Italiya «A» seriyasining so‘nggi turi doirasidagi «Kalyari»ga qarshi kechgan safar uchrashuvida Eldor Shomurodov raqib darvozasini ishg‘ol qilib, g‘alaba goli muallifiga aylandi: hujumchimiz darvozabon bilan yakkama-yakka vaziyatga chiqib borib, to‘pni mohirlik bilan uning ustidan oshirib qo‘ydi. Eldor so‘nggi 6 uchrashuvda 5ta gol urdi, butun mavsumda esa - 8ta. Shu tariqa «Jenoa» to‘purarlari ro‘yxatida Janluka Skamakka (12) hamda Mattia Destrodan (11) keyin uchinchi o‘rinni egalladi. Sports.ru sayti Shomurodovning Italiyadagi dastlabki mavsumi haqida maqola tayyorladi.
Eldor 2020 yilning 1 oktyabrida «Rostov»dan «Jenoa»ga o‘tdi va Ilyos Zeytullayevdan keyin «A» seriyada to‘p surgan ikkinchi o‘zbekistonlik futbolchiga aylandi.
Shomurodovning Italiyadagi faoliyatida kuzatilgan asosiy epizodlar:
* Avvaliga ishlar ko‘ngildagidek kechmadi - Shomurodov dastlabki ikki oyni golsiz o‘tkazdi (3 uchrashuvda to‘p kiritolmadi, shuncha o‘yinni jarohati sabab o‘tkazib yubordi). Shu pallada agent Marko Trabukki Eldorning Italiyadagi faoliyati uzoqqa cho‘zilmasligini taxmin qildi. «Shomurodovni yaxshilik kutmayapti. U «Jenoa»da 90 daqiqa davomida uchta yaxshi uzatmani qabul qilyapti. Bu «Jenoa» uchun katta xato, «Rostov» uchun samarali kelishuv bo‘ldi. Nega «Jenoa» bu futbolchini sotib oldi? Klub shunchaki, katta xatoga yo‘l qo‘ydi. Shomurodovga hujumkor o‘yin namoyish etadigan jamoa kerak. «Rostov»da ajoyib uzatmalarni amalga oshiradigan Roman Yeryomenko bor edi. Qolaversa, uning Rossiyadagi so‘nggi yili omadsiz kechdi. Shomurodovga hurmat bildirgan holda, bu muvaffaqiyatsiz transfer bo‘ldi, deb qo‘rqaman. Tez orada uni Rossiyaga yarim narxiga qaytarish mumkin bo‘ladi», - dedi Trabukki.
* Eldor 30 noyabr kuni «Parma» darvozasini ishg‘ol qilib, shu tariqa barcha tanqidlarga javob qaytardi. Gol mehnat evaziga urildi, lekin u «Jenoa»ga yordam bermadi - «Parma»ga 1:2 hisobida imkoniyat boy berildi.
* Shomurodov keyingi golini 2021 yilning yanvarida «Sassuolo» bilan o‘yinda amalga oshirdi - 64-daqiqada yuqoridan uzatilgan to‘pni boshi bilan uzoq burchakka yo‘naltirib, hisobni tenglashtirdi. Ammo «Jenoa» 83-daqiqada gol o‘tkazib yubordi va yana 1:2 hisobida yengildi.
* O‘zbek o‘g‘loni 20 fevral kuni «Verona»ni ranjitdi - zaxiradan maydonga tushganiga atigi uch daqiqa o‘tar-o‘tmas, gol urdi. Raqib himoyachisidan to‘pni olib qo‘yib, uni darvozaning pastki burchagiga joyladi. O‘sha uchrashuv durang bilan xotima topdi.
* Shomurodovning keyingi to‘qqiz uchrashuvi jimjitlikda kechdi. To‘rtinchi gol esa 24 aprel sanasida «Spesiya»ga qarshi uchrashuvda urildi. 63-daqiqada zaxiradan maydonga tushgan forvard jarima maydoniga oshirib berilgan to‘pga himoyachilardan ildamroq yetib borib, darvozaning yuqori burchagini aniq nishonga oldi. Uchrashuv «Jenoa»ning 2:0 hisobidagi g‘alabasi bilan yakunlandi.
* Keyingi turda «Lasio»ga qarshi kechgan bahsda Shomurodov asosiy tarkibda maydonga tushib, murabbiy ishonchini oqladi. 56-daqiqada rimliklar 4:1 hisobida oldinga chiqib olishgandi, ammo Skamakka 80-daqiqada penalti yordamida farqni qisqartirdi. Oradan bir daqiqa o‘tar-o‘tmas Eldor Reynaning yaqin burchagini aniq nishonga olib, farqni bittaga kamaytirdi. Biroq genuyaliklarga shu kuni boshqa to‘p kiritish nasib qilmadi - 3:4.
* Shomurodovning navbatdagi yorqin o‘yini 37-tur doirasidagi «Atalanta»ga qarshi bahsga to‘g‘ri keldi. Birinchi bo‘limdan so‘ng Gasperini shogirdlari «Jenoa»ni ayashmadi - 0:3, ammo 48-daqiqada Eldor bergamoliklar himoyasidagi pala-partishlikdan foydalanib, raqib darvozasini ishg‘ol qildi. Bunga «Atalanta» tezda javob qaytardi, ammo dastlab Pandev, 84-daqiqada esa Shomurodov to‘p kiritib, intrigani tiklashdi. Ammo natija yana 3:4.
Ko‘rib turganingizdek, Shomurodov bahorda ancha faollik ko‘rsatdi, ammo uning urinishlari jamoasiga ochko keltirmadi.
Statistika Eldorning mehnatkashligi va jamoaviy o‘yinga moyilligini ko‘rsatib turibdi. U bir uchrashuv mobaynida o‘rtacha 21ta pressing harakatini amalga oshiradi. To‘pni olib qo‘yishga intilish ko‘rsatkichi esa uning pozisiyasida to‘p suradigan 96 foiz futbolchinikidan ko‘proqni tashkil etadi.
«Jenoa» sport direktori Franchesko Marokko ham o‘zbekistonlik hujumchining o‘yinlaridan hayratda ekanligini yashirmadi. «Biz ajoyib transferni amalga oshirdik, ulkan istiqbolga ega futbolchini olib keldik. Biz uning Italiyaga moslashish jarayonidan mamnunmiz. U hali to‘laqonli shakllangani yo‘q, ammo kelgusi mavsum bundan-da serg‘ayrat bo‘lishiga ishonamiz», - deydi Marokko.
Eldorning o‘zi ham mamnun: «Italiya futboli men o‘ylagandan qiyinroq, ammo tanlovdan mamnunman, zero yuqori ligalarda o‘ynash orqali o‘sishga erishish mumkin. Genuyada o‘zimni qulay his qilyapman. Davide Ballardini («Jenoa» bosh murabbiyi) menga ko‘p narsani o‘rgatdi, ayniqsa, taktika masalasida. Uzoq vaqt RPLda o‘ynagan Krishito bilan ham yaxshi aloqadaman, ammo moslashish paytida eng ko‘p yordamni Daniel Dumbravanu (moldovalik futbolchi, «Jenoa» yoshlar jamoasida o‘ynaydi) berdi. Jamoaga endigina kelganimda, u ko‘p hollarda tarjimonim vazifasini bajardi».
Keyingi mavsum Shomurodovning Yevropadagi faoliyatida hal qiluvchi ahamiyat kasb etishi shubhasiz.
Eldor eng yaxshilar qatorida
Nafaqat Italiya sportiga ixtisoslashgan OAV, balki butun dunyo sportida katta nufuzga ega La Gazzette dello Sport jurnali «A» seriyaning yakunlangan mavsumi sarhisobi o‘laroq eng foydali 100 nafar futbolchi ro‘yxatini tuzib chiqdi. Unda 1-o‘rin «Inter» bilan chempionlikni tantana qilgan belgiyalik Romelu Lukakuga berildi. Kuchli uchlikdan esa «Milan» sardori Frank Kessiye va «Yuventus» yulduzi, mavsum bosh to‘purari Krishtianu Ronaldu joy olishdi. Biz uchun e’tiborli tomoni, hamyurtimiz Eldor Shomurodov ham eng yaxshi 100 nafar futbolchi qatorida e’tirof etildi. Aniqroq aytsak, «Jenoa» safida 8ta gol va 2ta samarali uzatma muallifiga aylangan milliy jamoamiz hujumchisi 5,94 ball bilan 85-o‘rinni band etdi. Umuman olganda, top-100ga «Jenoa»dan yana Davide Zappakosta (30-o‘rin), Mattia Destro (46-o‘rin), Mattia Perin (72-o‘rin), Janluka Skamakka (84-o‘rin) va Milan Badel (97-o‘rin) ham kirishdi.
X.YUSUPOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
