Tasavvur qiling, siz top darajadagi hujumchisiz, vaqtingizni asosan Turkiyada gollar urish va sovrinlar yig‘ish bilan o‘tkazgansiz, faoliyatingizni yakunlash uchun qayerga borardingiz? Variantlar ko‘p emas. Hatto MLS ham yoshlar ligasiga aylanmoqda. Javob - barchasini aksincha qilish.
O‘n yarim yildan ko‘proq muddatni o‘z yurtida o‘tkazgan, faqat Xitoyda to‘p surish uchun tanaffus qilgan Burak Yilmaz kuchini Yevropada ko‘rsatishga qaror qildi. Mardonavor qaror: 35 yoshdan keyin top-5 chempionatlarida debyutini nishonlashga hamma ham botinavermaydi.
Ha, Burak original shaxslardan biri. «Lill» u bilan shartnoma imzolashidan xabar topganlarning ko‘pchiligi hayron bo‘lgandi. Qiziq, Yilmaz yangi klubida navbatdagi g‘alaba golini urganidan keyin o‘sha lol qolganlar nima deyishdi ekan? Oldinda yana ikki tur qoldi va tutqich bermas «doglar» «PSJ»ni qiynashda davom etishmoqda.
Umuman, Burakning butun faoliyati diqqatga molik voqealarga boy tarzda o‘tgan. Darvozabon Fikret Yilmazning o‘g‘li hisoblangan qahramonimiz «Antalyaspor» klubi va Turkiya termasi o‘smirlari tarkibida yulduz bo‘lgan. 20 yoshida jamoasining mahalliy chempionat oliy divizioniga chiqishiga ko‘maklashgan. Kattalar termasiga qo‘shilganda esa, bo‘lajak yulduz maqomiga erishgan. Ko‘p o‘tmay, uni «Beshiktosh» o‘z safiga chorlab, asosiy tarkibdan joy kafolatladi. Bunday taklifni rad etib bo‘larmidi?
Biroq u yerdagi start yorqin kechmadi: gol urishda qiynalgani sabab kamtarona «Manisaspor»ga ketishga to‘g‘ri keldi. Ko‘p o‘tmay, endi boshqa bir grand - «Fenerbaxche»dan taklif tushdi, ammo bu klubda ham Burakning ishlari yurishmadi. Ma’lum muddat ijarada yurgan Yilmaz endi «Tranbzonspor» tarkibiga qo‘shildi.
Aynan o‘shanda, ya’ni 2010 yili 25 yoshni qarshilagan pallada uning faoliyatida o‘sish boshlandi. Yilmaz ikki yarim mavsum davomida gollaridan zavq oldi, mavsum-2011|2012da 31ta o‘yinda 33ta to‘p kiritdi. Bunday sermahsullikdan so‘ng «Galatasaroy»ga o‘tdi va mazkur klubdagi moslashish jarayonida qiyinchilikka uchramadi. To‘rt mavsumning ikkitasida jamoasi bilan chempionlikka erishdi, hayotdan rohatlandi, boz ustiga, termada ham ishlari yurishayotgandi. Bu samaradorlikni kuzatgan xitoyliklar unga katta maoshli taklif yo‘llashdi. Natija - «Beyszin Goan»dagi ikki mavsum.
Yilmaz vataniga qaytganida, 30 yoshni urib qo‘ygandi. Ammo bu hech nimani o‘zgartirmadi: qahramonimiz doimiy jarohatlarga qaramay, gollar urishda davom etdi. Burakni Turkiyada «Qirol» deb atashlari bejiz emasdir, ehtimol. Ammo faoliyatini yakunlashi arafasida Fransiya chempionatiga ko‘chib o‘tishini kimdir kutganmidi? Avvalroq bu oddiy hol sifatida qabul qilinardi, lekin hozir...
«Lill» ham, Yilmaz ham tavakkal qildi. Klubning jur’atiga qoyil qolish kerak: 21 yoshli Viktor Osimxenni «Napoli»ga 80 mln. yevroga sotib, 35 yoshli erkin agent bilan kifoyalandi. Qolaversa, Burak nisbatan sokinroq klub topishi ham mumkin edi.
Uning baxtiga, murabbiy Kristof Galtye nima qilayotganini bilardi, turkiyalik hujumchi va boshqa futbolchilardan iborat ajoyib tarkib shakllantirdi. Mazkur ro‘yxatda yana ikki nafar turk ham bor - Yusuf Yaziji unga hujumlar payti yordamlashadi, yana biri - iqtidorli himoyachi Zeki Chelik. Umuman, «Lill»ning bu tarkibi ancha mustahkam chiqib qoldi, Jonatan Devid, Jonatan Bamba, Jonatan Ikone, Renatu Sanchesh, Sven Botman va Joze Fonte kabi ijrochilar bor.
Garchi Yilmaz navbatdagi jarohatiga yo‘liqib, yanvar-mart oylarida maydonga tusholmagan bo‘lsada, baribir, asosiy tarkibning ajralmas qismiga aylandi. Fransiyada u 26ta o‘yinda 15ta gol urdi, ularning aksariyati joriy mavsum eng muhimlaridan bo‘ldi.
«Burak - Turkiyada chempionlikka ko‘nikib qolganlar toifasidan. U o‘z yurtidagi barcha katta klublarda o‘ynagan va bizningcha, kelajakka shu tariqa taraddud ko‘rgan. Yilmaz bizni oldinga intilishga undaydi», - deydi bosh murabbiy.
Oldinda «Lill»ni bitta o‘yin kutib turibdi - «Anje»ga qarshi. Mazkur uchrashuvdagi g‘alaba Liga 1dagi chempionlikni ta’minlaydi. Agar ushbu muvaffaqiyat amalga oshsa, bu Burak Yilmazning faoliyatidagi eng muhim yutuq bo‘lishi shubhasiz.
A.ABDUVALIXO‘JAYEV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
