropada eng kuchli degan savollarga bir necha soatdan keyin boshlanadigan o‘yinda javob olamiz.
Ilyosbek Mahmudov tayyorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
